ગંદકી કરનારા સાવધાન! સયાજી હોસ્પિટલના ઇમરજન્સી વોર્ડમાં ‘વન પેશન્ટ, વન રિલેટિવ’નો કડક અમલ

વડોદરા:મધ્ય ગુજરાતની સૌથી મોટી ગણાતી સયાજી હોસ્પિટલના તંત્ર દ્વારા દર્દીઓની સુવિધા અને હોસ્પિટલની સ્વચ્છતા જાળવવા માટે એક મહત્વનો નિર્ણય લેવામાં આવ્યો છે. હોસ્પિટલના તાત્કાલિક સારવાર વિભાગ (Casualty) માં હવે ઇજાગ્રસ્ત દર્દી સાથે માત્ર એક જ સંબંધીને પ્રવેશ આપવામાં આવશે, અને તે પણ સઘન ચેકિંગ બાદ જ.

❓કેમ લેવાયો આ નિર્ણય?

​સયાજી હોસ્પિટલમાં ગુજરાત ઉપરાંત રાજસ્થાન અને મધ્યપ્રદેશથી પણ મોટી સંખ્યામાં દર્દીઓ સારવાર માટે આવે છે. ઘણીવાર એક દર્દી સાથે આખું ટોળું હોસ્પિટલના ઇમરજન્સી વોર્ડમાં ધસી આવતું હોય છે, જેના કારણે:

• ​વારંવાર ભીડ થવાથી ગંભીર દર્દીઓની સારવારમાં અવરોધ ઊભો થાય છે.
• ​પરિવારજનો સાથે લાવેલા પાન, પડીકી કે ગુટકા ખાઈને હોસ્પિટલની દીવાલો અને ફર્શ પર પિચકારીઓ મારી ગંદકી ફેલાવતા હોવાનું તંત્રના ધ્યાન પર આવ્યું હતું.

🧐સિક્યુરિટી ગાર્ડ દ્વારા અંગઝડતી

​હોસ્પિટલના RMO દ્વારા અપાયેલી મૌખિક સૂચના બાદ, સિક્યુરિટી ગાર્ડ્સ હવે એક્શન મોડમાં છે:

1. વન પેશન્ટ, વન રિલેટિવ: ઇમરજન્સીમાં આવતા દર્દી સાથે માત્ર એક જ વ્યક્તિને અંદર જવા દેવા માટે કડક અમલ શરૂ કરાયો છે.
2. પાન-ગુટકા પર પ્રતિબંધ: અંદર પ્રવેશતા પહેલા દરેક વ્યક્તિનું સઘન ચેકિંગ કરવામાં આવે છે. જો કોઈના ખિસ્સામાંથી પાન-મસાલા કે ગુટકા મળી આવે, તો સિક્યુરિટી ગાર્ડ દ્વારા તે તુરંત જપ્ત કરી તેનો નાશ કરવામાં આવે છે.

👉સ્વચ્છતા માટે કડક વલણ

હોસ્પિટલ તંત્રના આ નિર્ણયથી ઇમરજન્સી વોર્ડમાં ખોટી ભીડ ઓછી થશે અને હોસ્પિટલની સુંદરતા જળવાઈ રહેશે. સિક્યુરિટી ગાર્ડ્સના જણાવ્યા અનુસાર, આરએમઓ (RMO) દ્વારા સ્પષ્ટ સૂચના અપાઈ છે કે હોસ્પિટલ પરિસરમાં ગંદકી ફેલાવનાર તત્વોને કોઈપણ સંજોગોમાં ચલાવી લેવામાં આવશે નહીં.