- ડોક્ટર બન્યા શિકાર: કલાલીના ડો. મેહુલ અગ્રાવત સાથે દુબઈ પ્રવાસમાં છેતરપિંડી; અટલાદરા પોલીસ મથકે નોંધાઈ ફરિયાદ.
- ઠગાઈની મોડસ ઓપરેન્ડી: હોટલ બુકિંગ અને સાઈટ સીન ધરાવતી ‘ફ્લાય 24 ટૂરિઝમ’ના નામે 2.78 લાખનું આપ્યું હતું કોટેશન.
- વિદેશમાં ફસાયા: દુબઈ પહોંચતા જ હોટલ બુકિંગ ન હોવાનું આવ્યું સામે; આરોપીએ કંપનીની ભૂલ બતાવી ફરીથી પડાવ્યા નાણાં.
- ઓફિસના નામે પણ ઠગાઈ: સેફ્રોન ટાવરમાં ટૂરિઝમની ઓફિસ હોવાનું કહીને પિતા-પુત્રએ આપી હતી ખોટી ઓળખ; તપાસ કરતા નીકળી ઝેરોક્ષની દુકાન.
વડોદરા: સંસ્કારી નગરી વડોદરામાં વિદેશ પ્રવાસના નામે છેતરપિંડી કરતી ટોળકીઓ વધુ સક્રિય થઈ હોય તેમ જણાય છે. કલાલી વિસ્તારના જાણીતા ગેસ્ટ્રો સર્જન ડો. મેહુલ અગ્રાવતને દુબઈના પ્રવાસ દરમિયાન પિતા-પુત્રની જોડીએ લાખોનો ચૂનો લગાવ્યો હોવાની ફરિયાદ અટલાદરા પોલીસ મથકે નોંધાઈ છે.
🧐દુબઈ મેચ દરમિયાન થઈ હતી મુલાકાત:
ફરિયાદ મુજબ, વર્ષ 2021માં ભારત-પાકિસ્તાન વર્લ્ડ કપ મેચ જોવા ગયેલા ડોક્ટરની મુલાકાત દુબઈની હયાત હોટલમાં રાજીવભાઈ હસમુખભાઈ પારેખ સાથે થઈ હતી. રાજીવ પારેખે પોતે ટૂરિઝમ વ્યવસાય સાથે સંકળાયેલા હોવાનું જણાવી મિત્રતા કેળવી હતી અને વડોદરાના ફતેગંજ ખાતે ‘ફ્લાય 24 ટૂરિઝમ’ નામની ઓફિસ હોવાનું જણાવ્યું હતું.
👉પુત્રને મળવા જવાનું પડ્યું ભારે:
ડોક્ટરનો પુત્ર દુબઈમાં ઇન્ટર્નશીપ કરતો હોવાથી, તેને મળવા અને ફરવા જવા માટે ડોક્ટરે રાજીવ પારેખનો સંપર્ક કર્યો હતો. હોટલ અને સાઈટ સીનના પેકેજ પેટે 2.76 લાખ રૂપિયા ચૂકવ્યા બાદ ડોક્ટર 19 ડિસેમ્બર 2025ના રોજ દુબઈ પહોંચ્યા હતા. જોકે, ત્યાં પહોંચતા જ તેમને ખબર પડી કે જે હોટલ બતાવવામાં આવી હતી ત્યાં કોઈ બુકિંગ જ નહોતું.
🗣️વિદેશમાં પણ ખંખેર્યા નાણાં:
ડોક્ટરે ફરિયાદ કરતા રાજીવ પારેખ ત્યાં દોડી આવ્યા હતા અને “કંપનીએ છેતરપિંડી કરી છે” તેમ કહીને ફરીથી ડોક્ટર પાસેથી પૈસા લઈ હોટલ બુકિંગ કરાવ્યું હતું. ત્યારબાદ પિતા-પુત્રએ પોતાના ફોન સ્વીચ ઓફ કરી દીધા હતા. ડોક્ટરે પોતાની રીતે વ્યવસ્થા કરી વડોદરા પરત આવી જ્યારે ફતેગંજ સ્થિત ઓફિસે તપાસ કરી ત્યારે ચોંકાવનારો ખુલાસો થયો હતો. જે ઓફિસનું સરનામું આપવામાં આવ્યું હતું ત્યાં ટૂરિઝમની કોઈ ઓફિસ નહોતી પરંતુ ઝેરોક્ષની દુકાન ચાલતી હતી.
🚨પોલીસ કાર્યવાહી:
અટલાદરા પોલીસે ડો. મેહુલ અગ્રાવતની ફરિયાદના આધારે પિતા-પુત્ર વિરુદ્ધ છેતરપિંડીનો ગુનો નોંધી આરોપી રાજીવ પારેખ અને આર્યન પારેખની શોધખોળ હાથ ધરી છે.
🫵વિદેશ પ્રવાસના બુકિંગ સમયે એજન્ટની વિશ્વસનીયતા તપાસવી કેટલી જરૂરી છે તે આ કિસ્સો લાલબત્તી સમાન છે.
