સાવલીમાં મોતનું નેટવર્ક: ગેસ ટેન્કર બનાવવામાં મોટું કૌભાંડ; શ્રીધર ઇન્ડસ્ટ્રિઝ અને કોલકત્તાની એજન્સી સામે પોલીસ ફરિયાદ

• જીવ સાથે ચેડાં: સાવલીના મોક્સી ગામે આવેલી કંપનીમાં એલપીજી ટેન્કર બનાવવામાં ગંભીર ગેરરીતિ; સુરક્ષાના માપદંડો નેવે મુકાયા.
• પોલીસ ફરિયાદ દાખલ: પેસો (PESO) ના જોઈન્ટ ચીફ કન્ટ્રોલરે કોલકત્તાની થર્ડ પાર્ટી એજન્સીના બે ઇન્સ્પેક્ટરો અને શ્રીધર ઇન્ડસ્ટ્રિઝ સામે નોંધાવી ફરિયાદ.
• ટેન્કરની જાડાઈમાં ગોટાળા: નિયત 18 એમએમને બદલે 16.92 એમએમથી પણ ઓછી જાડાઈના ટેન્કર બનાવી લોકોના જીવ જોખમમાં મૂક્યા.
• ખોટા સર્ટિફિકેટનું કારસ્તાન: કોલકત્તાની કંપનીએ નિયમોનું ઉલ્લંઘન કરી બનાવટી માહિતીના આધારે સર્ટિફિકેટ ઇસ્યુ કર્યા હોવાનો ઘટસ્ફોટ.

વડોદરા: વડોદરા જિલ્લાના સાવલી તાલુકાના મોક્સી ગામે આવેલી ‘શ્રીધર ઇન્ડસ્ટ્રિઝ’ કંપની દ્વારા પેટ્રોલિયમ અને એલપીજી ગેસના ટેન્કર (વેસલ્સ) બનાવવામાં ગંભીર બેદરકારી અને ગેરરીતિ આચરવામાં આવતી હોવાનું સામે આવતા ચકચાર મચી ગઈ છે. આ મામલે આખરે ‘પેસો’ (Petroleum and Explosives Safety Organization) દ્વારા પોલીસ ફરિયાદ દાખલ કરવામાં આવી છે.

❓શું છે સમગ્ર કૌભાંડ?

વડસર સ્થિત કન્ટ્રોલર ઓફ એક્સપ્લોઝિવની કચેરીના જોઈન્ટ ચીફ કન્ટ્રોલર અશોકકુમાર પુરુષોત્તમ કુમારે કોલકત્તાની ‘મેસર્સ ઇન્ડસ્ટ્રિયલ મેનેજમેન્ટ કાઉન્સિલ’ અને ‘શ્રીધર ઇન્ડસ્ટ્રિઝ’ વિરુદ્ધ ફરિયાદ નોંધાવી છે. મે-2024માં મળેલી ફરિયાદ બાદ, જાન્યુઆરી-2025માં હાથ ધરવામાં આવેલા તપાસમાં ટેન્કરની બનાવટમાં મોટી ક્ષતિઓ મળી આવી હતી.

તપાસમાં જાણવા મળ્યું કે, ટેન્કરની પ્લેટની નિર્ધારિત જાડાઈ 18 એમએમ હોવી જોઈએ, જેની જગ્યાએ તે 16.92 એમએમથી પણ ઓછી હતી. આટલું ઓછું હોય તેમ, થર્ડ પાર્ટી ઇન્સ્પેક્શન એજન્સીના ઇન્સ્પેક્ટરો એ. ભટ્ટાચાર્ય અને જે. ચૌધરીએ ટેન્કર બનાવવાની કામગીરીનું સ્ટેપ-બાય-સ્ટેપ નિરીક્ષણ કર્યા વગર જ ખોટી વિગતો લખી સર્ટિફિકેટ ઇસ્યુ કરી દીધા હતા.

🧐લોકોના જીવન સાથે ખેલ:

આ પ્રકારના હલકી કક્ષાના ગેસ ટેન્કર રસ્તા પર દોડતા હોય ત્યારે તે ગમે ત્યારે મોટા અકસ્માત કે વિસ્ફોટનું કારણ બની શકે છે. કંપનીની આ બેદરકારી સીધી રીતે જ સામાન્ય નાગરિકોના સ્વાસ્થ્ય અને જીવન સાથેનો ખેલ છે. તંત્ર દ્વારા હવે આ કૌભાંડમાં સંડોવાયેલા અન્ય લોકોની પણ તપાસ હાથ ધરવામાં આવશે.

🫵ગેસ ટેન્કર જેવા સંવેદનશીલ વ્યવસાયમાં આ પ્રકારની ગંભીર બેદરકારી માફીને પાત્ર નથી. પોલીસ તપાસમાં હવે એ સ્પષ્ટ થશે કે આ કૌભાંડ પાછળ કેટલા મોટા માથાઓનો હાથ છે.