સુરત-વડોદરા કનેક્શન: ફોરેક્સ ટ્રેડિંગના નામે પ્રોપર્ટી ડીલર સાથે ₹56.92 લાખની ઠગાઈ, વડોદરાથી સૂત્રધાર ઝડપાયો

• રોકાણના નામે લૂંટ: સુરતના 61 વર્ષીય વૃદ્ધને વધુ વળતર અને TLC કોઈનની લાલચ આપી લાખો ખંખેર્યા.
• વડોદરાથી ધરપકડ: સુરત સાયબર ક્રાઈમ પોલીસે વડોદરાના સોમપુરી ઉર્ફે કિશનપુરી ગોસ્વામીને દબોચ્યો.
• ચોંકાવનારો ખુલાસો: ગેંગના અન્ય આરોપી લવીશ ચૌધરીનું EDના ₹400 કરોડના કૌભાંડમાં કનેક્શન.
• દેશવ્યાપી જાળ: આ ટોળકી સામે દેશભરમાં 50 ફરિયાદો, કુલ છેતરપિંડીનો આંક ₹10.2 કરોડને પાર.

સુરત/વડોદરા: સુરતમાં ઓનલાઈન ઇન્વેસ્ટમેન્ટના નામે છેતરપિંડીનો વધુ એક મોટો કિસ્સો પ્રકાશમાં આવ્યો છે. વધુ નફાની લાલચે ફોરેક્સ ટ્રેડિંગમાં રોકાણ કરનાર વેસુ વિસ્તારના એક પ્રોપર્ટી ડીલરે પોતાની આજીવન મૂડીના ₹56.92 લાખ ગુમાવ્યા છે. આ હાઈપ્રોફાઈલ કેસમાં સુરત સાયબર ક્રાઈમ પોલીસે વડોદરાથી એક આરોપીની ધરપકડ કરી છે.

🧐કેવી રીતે થઈ છેતરપિંડી?

સુરતના 61 વર્ષીય કરસનભાઈ ખોખાણીને વર્ષ 2024માં વડોદરાના આશિષ પટેલે ફોરેક્સ ટ્રેડિંગમાં રોકાણ કરવા લાલચ આપી હતી. આશિષે રોકાણ માટે વડોદરાના જ સોમપુરી ગોસ્વામીનો સંપર્ક કરાવ્યો હતો. સોમપુરીએ કરસનભાઈને 6 ટકા ફિક્સ નફો અને ગિફ્ટમાં ‘TLC કોઈન’ આપવાની લાલચ આપી એક નકલી વેબસાઈટ પર એકાઉન્ટ ખોલાવ્યું હતું.

​વિશ્વાસ જીતવા માટે શરૂઆતમાં થોડો નફો આપ્યા બાદ, આરોપીઓએ કરસનભાઈ અને તેમના પત્નીના ખાતામાંથી મોટી રકમનું રોકાણ કરાવ્યું હતું. જોકે, વર્ષ 2024ના અંતમાં નફો આપવાનું બંધ કરી બંને આરોપીઓ હાથ ઊંચા કરી ફરાર થઈ ગયા હતા.

🚨તપાસમાં મોટા ખુલાસા:

કરસનભાઈની ફરિયાદ બાદ સુરત સાયબર ક્રાઈમ પોલીસે ટેકનિકલ સર્વેલન્સના આધારે વડોદરાથી સોમપુરી ઉર્ફે કિશનપુરી ગોસ્વામીને ઝડપી પાડ્યો છે. પોલીસ તપાસમાં સામે આવ્યું છે કે આ ગેંગનો અન્ય સાગરીત લવીશ ચૌધરી અગાઉ EDના ₹400 કરોડના મોટા કૌભાંડમાં પણ સંડોવાયેલો છે. આ ગેંગ વિરુદ્ધ ભારતભરમાં અલગ-અલગ રાજ્યોમાં 50 જેટલી ફરિયાદો નોંધાઈ છે, જેમાં તેમણે કુલ ₹10.2 કરોડથી વધુની ઠગાઈ કરી હોવાનું બહાર આવ્યું છે.

👉ઓનલાઈન ટ્રેડિંગ અને અજાણી વેબસાઈટ પર રોકાણ કરતા પહેલા તેની સત્યતા તપાસવી અત્યંત જરૂરી છે, અન્યથા તમારી આજીવન કમાણી જોખમમાં મુકાઈ શકે છે.