વડોદરા કોર્પોરેશનમાં ‘ક્રિકેટ કીટ’ મુદ્દે ખેલાયો જંગ: મેયર અને ડેપ્યુટી મેયર સામસામે

વડોદરા મહાનગરપાલિકામાં ભ્રષ્ટાચાર અને ખર્ચના વિવાદો તો અવારનવાર સામે આવતા હોય છે, પરંતુ આ વખતે વિવાદ ક્રિકેટના મેદાન સુધી પહોંચ્યો છે. ભાવનગરમાં યોજાનારી મેચ પહેલા ખેલાડીઓની કીટ ખરીદવા બાબતે મેયર અને ડેપ્યુટી મેયર વચ્ચે એવી તે ભાંજગડ થઈ કે છેક શહેર ભાજપ પ્રમુખે દખલગીરી કરવી પડી. જુઓ આ ખાસ અહેવાલ.

વડોદરા કોર્પોરેશનની ચૂંટાયેલી અને વહીવટી પાંખની ટીમ ક્રિકેટ રમવા માટે ભાવનગર પહોંચી છે. અંદાજે 40 જેટલા ખેલાડીઓ અને મેનેજરની આ ટીમ માટે ક્રિકેટ કીટની ખરીદીનો મામલો અત્યારે ટોક ઓફ ધ ટાઉન બન્યો છે. વિવાદ ત્યારે સર્જાયો જ્યારે ડેપ્યુટી મેયરે મેયરના સૂચનને અવગણીને પોતાની મનસ્વી રીતે કીટની સામગ્રી વધારી દીધી.

🧐 મુખ્ય મુદ્દાઓ જે વિવાદનું કારણ બન્યા:

• મેયરનું સૂચન: દરેક ખેલાડીને 2 જોડી યુનિફોર્મ અને 1 જોડી શૂઝ આપવા.
• ડેપ્યુટી મેયરનો ‘અતિ ઉત્સાહ’: મેયરના હોદ્દાની ગરિમા જાળવ્યા વગર 3 જોડી યુનિફોર્મ, 2 જોડી શૂઝ અને સ્પોર્ટ્સ બેગ આપવાનું નક્કી કરી નાખ્યું.
• ખર્ચનો અંદાજ: આ મનસ્વી નિર્ણયને કારણે કોર્પોરેશનની તિજોરી પર લાખો રૂપિયાનો વધારાનો બોજ પડવાની શક્યતા હતી.

આ મામલે વિવાદ વકરતા આખરે મામલો શહેર ભાજપ પ્રમુખ સુધી પહોંચ્યો હતો. શહેર પ્રમુખની મધ્યસ્થી બાદ અંતે મેયરના મૂળ સૂચન મુજબ જ કીટ આપવાનું નક્કી કરાયું છે. ઉલ્લેખનીય છે કે, અગાઉ પણ મહિલા મેયર હોવા છતાં ડેપ્યુટી મેયર અને અન્ય મહિલા કોર્પોરેટરો દ્વારા હોદ્દાની મર્યાદા ન જાળવવાના કિસ્સા પ્રદેશ કક્ષાએ પહોંચી ચૂક્યા છે.
ગયા વર્ષનો ખર્ચ એક નજર (ગ્રાફિક્સ પ્લેટ):
કોર્પોરેશનમાં રમત-ગમતના નામે થતો ખર્ચ હંમેશા વિવાદમાં રહ્યો છે.

ગયા વર્ષના આંકડા જોઈએ તો:

• કુલ ખર્ચ: ₹15.28 લાખ (પ્રેક્ટિસ, નાસ્તો અને કીટ)
• ચા-નાસ્તો (6 દિવસ): ₹84,250
• જમવાનો ખર્ચ (5 દિવસ): ₹53,200
• સ્પોર્ટ્સ કીટ (BS સ્પોર્ટ્સ): ₹12.44 લાખ

🫵એક તરફ જ્યારે વડોદરાના નાગરિકો પ્રાથમિક સુવિધાઓ અને ટેક્સના નાણાંના સદુપયોગની આશા રાખે છે, ત્યારે સત્તાધારી પક્ષના પદાધિકારીઓ વચ્ચે ‘કોણ વધુ ખર્ચ કરે’ તેવી હોડ જામી હોય તેમ લાગી રહ્યું છે. મેયરની સૂચનાને બાજુ પર મૂકી ખેલાડીઓને ખુશ કરવાનો ડેપ્યુટી મેયરનો આ પ્રયાસ ભાજપના આંતરિક જૂથવાદને પણ સપાટી પર લાવી રહ્યો છે.