વડોદરામાં એલ.સી.બી. ઝોન-3 : તરસાલી બ્રિજ પાસે ફ્લેટમાં ચાલતા જુગારધામનો પર્દાફાશ

• જુગારધામ પર રેડ: એલ.સી.બી. ઝોન-3 ની ટીમ દ્વારા તરસાલીના સાંત્વમ હાઈલેન્ડ ફ્લેટમાં દરોડો.
• 8 શખસો ઝડપાયા: પત્તા-પાનાનો જુગાર રમતા મુખ્ય સંચાલક સહિત 8 આરોપીઓ પોલીસના સકંજામાં.
• મોટી મતા જપ્ત: રૂ. 1.57 લાખ રોકડ, 8 મોબાઈલ અને 3 વાહનો મળી કુલ રૂ. 4.27 લાખનો મુદ્દામાલ કબ્જે.
• પોલીસ કાર્યવાહી: મકરપુરા પોલીસ સ્ટેશનમાં ગુનો નોંધી અન્ય 7 વોન્ટેડ આરોપીઓની શોધખોળ તેજ કરાઈ.

વડોદરા: વડોદરા શહેરમાં અસામાજિક પ્રવૃત્તિઓ અને જુગારના દુષણને નેસ્તનાબુદ કરવા માટે પોલીસ કમિશનર નરસિમ્હા કોમાર, સંયુક્ત પોલીસ કમિશનર નિલેશ જાજડીયા અને ડીસીપી ઝોન-3 અભિષેક ગુપ્તાના માર્ગદર્શન હેઠળ એલ.સી.બી. ઝોન-3 ની ટીમ દ્વારા સઘન પેટ્રોલિંગ હાથ ધરવામાં આવ્યું હતું. આ દરમિયાન મળેલી બાતમીના આધારે તરસાલી બ્રિજ પાસે દરોડાની કાર્યવાહી કરવામાં આવી હતી.

🧐શું હતી ઘટના?

એલ.સી.બી. ઝોન-૩ ના સ્ટાફના સંયુક્ત બાતમી મળી હતી કે, તરસાલી બ્રિજ પાસે આવેલા ‘સાંત્વમ હાઈલેન્ડ’ ફ્લેટના મકાન નંબર એચ/102 માં રહેતો પ્રજ્ઞેશ ચાંદુભાઈ પરમાર બહારથી માણસો બોલાવીને પોતાના ફ્લેટમાં પત્તા-પાના વડે પૈસાની હારજીતનો જુગાર રમાડી રહ્યો છે. આ બાતમીના આધારે પોલીસે દરોડો પાડીને સ્થળ પરથી જુગાર રમી રહેલા 8 ઇસમોને પકડી પાડ્યા હતા.

આ કાર્યવાહી દરમિયાન પોલીસે પકડાયેલા આરોપીઓ પાસેથી કુલ રૂ. 1,57,690/- ની રોકડ રકમ, રૂ. 90,000 ની કિંમતના 8 મોબાઈલ ફોન અને રૂ. 1,80,000 ની કિંમતના ૩ ટુ-વ્હીલર મળીને કુલ રૂ. 4,27,690/- નો મુદ્દામાલ જપ્ત કર્યો છે. પકડાયેલા આરોપીઓમાં જહાંગીર ઉર્ફે સલીમ મેમણ, હસમુખભાઈ માળી, મોબીનભાઈ મન્સુરી, જાવીદભાઈ પટેલ, મયુર વાઘેલા, વનરાજસિંહ ગોહેલ, દીપક શર્મા અને મકાનમાલિક પ્રજ્ઞેશ પરમારનો સમાવેશ થાય છે. આ ઉપરાંત તપાસ દરમિયાન અન્ય 7 શખસોના નામ ખુલ્લા જેઓને વોન્ટેડ જાહેર કરી મકરપુરા પોલીસ સ્ટેશનમાં જુગાર ધારા કલમ-4 અને 5 મુજબ ગુનો નોંધી આગળની કાયદેસરની તપાસ હાથ ધરવામાં આવી છે.