“₹2000 આપ, નશો કરવો છે”: વડોદરામાં પૈસા માટે યુવકને લોખંડની પાઇપથી ફટકાર્યો, ₹1500ની લૂંટ

• માંજલપુરમાં સરેઆમ લૂંટ: નશો કરવા માટે પૈસા ન આપતા અજય ચૌધરીએ શ્રમજીવી યુવકના ખિસ્સામાંથી ₹1500 ઝૂંટવી લીધા.
• લોખંડની પાઇપથી હુમલો: 25 વર્ષીય સંજય પરમારને પેટ, પીઠ અને માથાના ભાગે જીવલેણ ઇજાઓ પહોંચાડી; જાતિ અપમાનિત શબ્દો બોલી આપી ધમકી.
• તુલસી એપાર્ટમેન્ટ પાસેની ઘટના: મિત્રને મળવા ગયેલા યુવકને નિશાન બનાવ્યો; માંજલપુર પોલીસે લૂંટ અને હુમલાનો ગુનો નોંધ્યો.
• આરોપી હજુ પોલીસ પકડથી દૂર? આકાર ગંગા સોસાયટીમાં રહેતા આરોપી અજય તેજવીરભાઈ ચૌધરીને દબોચી લેવા પોલીસના ચક્રો ગતિમાન.

​વડોદરા: સંસ્કારી નગરી વડોદરામાં નશાખોરોનો આતંક સતત વધી રહ્યો હોય તેમ જણાય છે. શહેરના પ્રતાપનગર ડેરી રોડ પર રહેતા એક શ્રમજીવી યુવક પર નશો કરવાના પૈસા બાબતે લોખંડની પાઇપ વડે હુમલો કરી લૂંટ ચલાવવામાં આવતા ચકચાર મચી ગઈ છે. માંજલપુર પોલીસે આ મામલે આરોપી સામે કાયદેસરની કાર્યવાહી હાથ ધરી છે.

📌ઘટનાની વિગત:

મૂળ પ્રતાપનગરના લકી એપાર્ટમેન્ટમાં રહેતા ૨૫ વર્ષીય સંજય પરમાર ગત રાત્રે 8:30 વાગ્યાના સુમારે માંજલપુર તુલસી એપાર્ટમેન્ટ પાસે પોતાના મિત્રને મળવા માટે ગયા હતા. આ દરમિયાન આકાર ગંગા સોસાયટીમાં રહેતો અજય તેજવીરભાઈ ચૌધરી ત્યાં આવી ચઢ્યો હતો અને સંજય પાસે નશો કરવા માટે ₹2000ની માંગણી કરી હતી.

📌લૂંટ અને જાતિ અપમાનિત શબ્દો:

જ્યારે સંજયે પૈસા આપવાની ના પાડી, ત્યારે ઉશ્કેરાયેલા અજયે જબરજસ્તીથી સંજયના પેન્ટના ખિસ્સામાંથી ₹1500 કાઢી લીધા હતા. આટલેથી જ ન અટકતા આરોપીએ સંજયને જાતિ અપમાનિત શબ્દો કહી ગાળો ભાંડી હતી અને “તને જાનથી મારી નાખીશ” તેવી ધમકી આપી હતી.

🧐પાઇપથી જીવલેણ હુમલો:

આરોપી અજયે પોતાની પાસે રહેલી લોખંડની પાઇપ વડે સંજય પર હુમલો કર્યો હતો, જેમાં સંજયને પેટ, પીઠ અને માથાના ભાગે ગંભીર ઇજાઓ પહોંચી હતી. હુમલા બાદ સંજયે ત્યાંથી ભાગી છૂટીને પોતાનો જીવ બચાવ્યો હતો અને ત્યારબાદ માંજલપુર પોલીસ સ્ટેશન પહોંચી આરોપી વિરુદ્ધ ફરિયાદ નોંધાવી હતી.

🫵નશાખોરોની આ પ્રકારની હિંમત પોલીસના કડક બંદોબસ્ત સામે સવાલો ઉભા કરી રહી છે. માંજલપુર પોલીસ આરોપીને ક્યારે દબોચી લેશે તે જોવું રહ્યું.