નાગરિકો માટે નિયમ, તંત્ર માટે મોજ: ઊર્જા સંકટ વચ્ચે સરકારી કચેરીઓની બેદરકારી; આદેશો માત્ર ફાઈલોમાં જ દબાયેલા!

• આદેશ માત્ર કાગળ પર: ઊર્જા સંકટ વચ્ચે સરકારી તંત્રની બેદરકારી; અધિકારીઓની ગેરહાજરીમાં ખાલી ઓફિસોમાં AC-પંખા ફુલ સ્પીડમાં.
• બેવડી નીતિ: નાગરિકોને વીજળી બચાવવાની શીખ આપતું તંત્ર પોતે જ કરી રહ્યું છે બેફામ ઊર્જાનો વ્યય.
• જવાબદાર કોણ? ઊર્જા બચત માટે કોઈ નોડલ ઓફિસર નહીં, કોઈ ચેકિંગ મિકેનિઝમ નહીં; આદેશો બની રહ્યા છે માત્ર ઔપચારિકતા.
• જનતામાં ભારે રોષ: દેશ રાષ્ટ્રીય કટોકટી જેવી સ્થિતિમાંથી પસાર થઈ રહ્યો છે, છતાં સરકારી તંત્રની ‘કુંભકર્ણી’ નિદ્રા યથાવત.

​રાષ્ટ્રીય ડેસ્ક: એક તરફ દેશમાં ઊર્જા સંકટ ઘેરું બની રહ્યું છે, યુદ્ધ જેવી પરિસ્થિતિના કારણે વીજળીની માંગ અને પુરવઠા વચ્ચે મોટું અંતર સર્જાયું છે. આવી સ્થિતિમાં સરકારે તમામ સરકારી વિભાગોને સખત સૂચના આપી છે કે તેઓ વીજળીનો વ્યય ટાળે, વાહનોનો ઉપયોગ ઘટાડે અને ઓફિસમાં હાજર ન હોય ત્યારે લાઈટ, પંખા અને એસી બંધ રાખે. પરંતુ, સરકારી કચેરીઓની અંદરની તસવીર અત્યંત શરમજનક અને નિરાશાજનક છે.

🧐જ્યાં માનવી નથી, ત્યાં મશીનો ધમધમે છે:

અમારી ટીમે જ્યારે કેટલીક સરકારી કચેરીઓમાં જઈને તપાસ કરી, ત્યારે જોવા મળ્યું કે જે અધિકારીઓ કે કર્મચારીઓ ઓફિસમાં હાજર જ નથી, તેમની ઓફિસમાં એસી (AC) ફૂલ સ્પીડમાં ધમધમી રહ્યા છે. કોઈ અડકવા વાળું નથી, છતાં લાઈટો અને પંખા ચાલુ રહે છે. રાષ્ટ્રીય કટોકટીના આ સમયે જ્યારે દેશને એક-એક યુનિટ વીજળીની જરૂર છે, ત્યારે સરકારી તંત્ર જ સૌથી મોટું ‘ઊર્જા ચોર’ બની રહ્યું હોય તેમ લાગી રહ્યું છે.

🗣️આદેશો માત્ર ફાઈલોમાં જ કેદ:

સૌથી મોટો પ્રશ્ન એ છે કે, ઊર્જા બચતના આ કડક આદેશોનું પાલન કરાવશે કોણ? સરકારે આ આદેશ તો આપ્યો છે, પરંતુ તેના અમલ માટે કોઈ નોડલ ઓફિસરની નિમણૂક કરવામાં આવી નથી. કોઈ ચેકિંગ મિકેનિઝમ ઊભું કરાયું નથી, અને જો કોઈ નિયમ તોડે તો તેની જવાબદારી પણ નક્કી કરવામાં આવી નથી. પરિણામે, ઊર્જા બચાવવાનો આદેશ માત્ર એક કાગળનો ટુકડો કે માત્ર ઔપચારિક્તા બનીને રહી ગયો છે.

🫵[જનતાનો આક્રોશ]

સામાન્ય નાગરિકોને અપીલ કરવામાં આવે છે કે તમે વીજળી બચાવો, પરંતુ જ્યારે જનતા જુએ છે કે સરકારી કચેરીઓમાં સરકારી તિજોરીના પૈસે વીજળીનો વ્યય થઈ રહ્યો છે, ત્યારે તેમની દ્વિધા નીતિ સામે લોકોમાં ઉગ્ર રોષ ફેલાયો છે. લોકો પૂછી રહ્યા છે કે શું વીજળી બચાવવાની જવાબદારી માત્ર સામાન્ય માણસની જ છે? શું સરકારી અધિકારીઓ પર કોઈ કાયદો લાગુ નથી પડતો?

યુદ્ધ જેવી સ્થિતિમાં જ્યારે દેશના અર્થતંત્ર પર દબાણ છે, ત્યારે સરકારી તંત્રની આ લાપરવાહી અક્ષમ્ય છે. આદેશો તો ઘણા અપાયા છે, હવે સમય આદેશોના કડક અમલીકરણનો છે. જો સરકાર પોતાની કચેરીઓમાં જ વીજળી બચાવી શકતી નથી, તો સામાન્ય પ્રજાને કેવી રીતે નૈતિકતાના પાઠ ભણાવશે?