- રૂ. 63.55 લાખની મસ્તમોટી ઠગાઈ: પાલિકાના નકલી અધિકારી બની સુભાનપુરા અને ગોરવા PM આવાસ યોજનામાં ફ્લેટ-દુકાનો અપાવવાના નામે લાખો રૂપિયા પડાવ્યા.
- નકલી દસ્તાવેજ અને બોગસ સીલ: આરોપીઓએ VMC અને સબ રજિસ્ટ્રાર કચેરીના નકલી સિક્કાઓ તથા બોગસ પહોંચો બનાવી છેતરપિંડી આચરી.
- બે આરોપીઓ 3 દિવસના રિમાન્ડ પર: ગોરવા પોલીસે રોહન સોલંકી અને કશ્યપ જોષીની અટકાયત કરી વધુ પૂછપરછ હાથ ધરી.
- જીલ બારોટ સહિત 3 વોન્ટેડ: કૌભાંડમાં સંડોવાયેલા જીલ બારોટ, અશોક બારોટ અને શુભમ મહાવરને ઝડપી પાડવા પોલીસે તપાસ તેજ કરી.
વડોદરા શહેરમાં પ્રધાનમંત્રી આવાસ યોજનામાં સસ્તા ભાવે ફ્લેટ અને દુકાનો અપાવવાના નામે નાગરિકો સાથે લાખો રૂપિયાની છેતરપિંડી આચરતી એક શાતિર ટોળકીનો ગોરવા પોલીસ દ્વારા પર્દાફાશ કરવામાં આવ્યો છે. વડોદરા મહાનગરપાલિકાના અધિકારીઓ અને કર્મચારીઓ તરીકેની ખોટી ઓળખ આપીને અરજદારો પાસેથી રૂ. 63,55,00/- ની માતબર રકમ પડાવી લેનાર ઠગ ટોળકીના બે આરોપીઓને પોલીસે દબોચી લીધા છે.
પોલીસ સૂત્રો પાસેથી મળતી વિગતો અનુસાર, આરોપીઓ કશ્યપ જોષી, જીલ બારોટ, અશોક બારોટ, રોહન સોલંકી અને શુભમ મહાવરે ફેબ્રુઆરી 2024 થી પૂર્વ આયોજિત કાવતરું રચ્યું હતું. તેઓએ સુભાનપુરા ખાતે આવેલી ‘ઝાંસી રાણી હાઉસિંગ’ (TP-1, FP-105) માં ફ્લેટ નં. C-203 તથા નીચે આવેલી દુકાન નં. 2, 3, 4, 5 અને 11, તેમજ ગોરવા (TP-10, FP-128) માં આવેલી દુકાન નં. 19, 22, 23, 16, 21 અપાવવાનો વિશ્વાસ આપ્યો હતો. આ મકાન અને દુકાનોના નામે ટુકડે-ટુકડે કુલ રૂ. 63.55 લાખ મેળવી લીધા હતા.
આરોપીઓએ પોતાના કબજામાં વડોદરા મહાનગરપાલિકા તથા સબ રજિસ્ટ્રાર કચેરીના ખોટા અને બનાવટી સિક્કાઓ રાખ્યા હતા. તેના આધારે નકલી બાનાખત, બનાવટી વેચાણ દસ્તાવેજો અને રજિસ્ટ્રેશન કર્યાની બોગસ પહોંચો બનાવીને સાચી તરીકે આપી વિશ્વાસઘાત કર્યો હતો. ભોગ બનનારાઓએ મકાન-દુકાનનો કબજો ન મળતા નાણાં પરત માંગ્યા ત્યારે આરોપીઓએ જાનથી મારી નાખવાની ધમકીઓ આપી હતી. આ અંગે ગોરવા પોલીસ મથકે ભારતીય ન્યાય સંહિતા (BNS 2023) ની વિવિધ ગંભીર કલમો હેઠળ ગુનો નોંધાયો હતો.
પોલીસ કમિશનર નરસિમ્હા કોમાર અને ઉચ્ચ પોલીસ અધિકારીઓની સૂચનાથી ગોરવા પી.આઈ. કે.એન. લાઠીયા અને તેમની ટીમે ત્વરિત કાર્યવાહી કરીને કૌભાંડમાં સંડોવાયેલા આરોપી રોહન લક્ષ્મણસિંહ સોલંકી (રહે. સુભાનપુરા) અને કશ્યપ રાકેશકુમાર જોષી (રહે. વાઘોડિયા રોડ) (વડોદરા જીલ્લા ભાજપ સંગઠનના કાર્યાલય મંત્રી રાકેશભાઈ જોશીના પુત્ર )ની અટકાયત કરી કોર્ટમાંથી ૩ દિવસના રિમાન્ડ મેળવ્યા છે. જ્યારે આ કૌભાંડના મુખ્ય આરોપીઓ પૈકી જીલ અશોક બારોટ, અશોક બારોટ અને શુભમ મહાવરને વોન્ટેડ જાહેર કરી પોલીસે તેમની શોધખોળના ચક્રો ગતિમાન કર્યા છે.
અત્રે ઉલ્લેખનીય છે કે, આવાસ અપાવવાના નામે હજી અનેક લાભાર્થીઓ પાસેથી રૂપિયા પડાવ્યા હોવાની વિગતો ધીમે ધીમે સામે આવી રહી છે. બે દિવસ પહેલા કપુરાઈ પોલીસ મથકમાં નોંધાયેલી ફરિયાદ અને હવે ગોરવા પોલીસ મથકમાં નોંધાયેલી ફરિયાદ બાદ આ ઠગ ટોળકી દ્વારા છેતરાયેલા અન્ય લોકો પણ જાગૃત થયા છે. આવનારા સમયમાં આ લાખોની છેતરપિંડીનો આંકડો વધે તો નવાઈ નહિ!
