વડોદરામાં હત્યા કેસની સાક્ષી મહિલા પર અત્યાચાર; કેસ પાછો નહીં ખેંચે તો પતિ જેવી જ હાલત કરવાની ધમકી મળતા પોલીસ રક્ષણની માંગ

• મુખ્ય સાક્ષીને ધમકી: પતિની હત્યાના કેસમાં નજરે જોનાર સાક્ષી પૂજાબેન પર કેસ પાછો ખેંચવા માટે સતત દબાણ.
• ત્રણ અલગ-અલગ બનાવો: પન્નાલાલ મારવાડી, અર્જુન મારવાડી અને રવિ વાઘેલા દ્વારા અલગ-અલગ સમયે ખુલ્લેઆમ ગાળાગાળી અને જીવથી મારી નાખવાની ધમકીઓ અપાઈ.
• પરિવાર અને સંતાનને જોખમ: ફરિયાદી મહિલા, મેહુલ તેમજ તેમની દીકરીને ઉઠાવી જવાની અને પતિની જેમ મોતને ઘાટ ઉતારવાની ચીમકી.
• ભયનો માહોલ: આરોપીઓનો સ્વભાવ અત્યંત માથાભારે અને જનુની હોવાથી ભોગ બનનાર પરિવાર ડરના સાયા હેઠળ જીવી રહ્યો છે.

વડોદરા: વડોદરા શહેરના અટલાદરા વિસ્તારમાં ગત 3 જૂન 2026ના રોજ ગિરીશભાઈ ભાલીયાની થયેલી હત્યાના મામલામાં નજરે જોનાર મુખ્ય સાક્ષી અને મૃતકની પત્ની પૂજાબેનને આરોપીઓના સાગરીતો દ્વારા કેસ પાછો ખેંચવા માટે સતત ધમકીઓ આપવામાં આવી રહી છે. આ અંગે પૂજાબેને અટલાદરા પોલીસ સ્ટેશનમાં વિગતવાર ફરિયાદ નોંધાવી છે.

🧐શું છે સમગ્ર ઘટના?

ફરિયાદ મુજબ, ગત ૩ જૂનના રોજ કલાલી ગોકુળનગર પાછળ દર્શન મારવાડી અને કરણ મારવાડીએ ચપ્પુના ઘા ઝીંકી ગિરીશભાઈ ભાલીયાની હત્યા કરી નાખી હતી. આ કેસમાં પોલીસે બંને મુખ્ય આરોપીઓની અટકાયત કરી જેલભેગા કર્યા છે અને પૂજાબેન તથા તેમના કાકાનો દીકરો આ કેસના મુખ્ય સાક્ષી છે. આ અદાવત રાખીને આરોપીઓના પરિવારે સાક્ષી પર દબાણ વધાર્યું છે:

• પ્રથમ ધમકી (દોઢ-બે મહિના પહેલાં): પૂજાબેન તેમના ફોઈ-સાસુ સાથે કેવલ ચોકડી વડસર ખાતે શાકભાજી લે ગયા ત્યારે કરણ મારવાડીના પિતા પન્નાલાલ મારવાડીએ કેસ પાછો ખેંચી લેવા દબાણ કરી તને, મેહુલને અને દીકરીને ઉઠાવી જવાની ધમકી આપી હતી.
• બીજી ધમકી (10-15 દિવસ પહેલાં): વડસર ગામ પાછળના ગોચરમાં દારૂનો ધંધો કરતો કરણ મારવાડીનો કાકા અર્જુન પુનમભાઈ મારવાડીએ મેહુલની હાજરીમાં પતિની જેમ જ મારી નાખવાની અને છોકરીને ઉઠાવી જવાની ચીમકી આપી હતી.
• ત્રીજી ધમકી (એક અઠવાડિયા પહેલાં): કેવલ ચોકડી બ્રીજ પાસે કરિયાણાની દુકાને ખરીદી કરતી વખતે રવિ મણીલાલ વાઘેલા (રહે. ખોડીયાનગર, વડોદરા) એ પણ ફોઈ-સાસુની હાજરીમાં ફરિયાદ પાછી નહીં ખેંચે તો પતિની જેમ જ મારી નાખવાની ધમકી આપી હતી.

👉આ તમામ માથાભારે શખ્સોના ત્રાસ અને ખુલ્લી ધમકીઓને કારણે પૂજાબેન અને તેમનો પરિવાર હાલ અત્યંત ભયના વાતાવરણમાં જીવન જીવી રહ્યો છે.