ગેસ સિલિન્ડરની વહેલી ડિલિવરી જોઈએ છે? લાલચમાં આવતા પહેલા વાંચજો આ સમાચાર, ખાતું થઈ શકે છે સાફ.

સાવધાન! ગેસ સિલિન્ડરના નામે થઈ રહી છે મોટી ઠગી

• ​ગેસની અછતનો ફાયદો ઉઠાવતા સાયબર ઠગ: LPG યુઝર્સને નિશાન બનાવી ખાતા કરવામાં આવે છે સાફ.
• ​સોશિયલ મીડિયા અને WhatsApp પર નકલી એડનો રાફડો: ‘ત્વરિત ડિલિવરી’ની લાલચ આપી ખેલાય છે ખેલ.
• ​ઓનલાઇન પેમેન્ટ કરતા પહેલા સો વાર વિચારજો: અસલી દેખાતી નકલી વેબસાઇટ્સથી છેતરાઈ રહ્યા છે લોકો.

દુનિયાના વિવિધ ભાગોમાં ચાલી રહેલા યુદ્ધની અસર હવે માત્ર સરહદો સુધી સીમિત નથી રહી, પણ તમારા રસોડા સુધી પહોંચી છે. યુદ્ધને કારણે ગેસની અછત સર્જાવાની અફવાઓ અને ભયનો ફાયદો ઉઠાવીને હવે સાયબર અપરાધીઓ સક્રિય થયા છે. જો તમને પણ મોબાઈલ પર ગેસ સિલિન્ડરના બુકિંગ કે વહેલી ડિલિવરી માટે કોઈ મેસેજ આવે, તો સાવધ થઈ જજો, કારણ કે તમારી એક ભૂલ તમારા બેંક ખાતાને ખાલી કરી શકે છે.

🧐સ્કેમની મોડસ ઓપરેન્ડી (રીત):

આ સાયબર ઠગ મુખ્યત્વે ત્રણ તબક્કામાં લોકોને પોતાનો શિકાર બનાવે છે:

1. નકલી જાહેરાતો: Facebook, Instagram અને Google પર ઠગબાજો આકર્ષક જાહેરાતો મૂકે છે. જેમાં દાવો કરવામાં આવે છે કે “અત્યારે બુક કરો અને બીજા જ દિવસે હોમ ડિલિવરી મેળવો.”
2. નકલી વેબસાઇટ્સ: જ્યારે તમે આ લિંક પર ક્લિક કરો છો, ત્યારે એક વેબ પેજ ખુલે છે જે અદ્દલ અસલી ગેસ એજન્સી જેવું જ દેખાય છે. અહીં તમારી પર્સનલ વિગતો અને બેંકિંગ ડિટેલ્સ માંગવામાં આવે છે.
3. ડર અને ઉતાવળ: ઠગબાજો મેસેજમાં લખે છે કે, “જો અત્યારે બુકિંગ નહીં કરો તો સ્ટોક પૂરો થઈ જશે અને સિલિન્ડર બીજાને આપી દેવાશે.” આ ડરને કારણે લોકો ઉતાવળમાં ઓનલાઇન પેમેન્ટ કરી દે છે અને છેતરાય છે.

❓કેવી રીતે બચશો?

• સત્તાવાર એપનો જ ઉપયોગ કરો: હંમેશા કંપનીની ઓફિશિયલ એપ કે વેબસાઈટ પરથી જ બુકિંગ કરો.
• અજાણી લિંકથી દૂર રહો: WhatsApp કે SMS માં આવતી શંકાસ્પદ લિંક પર ક્લિક કરવાનું ટાળો.
• ડિજિટલ પેમેન્ટમાં સાવધાની: અજાણી વ્યક્તિ કે અનવેરિફાઇડ વેબસાઇટ પર ક્યારેય UPI પિન કે બેંકિંગ પાસવર્ડ નાખવો નહીં.

🫵યાદ રાખો, ગેસ એજન્સીઓ ક્યારેય આ પ્રકારે સોશિયલ મીડિયા પર મેસેજ મોકલીને ઉતાવળે પેમેન્ટ માંગતી નથી. તમારી જાગૃતિ જ તમને સાયબર ઠગાઈથી બચાવી શકે છે. જો તમે પણ આવી ઠગાઈનો ભોગ બનો, તો તુરંત જ સાયબર હેલ્પલાઈન નંબર 1930 પર સંપર્ક કરો.