મોટો ફેરફાર: હવે સબસિડી માટે ‘જાતે’ નહીં કહેવું પડે, સરકાર સીધો ડેટા ઉપાડીને બંધ કરશે ગેસ સબસીડી; જાણો કોને થશે અસર

• સબસિડી પર કાતર: વાર્ષિક ₹10 લાખથી વધુ કરપાત્ર આવક ધરાવતા ગ્રાહકોને ઈન્ડેન અને તેલ કંપનીઓએ મોકલી નોટિસ.
• ડેટા ઇન્ટિગ્રેશન: હવે સેલ્ફ-ડિક્લેરેશન નહીં, પણ ઇન્કમ ટેક્સ વિભાગના રેકોર્ડના આધારે સબસિડી બંધ કરવાનો નિર્ણય.
• સંયુક્ત આવકનું ગણિત: પતિ-પત્ની બંનેની મળીને વાર્ષિક આવક ₹10 લાખ વટાવશે તો બજાર ભાવે ખરીદવો પડશે ગેસ સિલિન્ડર.
• 7 દિવસનું અલ્ટીમેટમ: ભૂલથી નોટિસ મળી હોય તો 1800-2333-555 પર કરો સંપર્ક; વિલંબ કરશો તો સબસિડી કાયમી જશે.

વડોદરા (ડેસ્ક): કેન્દ્ર સરકાર દ્વારા સબસિડીના લાભો ખરેખર જરૂરિયાતમંદો સુધી પહોંચાડવા માટે મોટો નિર્ણય લેવામાં આવ્યો છે. ઇન્ડેન સહિતની ઓઈલ માર્કેટિંગ કંપનીઓએ હવે એવા ગ્રાહકોને મોબાઈલ પર નોટિસ આપવાની શરૂઆત કરી છે જેમની વાર્ષિક કરપાત્ર આવક ₹10 લાખથી વધુ છે. આવા ગ્રાહકોએ હવે સબસિડી જતી કરવી પડશે અને સિલિન્ડરના પૂરા ભાવ ચૂકવવા પડશે.

🧐આવકવેરા વિભાગ સાથે જોડાણ:

અગાઉ સબસિડી છોડવા માટે ‘સેલ્ફ-ડિક્લેરેશન’ એટલે કે સ્વેચ્છાએ જાહેરાત કરવાની પદ્ધતિ હતી, પરંતુ હવે તેલ કંપનીઓ સીધી આવકવેરા વિભાગના ડેટાબેઝનો ઉપયોગ કરી રહી છે. સરકાર દ્વારા મોકલવામાં આવેલા મેસેજમાં સ્પષ્ટ જણાવાયું છે કે ગ્રાહક અથવા તેમના જીવનસાથીની સંયુક્ત આવક નિર્ધારિત મર્યાદા કરતા વધુ હોવાનું રેકોર્ડ પરથી માલુમ પડ્યું છે.

❓નિયમ શું કહે છે?

કેન્દ્ર સરકારે વર્ષ 2015 માં જ આ નિયમ બનાવ્યો હતો, જેનો હેતુ ઉજ્જવલા યોજના હેઠળ ગરીબ પરિવારોને વધુ સહાય આપવાનો છે. આ રકમ વ્યક્તિગત અથવા પતિ-પત્ની બંનેની ભેગી આવક તરીકે ગણવામાં આવે છે. સરકારનો તર્ક છે કે આર્થિક રીતે સક્ષમ લોકો સબસિડીનો ત્યાગ કરે તે રાષ્ટ્રહિતમાં છે.

🫵ગભરાવાની જરૂર નથી, જો…

જો તમારી આવક ₹10 લાખથી ઓછી છે અને તેમ છતાં તમને આવી નોટિસ મળી છે, તો તમારી પાસે 7 દિવસનો સમય છે. તમે ટોલ-ફ્રી નંબર 1800-2333-555 પર કોલ કરી શકો છો અથવા ઇન્ડિયન ઓઇલ જેવા સંબંધિત કંપનીના ઓનલાઇન પોર્ટલ પર જઈને પોતાનો વાંધો નોંધાવી શકો છો. જો તમે નિયત સમયમાં જવાબ નહીં આપો તો સબસિડી આપોઆપ બંધ થઈ જશે.

સરકારના આ કડક વલણથી સબસીડીના નાણાંમાં મોટી બચત થવાની ધારણા છે, જેનો સીધો લાભ છેવાડાના માનવીને મળશે. જો તમને પણ આવો મેસેજ મળ્યો હોય, તો વિગતો ચકાસીને ત્વરિત કાર્યવાહી કરવી હિતાવહ છે.