મસાજ માટે બોલાવીને મેડીકલ ઓફિસરને હનીટ્રેપમાં ફસાવી દીધા,પોલીસના સ્વાંગમાં આવેલા ગઠીયાઓ એ એક લાખ રૂ.પડાવ્યા

• ફેસબુક પર ફ્રેન્ડ રીક્વેસ્ટ મોકલીને યુવકને મસાજ માટે યુવતીએ ઘરે બોલાવ્યો
• યુવતીના બેડરૂમમાં પોલીસના સ્વાંગમાં ત્રણ યયુવકો ધસી આવ્યા અને વિડીયો ઉતારી બ્લેકમેલ કર્યા
• ભોગબનનાર યુવકે પોલીસનો સંપર્ક કરતા ગણતરીના કલાકોમાં સમગ્ર ટોળકી ઝડપાઇ ગઈ

વડોદરા શહેરના ગોત્રી વિસ્તારમાં એક મહિલા દ્વારા મેડીકલ ઓફિસરને ફ્રેન્ડ રીક્વેસ્ટ મોકલીને મસાજ કરાવવા બોલાવીને વિડીયો ઉતારીને હનીટ્રેપ કર્યાનો કિસ્સો સપાટી પર આવ્યો છે. જેમાં મહિલાના સાગરીતોએ પોલીસ બનીને દરોડો પાડીને 10 લાખની માંગણી કરીને 1 લાખ પડાવી લીધા બાદ ઉઘરાણી કરતા હતા. જોકે ભોગબનનારે પોલીસનો સંપર્ક કરતા હનીટ્રેપ કરતી ટોળકી પોલીસના હાથે ઝડપાઈ ગઈ છે.

પ્રાપ્ત મહિતી અનુસાર શહેરના ન્યુ સમા રોડ વિસ્તારમાં રહેતા અને મંજુસરની ખાનગી કંપનીમાં મેડીકલ ઓફિસર તરીકે ફરજ બજાવતા અતુલ કાનજીભાઈ પટેલને થોડા દિવસ પહેલા જુહી લાબના નામની યુવતીની ફ્રેન્ડ રીક્વેસ્ટ ફેસબુક પર આવી હતી.જે ફ્રેન્ડ રીક્વેસ્ટ સ્વીકારીને અતુલ પટેલે જુહી સાથે ચેટ શરુ કરી હતી.

જુહીએ પોતે મસાજ થેરાપીસ્ટ તરીકેની ઓળખ આપીને મસાજ કરવવા માટેનો પ્રસ્તાવ મુક્યો હતો. જે બાદ અતુલભાઈ પટેલે 1000રૂ.માં મસાજ કરાવવાનું નક્કી કર્યું હતું. અને અતુલભાઈ જુહીના ઘરે ગોત્રી સંસ્કાર નગર ખાતે પહોચ્યા હતા. જ્યાં બેડરૂમમાં જઈને મસાજ માટે કપડા કાઢતાની સાથે જ ત્રણ ઇસમો ઘરમાં ધસી આવ્યા હતા. અને પોલીસ પોલીસ હોવાની ઓળખ આપી હતી.

પોલીસના સ્વાંગમાં આવેલા ત્રણ વ્યક્તિઓએ એપાર્ટમેન્ટ માંથી ફરિયાદ આવી છે. અહી ગેરકાયદે પ્રવૃત્તિ ચાલે છે તેમ કહીને એક અરજી જેવું કાગળ બતાવ્યું હતું. જયારે અન્ય એક વ્યક્તિએ અતુલ પટેલ અને જીહીનો વિડીયો ઉતારી લીધો હતો. અને ફ્લેટ સીલ કરીને ધરપકડ કરવાની ધમકી આપી હતી.

પોલીસના નામથી ડરી ગયેલા અતુલ પટેલે બહાર જ પતાવટ માટે રજૂઆત કરતા જ પોલીસના સ્વાંગમાં આવેલા ગઠીયાઓ એ 10 લાખ રૂ. ની માંગણી કરી હતી. અને રૂપિયા નહિ આપે તો કેસ કરીશું તેવી ધમકી ઉચ્ચારી હતી. ફરિયાદી અતુલ પટેલ પાસે રૂપિયા નથી તેમ કહીને એટીએમ કાર્ડ ઘરે છે તેમ જણાવતા ત્રણેય ગઠિયાઓ અતુલ પટેલને લઈને તેઓના ઘરે જઈને એટીએમ કાર્ડ લઈને 1 લાખ રૂ. ઉપાડી લીધા હતા.

બાકીના રૂપિયા સાંજે આપવા પડશે નહિ તો વિડીયો વાયરલ કરીને બળાત્કારના કેસમાં ફસાવી દેવાની ધમકી ઉચ્ચારી હતી. બીજા દિવસે મસાજ માટે બોલાવનાર મહિલા જુહી લાબનાએ પણ ફોન કરીને ફરિયાદી પાસે રૂપિયાની માંગણી કરી હતી. અને રૂપિયા નહિ આપે તો બળાત્કારના કેસમાં ફસાવી દેવાની ચીમકી ઉચ્ચારતા અતુલ પટેલે ગોત્રી પોલીસ મથકનો સંપર્ક કર્યો હતો. જયારે ગોત્રી પોલીસે હનીટ્રેપ મામલે ફરિયાદ લઈને મહિલા જાગૃતિ ઉર્ફે જુહી, યોગેશ લવાણા, સની બારોટ,અનિલ બારોટની ધરપકડ કરીને વધુ તપાસ હાથ ધરી છે.