- શિસ્તના લીરેલીરા: માંજલપુરના ધારાસભ્ય યોગેશ પટેલનો વિવાદાસ્પદ વીડિયો વાયરલ; પક્ષમાં જૂથવાદ ચરમસીમાએ.
- શહેર પ્રમુખ નિશાને: “પ્રમુખ જૂઠ્ઠો અને ચોર છે, સંગઠન કે ધારાસભ્યોને પૂછ્યા વગર ટિકિટો વહેંચી” – યોગેશ પટેલના આકરા પ્રહાર.
- આયાતી ઉમેદવારોનો વિરોધ: વોર્ડ-18 માં દીપા પંચાલ જેવી ‘બહારની’ વ્યક્તિને પધરાવી દેવાતા ધારાસભ્ય પોતે નારાજ.
- પરિવારવાદ પર કટાક્ષ: “હિરેન સુખડિયા વોર્ડમાં ક્યારેય આવ્યો નથી છતાં ટિકિટ મળી”; આખા ગુજરાતમાં આ જ ધંધો ચાલતો હોવાનો દાવો.
વડોદરા: સંસ્કારી નગરીના રાજકારણમાં આજે ત્યારે ભૂકંપ આવ્યો જ્યારે ભાજપના સૌથી સિનિયર ધારાસભ્ય યોગેશ પટેલનો એક ખાનગી વાતચીતનો વીડિયો સોશિયલ મીડિયામાં વાયુવેગે વાયરલ થયો. આ વીડિયોમાં યોગેશ પટેલ પક્ષની ટિકિટ વહેંચણીની પ્રક્રિયા અને શહેર સંગઠનના મોવડી મંડળ સામે રીતસરનો બળાપો કાઢતા નજરે પડે છે.
⚠️“હું જ દુઃખી છું”:
વોર્ડ નંબર 18 ના નારાજ કાર્યકરો સાથેની વાતચીતમાં યોગેશ પટેલ સ્પષ્ટપણે કહેતા સંભળાય છે કે, “હું પોતે જ આ પરિસ્થિતિથી દુઃખી છું.” તેમણે વોર્ડ-18 માં દીપા પંચાલને ટિકિટ આપવા સામે વાંધો ઉઠાવતા કહ્યું કે, જે વ્યક્તિ વિસ્તારની નથી તેને લાવીને અહીં મૂકી દેવામાં આવી છે.
🧐પ્રમુખ સામે ‘ચોર’ અને ‘જૂઠ્ઠા’ના સંબોધન:
ધારાસભ્યએ શહેર ભાજપ પ્રમુખ સામે મોરચો માંડતા અત્યંત આકરા શબ્દોનો પ્રયોગ કર્યો છે. તેમણે આક્ષેપ કર્યો કે પ્રમુખે ટિકિટ ફાળવણીમાં ન તો ધારાસભ્યોને વિશ્વાસમાં લીધા છે, ન તો સંગઠનના પાયાના કાર્યકરોને પૂછ્યું છે. તેમણે કહ્યું કે, “પ્રમુખ જૂઠ્ઠો અને ચોર છે.”
❓પૂર્વ મંત્રીના પુત્રને ટિકિટ આપવા સામે સવાલ:
યોગેશ પટેલે પૂર્વ મંત્રી જીતુ સુખડિયાના પુત્ર હિરેન સુખડિયાને ટિકિટ આપવા સામે પણ સવાલ ઉઠાવ્યા છે. તેમણે કહ્યું કે જે વ્યક્તિ ક્યારેય વોર્ડમાં ડોકાઈ પણ નથી તેને ટિકિટ આપી દેવાઈ છે. આ સાથે જ તેમણે કટાક્ષ કર્યો કે આખા ગુજરાતમાં અત્યારે આવી જ રીતે મનસ્વી રીતે ટિકિટો ફાળવવાનો ‘ધંધો’ ચાલી રહ્યો છે.
🫵ચૂંટણી પહેલા ભાજપના જ દિગ્ગજ નેતા દ્વારા પોતાની જ પાર્ટીના પ્રમુખ સામે કરવામાં આવેલા આ પ્રહારો ભાજપ માટે મુસીબત બની શકે છે. શું આ વિવાદ ભાજપની જીત પર અસર કરશે?
