સહકારી ક્ષેત્રમાં ભાજપની હાલત દયનીય,એક તરફ નોટીસ અને બીજી તરફ બોર્ડને મેન્ડેટ!

• વહીવટમાં ક્ષતિઓ હોવાના 6 કારણો સાથે રાજ્ય સહકાર વિભાગે ડેરીના પ્રમુખ,ઉપપ્રમુખ અને એમ.ડીને નોટીસ ફટકારી
• બીજી બાજુ જુના બોર્ડમાં રહેલા ડીરેક્ટરોને હાલની ચુંટણીમાં મૌખિક રીતે મેન્ડેટ આપવા પડ્યા
• સાંપે છછુંદર ગળ્યા જેવો ઘાટ, પ્રમુખ-ઉપપ્રમુખ ભ્રષ્ટ હોય તો જુના બોર્ડના સભ્યોને મેન્ડેટ કેમ?

રાજકીય એનકાઉન્ટર માટે ઉપયોગમાં આવતા સહકારી હથિયારોનો હાલ રાજકીય યુદ્ધમાં મિસાઈલની જેમ ઉપયોગ થઇ રહ્યો છે. જોકે ભાજપ સમર્પિત બોર્ડ પર થયેલા નોટીસ હુમલા બાદ ભાજપ સંગઠનની હાલત દયનીય થવા પામી છે. એક તરફ પ્રમુખ-ઉપપ્રમુખને ભ્રષ્ટ સાબિત કરવા માટે ધમપછાડા થઇ રહ્યા છે ત્યારે તેઓની ટીમના સભ્યોને જ છાની છુપી રીતે ભાજપ દ્વારા મેન્ડેટ આપવામાં આવી રહ્યા છે. જીલ્લા સંગઠનને પ્રદેશ સંગઠન પાસે હવે સાર્વજનિક સ્થિતિમાં લેખિત મેન્ડેટ જાહેર કરવાની શક્તિ પણ રહી નથી તેવું ફલિત થઇ રહ્યું છે!

બરોડા ડેરીની ચુંટણીમાં સહકારી વગદારો સામે ધારાસભ્યોની લડાઈ જગજાહેર છે. જોકે આ લડાઈમાં સહકારી નિયમોથી અજાણ ટુકડી આ વખતે પણ ફાવી નથી. તેનું ઉદાહરણ બિનહરીફ થયેલી બેઠકો પરથી મેળવી શકાય છે. ભાજપ મેન્ડેટ આપશે તેવી ઈચ્છા સાથે કવાંટ, પાદરા,વાઘોડિયા, બોડેલી,કરજણ,સંખેડા,સાવલી,ડેસર સહિતના ઝોન માંથી ડેરીના હયાત ડીરેક્ટરો સામે ઉમેદવારી ફોર્મ ભરવામાં આવ્યા હતા. જોકે આ ઉમેદવારી ફોર્મ માંથી મોટા ભાગના ફોર્મ સાધનીક ક્ષતિ અને અયોગ્યતાને કારણે નામંજૂર થયા છે. જે ઉમેદવારી ફોર્મ મંજુર થયા હતા. તે ઉમેદવારો પણ “ભાજપ મેન્ડેટ આપે તો ચુંટણી લડીએ” તેવી તૈયારી સાથે બેઠા હતા.

હવે ભાજપ દ્વારા મેન્ડેટ જાહેર કરતા પહેલા જ સહકારી કાયદાની કલમ 76(B) હેઠળ પ્રમુખ-ઉપપ્રમુખ અને એમ.ડીને નોટીસ આપવામાં આવી છે. અને 13 માર્ચે સુનાવણીમાં હાજર રહેવા જણાવાયું છે. જોકે હાલની ચુંટણીમાં પ્રમુખ-ઉપપ્રમુખ સહીત 7 ઉમેદવારોને ભાજપ મેન્ડેટ આપે તે પહેલા જ બિનહરીફ થઇ જતા ભાજપના મેન્ડેટની જરૂર લાગતી નથી. 13ના બોર્ડમાં 7 બિનહરીફ હોય ત્યારે સંભવતઃ ભાજપના મેન્ડેટની રાહ જોવાની રહેતી નથી. જોકે ભાજપ પાસે પણ હાલના તબક્કે જુના ડીરેક્ટર સિવાય અન્ય કોઈ સક્ષમ ઉમેદવાર ન હોવાને કારણે ગુપસુપ રીતે ફોન કરીને ઉમેદવારોને મેન્ડેટ આપી દીધાની જાણ કરવામાં આવી રહી છે. મહત્વનું છે કે, જે પ્રમુખ –ઉપપ્રમુખ પર ગેરરીતીના આક્ષેપોની નોટીસ આપવામાં આવી છે. તેઓની અધ્યક્ષતાના સમગ્ર બોર્ડ પર આગામી દિવસોમાં નોટીસ આપવાની કાર્યવાહી થશે. જેથી ભાજપ સંગઠન ઉમેદવાર નક્કી તો કરે છે, પણ તેઓના માથે લેખિતમાં ભાજપનો સિક્કો ન વાગી જાય તેની તકેદારી રાખીને ટેલીફોનીક જાણ પણ કરી રહ્યા છે.

✍️લેખિત મેન્ડેટ આપે તો સાંપે છછુંદર ગળ્યા જેવો ઘાટ સર્જાય!

ભાજપ સામે બાયો ચઢાવીને સહકારી રાજકારણમાં ચમકેલા બરોડા ડેરીના હાલના પ્રમુખ દિનેશ પટેલ ઉર્ફે દીનુમામા સહીત તેઓની નજીકના 7 ડીરેક્ટર બિનહરીફ થઇ ગયા છે. ભાજપ દ્વારા સંસ્થાની ચુંટણીમાં મેન્ડેટ આપવામાં આવે તો લેખિત મેન્ડેટમાં તમામ ઝોનના ભાજપ સમર્થિત ઉમેદવારોના નામ જાહેર કરવા પડે. જેમાં પાદરા, નસવાડી , કવાંટ, બોડેલી, સંખેડા,વાઘોડિયાના પણ નામો જાહેર કરવા પડે ! જોકે ભાજપના આંતરિક રાજકીય યુદ્ધમાં જયારે 76(B)ની નોટીસ મારફતે પ્રહાર થયો હોય ત્યારે જેને સરકારી કાગળમાં ભ્રષ્ટ સાબિત કરવાના પ્રયત્નો થયા છે તમને ભાજપના “શ્વેતપત્રમમાં” પ્રમાણિક કેવી રીતે સાબિત કરવા તે અસમંજસ છે. જોકે ભાજપની પણ મજબૂરી છે કે, જ્યાં ચુંટણી યોજવાની છે ત્યાં જુના ડીરેક્ટરો માંથી એકાદીને છોડીને બધા જ ઉમેદવારોને સ્વીકારવા પડે તેમ છે!

🧐રાજકીય શેખચીલ્લીઓએ નોટીસની ક્રેડિટ લીધી,પણ મેન્ડેટ અપાવી ન શક્યા

કરજણ ઝોનમાં પૂર્વ ધારાસભ્ય સતીષ પટેલ વિરુદ્ધ ઉમેદવારી કરનાર જયદીપસિંહ ચૌહાણને મેન્ડેટ મળે તે માટે અનેક પ્રયત્નોથી થયા હતા. ધારાસભ્ય પણ તેઓને મેન્ડેટ મળે તે પક્ષમાં હતા. જોકે ગત રોજ નોટિસ મળ્યા બાદ કેતન ઇનામદારે પર પાડેલા ઓપરેશનની ક્રેડિટ લેવા માટે એક રાજકીય અગ્રણીએ અથાગ પ્રયત્નો કર્યા હતા. જોકે બનાવના 12 કલાક બાદ પણ કરજણ ઝોનમાં જયદીપસિંહને મેન્ડેટ અપાવવામાં સફળતા મેળવી ન હતી.