ગ્રાહકે આરોગ્ય સાથે ચેડા થતા બનાવ્યો વીડિયો: સેવઉસળની ડિશમાંથી જીવાત અને વંદો મળતા ગ્રાહક ચોંકી ઉઠ્યા

• સેવઉસળમાં વંદો: સુભાનપુરાની મહાકાળી સેવઉસળમાં ગ્રાહકને આપેલી લીલી ડુંગળીમાંથી જીવાત અને વંદો મળી આવ્યો.
• સંચાલકોની બેદરકારી: ગ્રાહકે રજૂઆત કરતા દુકાન સંચાલકો દ્વારા યોગ્ય જવાબ આપવાને બદલે ઉડાઉ વર્તન કરાયું.
• વીડિયો વાયરલ: ગ્રાહકે સમગ્ર ઘટનાનો વીડિયો બનાવી સોશિયલ મીડિયા પર વાયરલ કરતા ફૂડ સેફ્ટી સામે સવાલો ઉભા થયા.
• તંત્ર સમક્ષ માંગ: નાગરિકોના સ્વાસ્થ્ય સાથે ચેડા કરતા આવા ધેટકો સામે VMC ની ફૂડ શાખા દ્વારા કડક તપાસ કરવામાં આવે તેવી માંગ.

વડોદરા: વડોદરા શહેરના પોશ વિસ્તાર ગણાતા સુભાનપુરામાંથી ખાણીપીણીના શોખીનોને ચોંકાવી દે તેવી ઘટના સામે આવી છે. સુભાનપુરામાં આવેલી જાણીતી ‘મહાકાળી સેવઉસળ’ની દુકાનમાં ગ્રાહકને પીરસવામાં આવેલી સેવઉસળની ડિશમાંથી વંદો અને જીવાત નીકળતા ભારે હડકંપ મચી ગયો છે. અખાદ્ય ચીજવસ્તુઓ પીરસવાની આ ઘટનાનો વીડિયો હાલ સોશિયલ મીડિયા પર વાયરલ થઈ રહ્યો છે.

❓શું હતી ઘટના?

પ્રાપ્ત વિગતો અનુસાર, એક ગ્રાહક સુભાનપુરા સ્થિત આ મહાકાળી સેવઉસળની દુકાને નાસ્તો કરવા ગયા હતા. તેઓ સેવઉસળ આરોગી રહ્યા હતા, તે દરમિયાન તેની સાથે આપવામાં આવેલી લીલી ડુંગળીમાં અચાનક એક મરેલો વંદો નજરે પડ્યો હતો. આ દ્રશ્ય જોઈને ગ્રાહક દંગ રહી ગયા હતા અને તાત્કાલિક સમગ્ર ઘટનાનો મોબાઈલમાં વીડિયો બનાવી લીધો હતો.

🧐સંચાલકોનો ઉડાઉ જવાબ અને ગ્રાહકનો રોષ:

ગ્રાહક દ્વારા આ અંગે દુકાન સંચાલકને ગંભીર રજૂઆત કરવામાં આવી હતી. જોકે, સંચાલકે પોતાની ભૂલ સ્વીકારવાને બદલે ઉડાઉ અને બેજવાબદાર જવાબ આપ્યો હોવાનો ગ્રાહકે આક્ષેપ કર્યો છે. આ ઘટનાથી નારાજ થઈને ગ્રાહકે વીડિયો સોશિયલ મીડિયા પર વાયરલ કરી દીધો હતો.

🗣️ફૂડ સેફ્ટી સામે સવાલો:

શહેરમાં ખાણીપીણીની હોટલો અને લારી-ગલ્લાઓ પર સ્વચ્છતાના ધજાગરા ઉડતા હોવાની ફરિયાદો અવારનવાર સામે આવતી હોય છે. સેવઉસળ જેવી લોકપ્રિય વાનગીમાં વંદો નીકળવાની આ ઘટના બાદ વડોદરા મ્યુનિસિપલ કોર્પોરેશન (VMC) ની ફૂડ એન્ડ સેફ્ટી શાખા દ્વારા આવી હોટલો અને દુકાનો સામે લાલ આંખ કરી સ્થળ તપાસ કરવામાં આવે અને કાયદેસરની કાર્યવાહી થાય તેવી પ્રબળ માંગ ઉઠી છે.