68 વર્ષીય વૃદ્ધ યુવતીના સંપર્કમાં આવ્યા અને થયા હનીટ્રેપના શિકાર, 7 લાખ ગુમાવ્યા

ફેસબુક પર ફ્રેન્ડ રીક્વેસ્ટ આવી અને યુવતી સાથે મેસેજ પર વાત કરીને માલસર રોડ પર મળવા બોલાવી

• યુવતી સાથે વૃદ્ધ  બેઠા હતા તે સમયે કારમાં આવેલા શખ્સોએ પોલીસની ઓળખ આપી વૃદ્ધનું અપહરણ કર્યું
• ડ્રગ્સ કેસમાં સંડોવાયેલી યુવતીના સંપર્કમાં છો, તેમ કહીને બેરર ચેક લખાવીને 7 લાખ રૂપિયા કઢાવી લીધા
• શિનોર પોલીસે યુવતી સહીત આરોપીઓ વિરુદ્ધ ગુન્હો નોંધીને એકની ધરપકડ કરી

વડોદરા શહેરના વારસિયા રીંગ રોડ પર રહેતા 68 વર્ષીય વૃદ્ધને  અજાણી યુવતી અને તેના સાથીઓ દ્વારા ફેસબુક મારફતે ફસાવીને મળવા બોલાવ્યા બાદ ડ્રગ્સ કેસમાં સંડોવી દેવાની ધમકી આપીને વૃદ્ધ પાસેથી 7 લાખની રકમનો બેરર ચેક મેળવી લઈને રૂપિયા ઉપાડીને પલાયન થઇ જનાર ટોળકી સામે શિનોર પોલીસ મથકે ફરિયાદ આપવામાં આવી છે.જયારે પોલીસે સમગ્ર પ્રકરણમાં એક આરોપીની ધરપકડ કરી છે.

તાજેતરમાં જ કાયાવરોહણમાં સાયબર ઠગાઈનો શિકાર બનેલા વૃદ્ધે જીવન ટુકાવી દીધું હોવાની ઘટના બની હતી. જે બાદ પોલીસે ઓનલાઈન કોઈ પણ પ્રકારના ફ્રોડમાં ન ફસાવવા માટે જાગૃતતા ફેલાવી હતી. તેમ છતાંય વડોદરાના 68 વર્ષીય વૃદ્ધ મહિલાના સંપર્કમાં આવીને હનીટ્રેપમાં ફસાયા હોવાનો કિસ્સો સપાટી પર આવ્યો છે. વારસિયા રીંગ રોડ પર રહેતા 68 વર્ષીય વૃદ્ધને  એક દિવસ અચાનક ફેસબુક પર પીન્કી પટેલ નામની યુવતીની ફ્રેન્ડ રીક્વેસ્ટ આવી, વૃદ્ધ ફરિયાદીએ ફ્રેન્ડ રીક્વેસ્ટ મંજુર કરીને યુવતી સાથે ફેસબુક મેસેન્જર મારફતે ચેટ શરુ કરી હતી. ચેટમાં વાતચીત કર્યા બાદ બંનેએ પોતાના મોબાઈલ નંબરની આપલે કરી હતી.

ગત 2 ડિસેમ્બરે યુવતી વૃદ્ધ ફરિયાદીને મળવા માટે વડોદરા આવી હતી જે બાદ ફરિયાદી અને યુવતી એકટીવા પર માલસર, શિનોર ગયા હતા. જ્યાંથી તેઓ પરત આવતા હતા તે સમયે શિનોરથી આગળ ગરનાળા પાસે બેઠા હતા તે સમયે કેટલાક ઈસમો સફેદ રંગની ફોર વ્હીલર કારમાં આવી પહોચ્યા હતા અને તેઓ હિંમતનગરથી આવ્યા છે અને પોલીસ તરીકેની ઓળખ આપી હતી.

વૃદ્ધ ફરિયાદીને ધમકાવીને જણાવ્યું હતું કે, તેઓ જે યુવતી સાથે બેઠા છે તે યુવતી ડ્રગ કેસમાં ફસાયેલી છે. એટલે તમે પણ ડ્રગ્સ કેસમાં અંદર જશો તેમ કહીને વૃદ્ધને કારમાં બેસાડીને એક વ્યક્તિ તેમનું મોપેડ લઈને પાછળ આવતો હતો.  વડોદરા તરફ આવતા સમયે ડ્રગ્સના કેસમાં  ફસાવી દેવાની ધમકી આપીને  સમાધાન કરવા પેટે ઠગ ટોળકીએ 9 લાખ રૂ.ની માંગણી કરી હતી. વૃદ્ધ ફરિયાદી ગભરાઈ જતા 7 લાખ રૂ. આપવા તૈયાર થઇ ગયા હતા. પોલીસના સ્વાંગમાં આવેલી ટોળકી વૃદ્ધ ફરિયાદીને તેમની ઘરે લઇ ગયા હતા. અને 7 લાખ રૂ.નો બેરર ચેક મેળવીને બેંકમાં જઈને રૂપિયા ઉપાડી લીધા હતા. અને જો કોઈને જાણ કરી તો પરિવારને જાનથી મારી નાખવાની ધમકી આપી હતી.

સમગ્ર ઘટના અંગે શિનોર પોલીસે અપહરણ, ખંડણી સહિતના ગુન્હાહિત કાવતરા અંગે ફરિયાદ નોંધીને એક આરોપી હાર્દિક કનૈયાલાલ શેઠ, રહે નરોડા, અમદાવાદની ધરપકડ કરીને ગુન્હામાં સંડોવાયેલા અન્ય આરોપીઓની શોધખોળ હાથ ધરી છે.