વડોદરા શહેરમાં ગત મોડી રાત્રે ખેલાયો ખૂની ખેલ મિત્રએ મિત્રની કરી હત્યા

વડોદરા શહેરની દિવાળીપુરા કોર્ટની સામે ગતરાત્રીના હત્યાની ઘટના બનતા ચકચાર મચી જવા પામી હતી. બે મિત્રો વચ્ચે સામાન્ય બોલાચાલી થતાં મિત્ર એ જ મિત્રને ચાકુના ધા ઝીંકીને મિત્રની હત્યા કરી નાખી સમગ્ર મામલે અકોટા પોલીસ દ્વારા ગણતરીની મિનિટોમાં જ સગીર આરોપીની ધરપકડ કરી વધુ તપાસ હાથ ધરી છે.

આ અંગે પ્રાપ્ત માહિતી અનુસાર, દિવાળીપુરા કોર્ટની સામે નિસર્ગ કોમ્પ્લેક્ષ નજીક ગતરોજ મોડી રાત્રે 19 વર્ષીય દિશાંત રાજપૂત નામના યુવકની તેના જ સગીર મિત્ર દ્વારા હત્યા કરી દેવામાં આવી હતી. દિશાંત રાજપૂત અને તેના મિત્ર વચ્ચે કોઈક વાતને લઈને બોલાચાલી થઇ ગઈ હતી. જેમાં આવેશમાં આવીને સગીર મિત્રએ પોતાના જ મિત્ર દિશાંત રાજપૂતને ચાકુના ધા ઝીંકી મોતને ઘાટ ઉતારી દીધો હતો. અને હત્યા કર્યા બાદ હત્યારો મિત્ર ઘટનાસ્થળે થી નાસી છૂટ્યો હતો.

આ ઘટનાની જાણ અકોટા પોલીસને થતા પોલીસનો કાફલો તાત્કાલિક ઘટના સ્થળે આવ્યો હતો અને તપાસ હાથ ધરી અકોટા પોલીસે ગણતરીની મિનિટોમાં જ ફરાર થયેલા આરોપીની ધરપકડ કરી લીધી હતી. પોલીસની પ્રાથમિક તપાસમાં મિત્રની હત્યા પાછળનું કારણ યુવતી સાથે ના સંબંધ હોવાનું સામે આવ્યું હતું પોલીસે હાલ વધુ તપાસ હાથ ધરી છે