શિનોર: ₹75 લાખના બ્લેકમેલિંગ કાંડમાં પોલીસનો સપાટો; અત્યાર સુધીમાં 9 આરોપીઓ જેલના સળિયા પાછળ

• શિનોરના હરેશ પટેલ પાસેથી ₹75.75 લાખ પડાવનાર ટોળકી પર પોલીસની તવાઈ.
• મુખ્ય આરોપી શૈલેશ વસાવા સહિત કુલ 9 આરોપીઓની ધરપકડ; ₹28.68 લાખનો મુદ્દામાલ રિકવર.
• મનીષા ઉર્ફે શાંતાબેન સહિતના ફરાર આરોપીઓની શોધખોળ તેજ; પોલીસનું સઘન ઓપરેશન.

શિનોર પંથકમાં ચકચાર જગાવનાર ₹75.75 લાખના બ્લેકમેલિંગ કેસમાં શિનોર પોલીસે તપાસનો ધમધમાટ તેજ કર્યો છે. ગત તારીખ 6 ફેબ્રુઆરી 2026ના રોજ ફરિયાદી હરેશ રણછોડ પટેલે 9 શખ્સો વિરુદ્ધ નોંધાવેલી ફરિયાદના આધારે પોલીસે અત્યાર સુધીમાં મોટી સંખ્યામાં આરોપીઓને દબોચી લીધા છે.

🧐તપાસની સફર અને સફળતા:

શરૂઆતમાં આ કેસની તપાસ ઇન્ચાર્જ પી.આઈ. ડી.આર. ભાદરકા દ્વારા હાથ ધરવામાં આવી હતી, જેમાં અનવર મન્સૂરી અને સલીમ ઉર્ફે બતકની ધરપકડ કરી  રિકવર કરાયા હતા. ત્યારબાદ મુખ્ય આરોપી આશિક સિકંદર પઠાણની ધરપકડ બાદ રૂ. 14 લાખની રોકડ રિકવર થઈ હતી. તપાસ દરમિયાન અશફાક પઠાણનું નામ પણ સામે આવ્યું હતું.

તાજેતરમાં પી.આઈ. આર.આર. વસાવાએ તપાસનો ચાર્જ સંભાળતા જ તપાસને નવી ગતિ મળી છે. એલ.સી.બી. પોલીસની મદદથી મુખ્ય આરોપી શૈલેષ વસાવાને ઝડપી પાડવામાં સફળતા મળી છે. શૈલેષના રિમાન્ડ દરમિયાન પોલીસે રૂ. 2.13 લાખની રકમ, રૂ. 5 લાખની કાર, રૂ. 40 હજાર રોકડા અને રૂ. 3 લાખના ઘરેણાં સીઝ કર્યા છે. આ સાથે જ અત્યાર સુધીમાં કુલ રૂ. 28,68,000 નો મુદ્દામાલ પોલીસ દ્વારા રિકવર કરવામાં આવ્યો છે.

👉નવા 5 આરોપીઓની ધરપકડ:

પોલીસે વધુ તપાસ દરમિયાન આકાશ વસાવા (મનીષાનો બનેવી), પ્રકાશ વસાવા (સહેલીનો પતિ), હરદીપસિંહ ધરીયા (મનીષાનો ભાઈ), નિશાબેન વસાવા (મનીષાની સહેલી) અને લક્ષ્મીબેન ઠાકોર પટેલ (મનીષાની માતા) ને પણ ઝડપી પાડી રૂ. 16,500 નો મુદ્દામાલ અને એક મોબાઈલ જપ્ત કર્યો છે.

🚨આગામી કાર્યવાહી:

જોકે, આ બ્લેકમેલિંગ કાંડની મુખ્ય આરોપી મનીષા ઉર્ફે શાંતાબેન હાલ ફરાર છે. આ ઉપરાંત આશિકના ભાઈ અહેમદ (જેણે 8 લાખ લીધા હતા), માલસર-માંડવા વચ્ચે રહેતા એક મહારાજ, એક ‘લંગડા’ તરીકે ઓળખાતો શખ્સ અને આશિકની અલ્ટો ગાડી સહિતના મુદ્દાઓ માટે પોલીસની શોધખોળ ચાલુ છે. શિનોર પોલીસે આ કેસમાં તમામ આરોપીઓને જેલના સળિયા પાછળ ધકેલવા માટે કમર કસી છે.