વડોદરામાં પોલીસની મોટી કાર્યવાહી : મહારાષ્ટ્ર પાસિંગના કન્ટેનરમાંથી 30.59 લાખનો દારૂનો જથ્થો જપ્ત, ડ્રાઈવર ફરાર

• સ્થળ: નેશનલ હાઇવે-48, ગોકુલ કટ (તરસાલીથી જંબુવા બ્રીજ વચ્ચે), વડોદરા.
• કુલ મુદ્દામાલ: રૂ. 30,59,368 (જેમાં રૂ. 20.59 લાખનો દારૂ અને રૂ. 10 લાખનું કન્ટેનર).
• જથ્થો: વિવિધ બ્રાન્ડની વિદેશી દારૂની કુલ 11,628 બોટલો.
• કાર્યવાહી: પોલીસને જોઈ ડ્રાઈવર ફરાર, ‘સુમિત લોજિસ્ટિક્સ’ના માલિક અને દારૂ મંગાવનાર અજાણ્યા ઈસમો સામે તપાસ શરૂ.

વડોદરા: વડોદરા શહેર પોલીસ દ્વારા દારૂ અને જુગાર જેવી અસામાજિક પ્રવૃત્તિઓ નાબૂદ કરવાના અભિયાન અંતર્ગત કપુરાઈ પોલીસે એક મોટી સફળતા મેળવી છે. પોલીસને મળેલી બાતમીના આધારે નેશનલ હાઈવે-48 પરથી વિદેશી દારૂ ભરેલું એક કન્ટેનર ઝડપી પાડવામાં આવ્યું છે.

👮કપુરાઈ પોલીસ સ્ટેશનના સ્ટાફને બાતમી મળી હતી કે નેશનલ હાઈવે પર તરસાલીથી જંબુઆ બ્રીજ તરફ જવાના રસ્તે, ગોકુલ કટ પાસે એક કન્ટેનરમાં વિદેશી દારૂનો જથ્થો ભરીને ઊભું છે. બાતમીના આધારે પોલીસે સ્થળ પર પહોંચીને તપાસ કરતા કન્ટેનર મળી આવ્યું હતું, જોકે તેનો ડ્રાઈવર અંધારાનો લાભ લઈને ફરાર થઈ ગયો હતો.

🚚કન્ટેનરમાંથી 🍾દારૂનો જથ્થો

તપાસ દરમિયાન કન્ટેનરના દરવાજા તોડીને અંદર જોતા, વિવિધ બ્રાન્ડની વિદેશી દારૂની બોટલો મળી આવી હતી. જેમાં CHARLIE RESERVE, ROYAL CHALLENGE અને GREY WOLF જેવી બ્રાન્ડનો સમાવેશ થાય છે. પોલીસે કુલ 11,628 બોટલો કબજે કરી છે.

🧐કુલ મુદ્દામાલ

આ રેડમાં પોલીસે 30,59,368 રૂપિયાનો મુદ્દામાલ જપ્ત કર્યો છે, જેમાં 20,59,368 રૂપિયાનો વિદેશી દારૂ અને 10,00,000 રૂપિયાની કિંમતનું કન્ટેનર (MH-46-BU-3108) સામેલ છે.

🚨પોલીસ દ્વારા RTO રજીસ્ટ્રેશનના આધારે તપાસ કરતા આ ગાડી SUMIT LOGISTIC PVT LTD, કલામબોલી, નવી મુંબઈની હોવાનું બહાર આવ્યું છે. હાલમાં પોલીસ દ્વારા દારૂ મંગાવનાર અજાણ્યા ઈસમ અને કન્ટેનરના ડ્રાઈવરને પકડવા માટે તપાસના ચક્રો ગતિમાન કરવામાં આવ્યા છે.