ડભોઇ: ચાંદોદની સીમમાં શોર્ટ સર્કિટથી ભીષણ આગ, મકાઈનો પાક બળીને ખાખ થતા ખેડૂતને આર્થિક ફટકો

• ખેડૂત માથે આભ ફાટ્યું: ચાંદોદ-નવા માંડવાની સીમમાં વીજ લાઈનમાં ખામી સર્જાતા ભીષણ આગ; હરિયાળા ખેતરો જોતજોતામાં રાખના ઢગલામાં ફેરવાયા.
• MGVCL સામે આક્રોશ: જર્જરિત વીજ લાઈનમાંથી પડેલા તણખાએ સર્જ્યો વિનાશ; ૧૦ થી ૧૨ એકરમાં તૈયાર મકાઈનો પાક બળીને ખાખ.
• કુદરત અને તંત્રનો બેવડો માર: કમોસમી વરસાદ અને ભાવના અભાવ વચ્ચે હવે આગની હોનારત; ખેડૂતોને માથે હાથ દઈ રોવાનો વારો આવ્યો.
• વળતરની માંગ: પાયમાલ થયેલા ૫ ખેડૂતોએ MGVCL પાસે આર્થિક મદદની કરી પોકાર; તંત્ર ક્યારે લેશે નોંધ?

ડભોઇ: ડભોઇ તાલુકાના ચાંદોદ અને નવા માંડવા પંથકમાં આજે ખેડૂતો પર આફત ઉતરી આવી છે. એમજીવીસીએલની હાઈટેન્શન વીજ લાઈનમાં સર્જાયેલી ખામીને કારણે તૈયાર થયેલો મકાઈનો પાક ભળભળ બળવા લાગ્યો હતો. સુસવાટા ભેર ફૂંકાતા પવને આગમાં ઘી હોમવાનું કામ કર્યું અને જોતજોતામાં ૧૨ એકર જમીન પર પથરાયેલો પાક ખાખ થઈ ગયો હતો.

📌ઘટનાની વિગત:

સોમવારે બપોરે ચાંદોદ-નવા માંડવાની સીમમાં રેલ્વે સ્ટેશન તરફ જતી નેર વિસ્તારના ખેતરો પરથી પસાર થતી વીજ લાઈનમાં એકાએક શોર્ટ સર્કિટ થયું હતું. વીજ લાઈનમાંથી નીકળેલા તણખા તૈયાર મકાઈના ખેતરમાં પડતા જ આગ લાગી હતી. ખેડૂતોએ પાણીનો મારો ચલાવી અને ડભોઇ ફાયર ફાઈટરની મદદ લઈને આગ ઓલવવાનો પ્રયાસ કર્યો હતો, પરંતુ પવનની ગતિ વધુ હોવાથી આગ પર કાબૂ મેળવવો અશક્ય બન્યો હતો.

🧐પાયમાલ થતા ખેડૂતો:

આ ભયાનક આગમાં પાંચ ખેડૂતોની આખા વર્ષની મહેનત બળીને રાખ થઈ ગઈ છે. ખેડૂતોનું કહેવું છે કે, થોડા દિવસો પહેલા જ કમોસમી વરસાદની આફત આવી હતી, બજારમાં મકાઈના યોગ્ય ભાવ મળતા નથી અને હવે આ અકસ્માતે અમને પાયમાલ કરી દીધા છે. હજારો રૂપિયાનું બિયારણ, ખાતર અને રાત-દિવસની મજૂરી બાદ જ્યારે પાક લણવાનો સમય આવ્યો ત્યારે જ આ દુર્ઘટના ઘટી છે.

🗣️વળતરની પોકાર:

પાયમાલ થયેલા ખેડૂતોએ હવે એમજીવીસીએલ (MGVCL) સામે મોરચો માંડ્યો છે. ખેડૂતોની માંગ છે કે વીજ કંપનીની નબળી જાળવણીને કારણે આ નુકસાન થયું છે, તેથી સરકારે અને વીજ કંપનીએ તાત્કાલિક સર્વે કરી યોગ્ય આર્થિક વળતર ચૂકવવું જોઈએ.

🫵જ્યારે અન્નદાતા પર આવી આફતો આવે છે ત્યારે તંત્રના કાન સુધી તેમની ચીસ ક્યારે પહોંચશે તે જોવું રહ્યું.