વડોદરામાં કાળજું કંપાવતો આપઘાત: 19 વર્ષના કિરણે મોત પહેલા બનાવ્યો વીડિયો; લખ્યું – ‘હું ભૂતની જેમ જીવું છું’.

• આજવા રોડ પર ચકચાર: ચામુંડા નગરમાં 19 વર્ષના કિરણ મકવાણાએ ગળે ફાંસો ખાઈ જીવન ટૂંકાવ્યું.
• હૃદયદ્રાવક અંતિમ શબ્દો: “મમ્મી-પપ્પા, અંદરથી મારું શરીર તૂટે છે, હું ભૂતની જેમ જીવી રહ્યો છું” – વીડિયોમાં કિરણની દર્દનાક વ્યથા.
• નાના ભાઈને શિખામણ: ધોરણ 12માં ભણતા ભાઈને કહ્યું – “મેં શોર્ટકટ લેવામાં ભૂલો કરી, તું મમ્મી-પપ્પાને સાચવજે અને ખુશી આપજે.”
• બહેનને મોકલ્યા વીડિયો: માનેલી બહેનને આપઘાત પૂર્વે 3 વીડિયો મોકલ્યા; બાપોદ પોલીસે તપાસ હાથ ધરી.

વડોદરા: વડોદરા શહેરના આજવા રોડ વિસ્તારમાંથી એક અત્યંત કરુણ અને આંખમાં આંસુ લાવી દે તેવા સમાચાર સામે આવ્યા છે. અભ્યાસમાં નિષ્ફળતા અને માનસિક વ્યથાના કારણે 19 વર્ષના એક પોલિટેક્નિકના વિદ્યાર્થીએ પોતાના જ ઘરના ત્રીજા માળે ગળેફાંસો ખાઈ આપઘાત કરી લીધો છે. યુવકે મોતના મુખમાં જતા પહેલા 6 પાનાની સ્યુસાઇડ નોટ અને એક લાંબો વીડિયો મેસેજ છોડ્યો છે, જે તેના પરિવાર માટે આજીવન ન રૂઝાય તેવું ઝખમ આપી ગયો છે.

🧐કુરિયર બોયના ફોનથી ખુલી ઘટના:

મળતી માહિતી મુજબ, આજવા રોડ પર આવેલા ચામુંડા નગર-2 માં રહેતો 19 વર્ષીય કિરણ મકવાણા પોલિટેક્નિકના પ્રથમ વર્ષના બીજા સેમેસ્ટરમાં અભ્યાસ કરતો હતો. શનિવારે બપોરે તે જમીને ઘરના ત્રીજા માળે ગયો હતો. સાંજે પાંચ વાગ્યે કિરણનું એક પાર્સલ આવ્યું હોવાથી કુરિયર બોય તેને સતત ફોન કરતો હતો, પરંતુ કિરણે ફોન ન ઉપાડતા તેની માતા ત્રીજા માળે તપાસ કરવા ગયા હતા. જ્યાં કિરણ હૂક પર દોરી વડે લટકતી હાલતમાં મળી આવ્યો હતો. તેને તાત્કાલિક સયાજી હોસ્પિટલ ખસેડાયો હતો, જ્યાં તબીબોએ તેને મૃત જાહેર કર્યો હતો.

😔અંતિમ વીડિયોમાં ઠાલવ્યું દર્દ:

કિરણે આત્મહત્યા કરતા પહેલા પોતાની માનેલી બહેનને ૩ વીડિયો મોકલ્યા હતા. વીડિયોમાં કિરણે ભાવુક થઈને કહ્યું કે, “મેં તને બહુ હેરાન કરી છે, મારી ભૂલના કારણે આપણે દૂર થવું પડ્યું. તારા જેવી બેસ્ટ બહેન ક્યારેય નહીં મળે.”

સાથે જ માતા-પિતાની માફી માંગતા તેણે કહ્યું કે, “સોરી મમ્મી-પપ્પા, હું અંદરથી મરી ગયો છું, મારું આખું શરીર તૂટે છે. મને લાગે છે કે હું ભૂતની જેમ જીવું છું.” કિરણે પોતાના નાના ભાઈ દેવને પણ સલાહ આપી હતી કે, “મેં શોર્ટકટ લેવામાં દરેક નિર્ણયો ખોટા લીધા અને કોલેજમાં નાપાસ થયો. તું મમ્મી-પપ્પા સામે ક્યારેય બોલતો નહીં અને તેમને દુનિયાની બધી ખુશી આપજે.”

👮પોલીસ તપાસ શરૂ:

ઘટનાની જાણ થતાં જ બાપોદ પોલીસનો કાફલો હોસ્પિટલ અને ઘટનાસ્થળે દોડી આવ્યો હતો. પોલીસે કિરણનો મોબાઈલ અને 6 પાનાની અંતિમ ચિઠ્ઠી કબજે કરી છે. કિરણે આત્મહત્યા પહેલાં માનેલી બહેનને મોકલેલા 8 મિનિટ, 1 મિનિટ અને 35 સેકન્ડના વીડિયોને પોલીસે ટેકનિકલ એનાલિસિસ માટે મોકલી આપી આગળની કાયદેસરની તપાસ તેજ કરી છે.

🫵ભણતરના સ્ટ્રેસ અને ખોટા નિર્ણયોના કારણે વધુ એક આશાસ્પદ યુવાને પોતાની જિંદગી ટૂંકાવી દીધી છે, જે લાલબત્તી સમાન કિસ્સો છે. બાપોદ પોલીસ હાલ આ મામલે ઊંડી તપાસ ચલાવી રહી છે.