- પ્રેમજાળ અને વીડિયો રેકોર્ડિંગ: MS યુનિવર્સિટીની પૂર્વ વિદ્યાર્થિનીને વર્ષ 2023માં ગોત્રીના વાસુદેવ સુથારે સંબંધોમાં ફસાવી અંગત પળોના ગુપ્ત વીડિયો-ફોટા ઉતારી લીધા હતા.
- ખંડણી અને સોનાની લૂંટ: વાયરલ કરવાની ધમકી આપી આરોપીએ યુવતી પાસેથી 10 લાખ રૂપિયા રોકડા અને બળજબરીથી 20 તોલા સોનાના દાગીના પડાવી લીધા.
- લગ્ન બાદ પણ અત્યાચાર: યુવતીના લગ્ન થઈ ગયા હોવા છતાં આરોપીએ પીછો ન છોડ્યો અને રાજસ્થાન તથા અમદાવાદ બોલાવી બળજબરીપૂર્વક શારીરિક સંબંધો બાંધવા મજબૂર કરી.
- પોલીસ ધરપકડ અને રિમાન્ડ: રાજસ્થાનમાં નોંધાયેલી ફરિયાદ બાદ કેસ ગોત્રી પોલીસને ટ્રાન્સફર થતાં પોલીસે 24 વર્ષીય વાસુદેવ સુથારની ધરપકડ કરી 31 ઓગસ્ટ સુધીના રિમાન્ડ મેળવ્યા છે.
વડોદરાની મહારાજા સયાજીરાવ (MS) યુનિવર્સિટીની એક પૂર્વ વિદ્યાર્થિની સાથે દુષ્કર્મ, લાખોની ખંડણી અને બ્લેકમેઈલિંગનો એક અત્યંત ચોંકાવનારો અને ગંભીર મામલો સામે આવ્યો છે.
વર્ષ 2023 દરમિયાન અભ્યાસ કરતી આ યુવતી ગોત્રી વિસ્તારમાં રહેતા વાસુદેવ સુથારના સંપર્કમાં આવી હતી. આરોપી વાસુદેવે યુવતીને પોતાના ઘરે બોલાવી તેની સાથે શારીરિક સંબંધ બાંધ્યા હતા અને તે દરમિયાન ગુપ્ત રીતે તેની અંગત પળોના ફોટા તથા વીડિયો કૅપ્ચર કરી લીધા હતા. આ અપરાધિક કૃત્ય બાદ શરૂ થયો બ્લૅકમેઈલિંગનો ખેલ; આરોપીએ આ વાંધાજનક ફોટા અને વીડિયો સોશિયલ મીડિયા પર વાયરલ કરવાની ધમકી આપીને યુવતી પાસેથી 10 લાખ રૂપિયાની માગણી કરી હતી, એટલું જ નહીં પરંતુ બળજબરીપૂર્વક 20 તોલા સોનાના દાગીના પણ પડાવી લીધા હતા.
હદ તો ત્યારે થઈ જ્યારે પીડિત યુવતીના લગ્ન થઈ ગયા હોવા છતાં આરોપીએ તેને ધમકાવવાનું ચાલુ રાખ્યું અને રાજસ્થાન તેમજ અમદાવાદ બોલાવીને તેની સાથે અસહાય સ્થિતિમાં બળજબરીથી શારીરિક સંબંધ બાંધવા મજબૂર કરી હતી. આ ત્રાસથી કંટાળીને યુવતીએ આખરે રાજસ્થાનમાં પોલીસ ફરિયાદ નોંધાવી હતી, જ્યાંથી આ કેસ વડોદરાના ગોત્રી પોલીસ સ્ટેશનમાં ટ્રાન્સફર કરવામાં આવ્યો હતો. ગોત્રી પોલીસે ત્વરિત કાર્યવાહી કરીને 24 વર્ષીય આરોપી વાસુદેવ સુથારની ધરપકડ કરી તેને કોર્ટ સમક્ષ રજૂ કર્યો હતો, જ્યાં અદાલતે તેના 31 ઓગસ્ટ સુધીના પોલીસ રિમાન્ડ મંજૂર કર્યા છે.
