વડોદરા શહેરને નશામુક્ત બનાવવાના અભિયાન હેઠળ પોલીસ કમિશનરની સૂચનાથી માદક પદાર્થોની હેરાફેરી કરનારા તત્વો પર પોલીસ તવાઈ બોલાવી રહી છે. આ ઝુંબેશ અંતર્ગત વડોદરા પોલીસને મોટી સફળતા મળી છે, જેમાં શહેરના બે અલગ-અલગ પોલીસ મથકોમાં નોંધાયેલા ગાંજાના કેસમાં મુખ્ય સપ્લાયર તરીકે વોન્ટેડ આરોપીની ધરપકડ કરવામાં આવી છે.
🧐ધરપકડ અને ઓળખ:
ઝડપાયેલ આરોપી શાંતિલાલ બાબુલાલ નિનામા મધ્યપ્રદેશના રતલામ જિલ્લાના બિલપાંક પોલીસ સ્ટેશન વિસ્તારના ગામ ખારીનો રહેવાસી છે. વડોદરા એસ.ઓ.જી. (SOG) અને એલ.સી.બી. (LCB) ની તપાસમાં આ શખ્સનું નામ ગાંજાના સપ્લાયર તરીકે બહાર આવ્યું હતું, ત્યારથી તે પોલીસ ધરપકડ ટાળવા નાસતો-ફરતો હતો.
🚨આરોપીનો ગુનાહિત ઇતિહાસ:
આરોપી શાંતિલાલ સામે વડોદરામાં બે મુખ્ય ગુનાઓ નોંધાયેલા છે:
1. ગોરવા પોલીસ સ્ટેશન: ડિસેમ્બર 2025થીમાં એસ.ઓ.જી. દ્વારા 459 ગ્રામ ગાંજો અને અન્ય મુદ્દામાલ મળી કુલ ₹1.19 લાખનો કેસ નોંધાયો હતો, જેમાં તે મુખ્ય સપ્લાયર હતો.
2. ફતેહગંજ પોલીસ સ્ટેશન: ઝોન-1 એલ.સી.બી.ની ટીમ દ્વારા ૫૫૭ ગ્રામ ગાંજો અને મુદ્દામાલ મળી કુલ ₹85,980નો કેસ નોંધવામાં આવ્યો હતો, જેમાં પણ આ આરોપીની સંડોવણી સામે આવી હતી.
👮પોલીસ કાર્યવાહી:
વડોદરા પોલીસની ટીમે બાતમીના આધારે મધ્યપ્રદેશના રતલામ ખાતે દરોડો પાડી આરોપીને દબોચી લીધો છે. પોલીસની પ્રાથમિક પૂછપરછમાં જાણવા મળ્યું છે કે આ સપ્લાયર મધ્યપ્રદેશથી વડોદરાના છૂટક વિક્રેતાઓ સુધી નશીલા પદાર્થો પહોંચાડતો હતો. હાલમાં પોલીસે આરોપીની અટકાયત કરી છે અને આ નેટવર્કમાં અન્ય કયા લોકો સામેલ છે તે દિશામાં સઘન તપાસ હાથ ધરી છે.
