હોર્મુઝની ખાડીમાં ભીષણ જંગ: UAE ના ઓઈલ ટેન્કરો પર ક્રૂઝ મિસાઈલથી હુમલામાં ભારતીય ક્રૂ મેમ્બરનું મોત

• મિસાઈલ હુમલો: હોર્મુઝની ખાડીમાં UAE ના બે ઓઈલ ટેન્કરો ‘મોમ્બાસા’ અને ‘અલ બાહિયા’ નિશાન બન્યા.
• ભારતીય નાગરિકનું મૃત્યુ: એક ભારતીયનું મોત અને કુલ 6 ભારતીય ક્રૂ મેમ્બર્સ ઈજાગ્રસ્ત.
• વૈશ્વિક અસર: આ ઘટનાથી મધ્ય-પૂર્વમાં યુદ્ધનું જોખમ વધ્યું અને વૈશ્વિક બજારમાં અસ્થિરતા સર્જાઈ.
• કડક ચેતવણી: UAE દ્વારા આંતરરાષ્ટ્રીય કાયદાના ઉલ્લંઘન બદલ આક્રોશ વ્યક્ત, કોઈપણ સૈન્ય પડકાર માટે તૈયારી દર્શાવી.

વૈશ્વિક સમાચાર: વૈશ્વિક ઉર્જા સપ્લાયની ધમની ગણાતી હોર્મુઝની ખાડી ફરી એકવાર યુદ્ધના મેદાનમાં ફેરવાઈ છે. અમેરિકા અને ઈરાન વચ્ચેના વધતા તણાવની સીધી અસર હવે નિર્દોષ નાગરિકો અને સમુદ્રી વ્યાપાર પર પડી રહી છે. સંયુક્ત અરબ અમીરાત (UAE) ના બે ઓઈલ ટેન્કરો પર ક્રૂઝ મિસાઈલથી થયેલા હુમલાએ આંતરરાષ્ટ્રીય સ્તરે ખળભળાટ મચાવી દીધો છે.

🔥હુમલાની ભયાનકતા:

UAE ના સંરક્ષણ મંત્રાલયના સત્તાવાર અહેવાલ મુજબ, ‘Mombasa’ અને ‘Al Bahiyah’ નામના બે તેલ ટેન્કરો ઓમાનના સમુદ્રમાં પસાર થઈ રહ્યા હતા, ત્યારે ઈરાન તરફથી છોડવામાં આવેલી ક્રૂઝ મિસાઈલોએ તેમને નિશાન બનાવ્યા હતા. મિસાઈલના સીધા હુમલાથી બંને જહાજોમાં ભીષણ આગ લાગી હતી. જોકે, ક્રૂ મેમ્બર્સની સમયસૂચકતાને કારણે આગ પર કાબૂ મેળવી લેવાયો હતો, જેનાથી એક મોટી સમુદ્રી હોનારત ટળી ગઈ છે.

🇮🇳ભારતીય નાગરિકો માટે આઘાતજનક સમાચાર:

આ હુમલામાં સૌથી વધુ ભોગ ભારતીય ક્રૂ મેમ્બર્સ બન્યા છે. ‘મોમ્બાસા’ જહાજ પર ફરજ બજાવતા એક ભારતીય નાગરિકનું ઘટનાસ્થળે જ દુઃખદ મૃત્યુ નીપજ્યું છે. આ ઉપરાંત, કુલ 8 ઈજાગ્રસ્તોમાંથી 6 ભારતીય નાગરિકો છે, જેમાંથી 4 ની હાલત અત્યંત ગંભીર હોવાનું જાણવા મળી રહ્યું છે. બાકીના 2 ઈજાગ્રસ્તો યુક્રેનિયન નાગરિકો છે.

🌍આંતરરાષ્ટ્રીય આક્રોશ:

UAE ના સંરક્ષણ મંત્રાલયે આ હુમલાને આંતરરાષ્ટ્રીય કાયદાનું ઘોર ઉલ્લંઘન ગણાવીને આક્રોશ વ્યક્ત કર્યો છે. તેમણે સ્પષ્ટ ચેતવણી આપી છે કે પ્રાદેશિક સ્થિરતાને નુકસાન પહોંચાડનારા તત્વોને જડબાતોડ જવાબ આપવા માટે UAE સંપૂર્ણપણે સજ્જ છે. દરમિયાન, બ્રિટનની મેરીટાઇમ ટ્રેડ ઓપરેશન્સ એજન્સીએ પણ ઓમાન નજીક વધુ એક ટેન્કર પર હુમલાનો અહેવાલ આપ્યો છે, જેનાથી વૈશ્વિક બજારોમાં પણ ચિંતાનું મોજું ફરી વળ્યું છે.