વડોદરા પોલીસની મોટી કાર્યવાહી, 3 બુટલેગરોને ‘પાસા’ હેઠળ ધકેલાયા જેલના સળિયા પાછળ

વડોદરા શહેરમાં કાયદો અને વ્યવસ્થાની સ્થિતિ જાળવી રાખવા અને ગુનાખોરીને જડબાતોડ જવાબ આપવા માટે પોલીસ કમિશનર નરસિમ્હા કોમાર સાહેબ દ્વારા સ્પેશિયલ ડ્રાઈવ ચલાવવામાં આવી રહી છે. જે અંતર્ગત શહેરના બાપોદ અને જવાહરનગર પોલીસ સ્ટેશન વિસ્તારમાં દારૂના વેચાણ અને હેરાફેરીમાં સંડોવાયેલા 3 રીઢા ગુનેગારો સામે પાસા (PASA) હેઠળ કાર્યવાહી કરી તેમને અલગ-અલગ જેલોમાં મોકલી આપવામાં આવ્યા છે.

🧐ઘટનાની વિગત: શહેરમાં શાંતિ અને ભાઈચારો જળવાઈ રહે તથા આગામી ધાર્મિક પ્રસંગોમાં કોઈ અનિચ્છનીય બનાવ ન બને તે હેતુથી, પોલીસ દ્વારા સતત મોનિટરિંગ કરવામાં આવી રહ્યું હતું. આ દરમિયાન નીચે મુજબના રીઢા આરોપીઓ સામે પાસાના વોરંટ ઈસ્યુ કરવામાં આવ્યા હતા:

• જીજ્ઞેશ ઉર્ફે જીગો મફતભાઇ માળી: બાપોદ પોલીસ સ્ટેશનના પ્રોહિબિશનના અનેક ગુનાઓમાં સંડોવાયેલ આ આરોપી લાખોની કિંમતના વિદેશી દારૂના જથ્થા સાથે ઝડપાયો હતો. તેની અસામાજિક પ્રવૃત્તિઓને રોકવા માટે તેને ભાવનગર મધ્યસ્થ જેલ ખાતે મોકલવામાં આવ્યો છે.

• જગદીશસીંગ મોહનસીંગ ચૌહાણ: આ આરોપી વિદેશી દારૂનો મોટો જથ્થો લાવી છૂટક તેમજ જથ્થાબંધ સપ્લાય કરવામાં ટેવાયેલો છે. પોલીસ રેઇડ દરમિયાન 9.60 લાખથી વધુના મુદ્દામાલ સાથે પકડાયેલા આ ઈસમને અમદાવાદ મધ્યસ્થ જેલ ભેગો કરવામાં આવ્યો છે.

• કરણસિંહ ખુમાનસિંહ ગોહિલ: જવાહરનગર પોલીસ સ્ટેશનની હદમાં રાજ્ય બહારથી દારૂ મંગાવી નેટવર્ક ચલાવતા કરણસિંહ સામે વડોદરા ગ્રામ્ય અને આંકલાવ સહિતના વિસ્તારોમાં 19થી વધુ ગુના નોંધાયેલા છે. આ આર્થિક ફાયદા માટે લોકોના જીવ જોખમમાં મૂકતા બુટલેગરને રાજકોટ મધ્યસ્થ જેલ ખાતે ધકેલી દેવાયો છે.

👮પોલીસનો સંદેશ: વડોદરા શહેર પોલીસ દ્વારા સ્પષ્ટ સૂચના આપવામાં આવી છે કે, શહેરમાં દારૂ, જુગાર, સાયબર ગુના કે વ્યાજખોરી જેવી પ્રવૃત્તિમાં સંડોવાયેલા તત્વો સામે હજુ પણ વધુ કડક કાર્યવાહી હાથ ધરવામાં આવશે. આ કાર્યવાહીથી ગુનેગારોમાં ફફડાટ વ્યાપી ગયો છે.