અમદાવાદ: ઈસનપુરના ગુરુકૃપા એસ્ટેટમાં કેમિકલ ફેક્ટરી ભડકે બળી, દૂર-દૂર સુધી દેખાયા ધુમાડાના ગોટેગોટા.

અમદાવાદના ઈસનપુરમાં કેમિકલ ફેક્ટરીમાં ભીષણ આગ.

• મોની હોટલ પાસે આવેલા ગુરુકૃપા એસ્ટેટમાં આગથી અફરાતફરી.
• ફાયર બ્રિગેડની 8 ગાડીઓ ઘટનાસ્થળે, આગ બૂઝાવવાની કામગીરી ચાલુ.
• ધુમાડાના ગોટેગોટા દૂર-દૂર સુધી દેખાયા, કેમિકલને કારણે આગ વધુ વિકરાળ બની.

અમદાવાદમાંથી આ સમયના મોટા સમાચાર સામે આવી રહ્યા છે. શહેરના દક્ષિણ વિસ્તાર ગણાતા ઈસનપુરમાં એક ભીષણ આગની ઘટના બની છે. ઈસનપુરની મોની હોટલની ગલીમાં આવેલા ગુરુકૃપા એસ્ટેટમાં એક કેમિકલ ફેક્ટરીમાં અચાનક વિકરાળ આગ ફાટી નીકળી છે.

મળતી માહિતી મુજબ, આગ એટલી વિકરાળ છે કે તેના ધુમાડાના ગોટેગોટા આકાશમાં દૂર-દૂર સુધી જોઈ શકાય છે. કેમિકલનો જથ્થો હોવાને કારણે આગ ઝડપથી પ્રસરી હતી અને આસપાસના વિસ્તારમાં ભયનો માહોલ જોવા મળી રહ્યો છે.

ઘટનાની જાણ થતા જ અમદાવાદ ફાયર બ્રિગેડનો કાફલો ઘટનાસ્થળે દોડી ગયો છે. હાલ ફાયર બ્રિગેડની 8 જેટલી ગાડીઓ સતત પાણીનો મારો ચલાવી રહી છે. પ્રાથમિક અહેવાલો મુજબ, ફાયર ફાઈટર્સ આગ પર કાબૂ મેળવવા માટે ભારે જહેમત ઉઠાવી રહ્યા છે. સદનસીબે હજુ સુધી કોઈ જાનહાનિના સમાચાર પ્રાપ્ત થયા નથી, પરંતુ ફેક્ટરીમાં મોટું આર્થિક નુકસાન થવાની ભીતિ સેવાઈ રહી છે.

પોલીસનો કાફલો પણ ટ્રાફિક અને સુરક્ષા વ્યવસ્થા જાળવવા માટે પહોંચી ગયો છે. આગ લાગવાનું ચોક્કસ કારણ હજુ જાણી શકાયું નથી, પરંતુ હાલ પ્રાથમિકતા આગને કાબૂમાં લેવાની છે.