રહસ્યમય કંકાલ: સાવલી પોલીસ મુવાલ સીમમાં દોડી, FSL ની મદદથી ઓળખવિધિની તજવીજ

• ખેતરમાંથી મળ્યું કંકાલ: સાવલીના મુવાલ ગામની સીમમાં માનવ કંકાલ મળી આવતા સમગ્ર પંથકમાં ચકચાર.
• ખેતર માલિક પણ ચોંકી ઉઠ્યા: જીગ્નેશ પટેલ નામના ખેડૂતને ખેતરમાં કંકાલ દેખાતા તુરંત પોલીસને કરી જાણ.
• એફએસએલની મદદ લેવાઈ: પોલીસે કંકાલનો કબજો મેળવી ઓળખ વિધિ અને મોતનું કારણ જાણવા FSLની તપાસ તેજ કરી.
• પોલીસ કાફલો ઘટનાસ્થળે: સાવલી પોલીસના ઉચ્ચ અધિકારીઓએ સ્થળ પર પહોંચી તપાસનો ધમધમાટ શરૂ કર્યો.

વડોદરા/સાવલી: વડોદરા જિલ્લાના સાવલી તાલુકામાં આજે એક ચોંકાવનારી ઘટના સામે આવી છે. તાલુકાના મુવાલ ગામની સીમમાં આવેલા એક ખેતરમાંથી માનવ કંકાલ મળી આવતા સમગ્ર પંથકમાં ભય અને આશ્ચર્યનો માહોલ જોવા મળી રહ્યો છે. ડી-કમ્પોસ્ટ હાલતમાં મળી આવેલા આ કંકાલને પગલે અનેક તર્ક-વિતર્ક સર્જાયા છે.

📌ઘટનાની વિગત:

મુવાલ ગામની સીમમાં જીગ્નેશ પટેલ નામના ખેડૂતનું ખેતર આવેલું છે. આજે જ્યારે ખેતર માલિક ખેતરમાં ગયા હતા, ત્યારે તેમને સીમમાં એક માનવ હાડપિંજર નજરે પડ્યું હતું. હાડપિંજર સંપૂર્ણપણે ડી-કમ્પોસ્ટ હાલતમાં હોવાથી પ્રાથમિક દ્રષ્ટિએ તે ઘણું જૂનું હોવાનું જણાય છે. ખેતર માલિકે આ અંગે તુરંત સાવલી પોલીસને જાણ કરી હતી.

🚨પોલીસ તપાસ અને એફએસએલ:

બનાવની ગંભીરતાને જોતા સાવલી પોલીસના ઉચ્ચ અધિકારીઓનો કાફલો તાત્કાલિક મુવાલ ગામની સીમમાં દોડી આવ્યો હતો. પોલીસે ઘટનાસ્થળનું નિરીક્ષણ કરી કંકાલનો કબજો મેળવ્યો છે. આ કંકાલ કોનું છે અને તે સ્ત્રીનું છે કે પુરુષનું, તે જાણવા માટે એફએસએલ (FSL) ની મદદ લેવામાં આવી રહી છે.

🧐અકસ્માતે મોતનો ગુનો:

સાવલી પોલીસે હાલમાં આ મામલે અકસ્માતે મોતનો ગુનો નોંધી વધુ તપાસ હાથ ધરી છે. આ કોઈ હત્યાનો મામલો છે કે કોઈ ગુમ થયેલી વ્યક્તિનું શરીર છે, તે દિશામાં પણ પોલીસે તપાસના ચક્રો ગતિમાન કર્યા છે.

[સ્થાનિકની બાઈટ]

“હું સવારે ખેતરમાં લટાર મારવા ગયો હતો ત્યારે અચાનક મારી નજર આ હાડપિંજર પર પડી. પહેલા તો હું પણ ડરી ગયો હતો, પણ પછી હિંમત કરી ગામલોકો અને પોલીસને જાણ કરી.” – જીગ્નેશ પટેલ, ખેતર માલિક.

🫵મુવાલ ગામની સીમમાં મળેલું આ રહસ્યમય કંકાલ હવે પોલીસ માટે તપાસનો વિષય બન્યું છે.