વોર્ડવિઝાર્ડ મેડીકેર સાથે 28.47 કરોડની છેતરપિંડી કરનાર CEO ડો. સંતોષકુમાર ગઢવી સામે આખરે ગુન્હો નોંધાયો

• કરાર આધારિત CEO ડો. સંતોષકુમારે ખોટા પરચેઝ ઓર્ડર બનાવી બેંક ખાતા માંથી મોટી રકમો ટ્રાન્સફર કરી
• 14 જેટલી અલગ અલગ કંપનીઓને ભંગાર અને રીફર્બીશ મેડીકલ સાધનો માટે નવા સાધનો કરતા વધુ કિંમત ચૂકવી
• કંપનીને ઓર્ડર આપ્યા બાદ કટકીની કરોડોની રકમ પોતાના મળતિયાઓના એકાઉન્ટમાં ટ્રાન્સફર કરાવતો
• હોસ્પિટલના ડ્રાઈવર અને સ્વીપરના નામે બેંક એકાઉન્ટ ખોલાવીને નાણાકીય ઉચાપત કરી હોવાનું સામે આવ્યું

વડોદરા સહીત મધ્ય ગુજરાતમાં હોસ્પિટલ નેટવર્ક ધરાવતી કંપની વોર્ડવિઝાર્ડ મેડીકેરના CEO દ્વારા 28. 47 કરોડની છેતરપીંડી કરી હોવાની ફરિયાદ વડોદરા ક્રાઈમ બ્રાંચ ખાતે કપનીના CFO દ્વારા નોંધાવવામાં આવી છે. જેમાં વોર્ડવિઝાર્ડ મેડીકેરના CEO ડો. સંતોષકુમાર ગઢવીએ હોસ્પિટલ માટે હલકી ગુણવત્તાના તેમજ આઉટડેટેડ અને રીફર્બીશ મેડીકલ સાધનો ખરીદીને તેના બદલામાં કંપની માંથી વધુ નાણાં અલગ અલગ પેઢીઓને ચૂકવ્યા હતા. આ ગેરરીતીનો આંકડો 28. 47 કરોડ સુધી પહોચ્યો હતો.

વોર્ડવિઝાર્ડ મેડીકેર પ્રાઈવેટ લીમીટેડના CFOએ ફરિયાદમાં જણાવ્યું હતું કે, તેઓની કંપનીએ ડો. સંતોષકુમાર ગઢવીને સેન્સ હેલ્થકેર તરફે વોર્ડવિઝાર્ડ મેડીકેરના કરાર આધારિત CEO તરીકે નિમણુક કરી હતી. એપ્રિલ 2025માં કંપનીને ધ્યાનમાં આવ્યું કે, ડો. સંતોષ કુમાર ગઢવીએ મોટા ભાગના પરચેઝ ઓર્ડર એક નિશ્ચિત તારીખ 26-08-2023ના રોજ જ બનાવેલા હતા. જે પરચેઝ ઓર્ડર ઓર્ડર ખાસ કરીને એસેટ અને મેડીકલ સાધનોની ખરીદી સંબંધિત હતા. જે તમામ વ્યવહારો વોર્ડવિઝાર્ડ મેડીકેરના CEO ડો. સંતોષકુમાર ગઢવીની દેખરેખ અને મંજુરીથી થયેલા હતા.

એપ્રિલ 2022થી જાન્યુઆરી 2025 સુધીમાં અલગ અલગ 14 જેટલી કંપનીઓને ખોટા પરચેઝ ઓર્ડર આપીને વોર્ડવિઝાર્ડ મેડીકેરના બેંક એકાઉન્ટ માંથી મસમોટી રકમ કંપનીઓમાં ટ્રાન્સફર કરી દઈને જુના તેમજ રીફર્બીશ સાધનો હોસ્પિટલમાં લાવીને મોટી ઉચાપત કરવામાં આવી હતી. આ ઉચાપતની રકમ 28 કરોડ ઉપરાંત પહોચી હતી. જ્યાં જરૂરી પુરાવાઓ પરચેઝ ઓર્ડર અને તકલાદી સાધનો પધરાવ્યા હોવાના પુરાવા સાથે વડોદરા ક્રાઈમ બ્રાંચમાં અરજી કરતા ક્રાઈમ બ્રાન્ચે ડો. સંતોષકુમાર ગઢવી વિરુદ્ધ 28 કરોડની છેતરપિંડીનો ગુન્હો નોંધીને શોધખોળ શરુ કરી છે.

ઠગ ડોકટરે ફરિયાદ નોંધાતા પહેલા કોર્ટમાં આગોતરા જામીન મુક્યા
વોર્ડવિઝાર્ડ મેડીકેરના CEO ડો. સંતોષકુમાર ગઢવી વિરુદ્ધ વડોદરા પોલીસના ઇકો સેલ દ્વારા તપાસ ચાલી રહી હતી. જયારે આ કેસમાં પોતાની ધરપકડ થશે તેમ જણાતા આરોપી ડોકટરે કોર્ટમાં આગોતરા જામીન મુક્યા હતા. કોર્ટમાં રજુ કરેલા આગોતરા જામીનની સુનાવણીમાં સરકારી વકીલે રજૂઆત કરી હતી કે ,આરોપીના વિરુદ્ધ પ્રાથમિક તબક્કે 6.54 કરોડની મોટી રકમની છેતરપિંડીના પુરાવાઓ મળ્યા છે. આ રકમ આરોપી ડો સંતોષ ગઢવીએ મળતિયાઓના બેંક ખાતામાં ટ્રાન્સફર કરાવ્યા હોવાના પુરાવાઓ પણ સામે આવ્યા છે. આ સાથે હોસ્પિટલના ડ્રાઈવર, સ્વીપર જેવા કર્મચારીઓના નામે ખોટા બેંક ખાતા ખોલાવી GST ભર્યા વગર સરકારી તિજોરીને નુકશાન પહોચાડીને નાણા અંગત ઉપયોગમાં લીધા હોવાના પણ દસ્તાવેજો મળ્યા છે. આરોપીના કસ્ટોડીયલ ઇન્ટ્રોગેશનની જરૂરિયાત છે. જે રજૂઆત સાંભળ્યા બાદ ઠગ ડોક્ટરના આગોતરા જામીન અરજી નામંજૂર કરવામાં આવ્યા હતા.