તમારા ખિસ્સામાં રહેલી ₹500ની નોટ અસલી છે કે નકલી? આસોજમાં પકડાયુ નકલી નોટો નું ‘મિની છાપખાનું’!

વડોદરામાં ડુપ્લીકેટ નોટોના ‘કાળા કારોબાર’ પર LCBની સર્જિકલ સ્ટ્રાઈક.

• ​સાવલીના આસોજ ગામમાં ચાલતું હતું હૂબહૂ ₹500ની નોટો છાપવાનું મશીન.
• ​એકાંત મકાનમાં રાત-દિવસ ચાલતું હતું છાપખાનું; બે મુખ્ય સૂત્રધારો ઝડપાયા.
• કલર પ્રિન્ટર, ખાસ કાગળ અને શાહી સહિતનો લાખોનો મુદ્દામાલ જપ્ત.

વડોદરાના સાવલી તાલુકામાંથી એક ચોંકાવનારા સમાચાર સામે આવ્યા છે. પોલીસની નજરથી બચવા માટે શાંત ગામડાના એકાંત મકાનમાં બેસીને કેટલાક શખ્સો અર્થતંત્રને નુકસાન પહોંચાડવાનું મોટું કાવતરું ઘડી રહ્યા હતા. પરંતુ, વડોદરા લોકલ ક્રાઈમ બ્રાન્ચ (LCB) એ આ આખા નેટવર્કનો પર્દાફાશ કર્યો છે.

ઘટના છે સાવલીના આસોજ ગામની. અહીંના એક મકાનમાં પાછલા કેટલાક સમયથી શંકાસ્પદ પ્રવૃત્તિઓ ચાલી રહી હોવાની બાતમી LCBની ટીમને મળી હતી. બાતમીના આધારે પોલીસે જ્યારે આ મકાન પર ત્રાટકી, ત્યારે અંદરનું દ્રશ્ય જોઈને અધિકારીઓ પણ દંગ રહી ગયા. મકાનની અંદર કોઈ ફેક્ટરીની જેમ ₹500ના દરની હૂબહૂ નકલી નોટો છાપવામાં આવી રહી હતી.

🚨પોલીસે તપાસ દરમિયાન ત્યાંથી:

• અત્યાધુનિક કલર પ્રિન્ટર્સ,
• નકલી નોટો માટે વપરાતો ખાસ પ્રકારનો કાગળ,
• વિશેષ શાહી (Ink),
• અને મોટી સંખ્યામાં તૈયાર કરાયેલી ₹500ની નકલી નોટો જપ્ત કરી છે.

🧐આરોપીઓની વિગત

આ રેકેટમાં પોલીસે બે મુખ્ય આરોપીઓ, નરેન્દ્ર પાલ અને હેમંત જાગીરને રંગેહાથ ઝડપી પાડ્યા છે. નવાઈની વાત એ છે કે, આ આરોપીઓએ પોલીસથી બચવા માટે આસોજ ગામના સીમ વિસ્તારમાં એક શાંત મકાન ભાડે રાખ્યું હતું. જોકે, પોલીસ હવે એ તપાસી રહી છે કે આ મકાનનો ભાડા કરાર કેમ કરવામાં આવ્યો નહોતો? હાલમાં મકાનમાલિક મુકેશ અને જયેશ પટેલની પણ પૂછપરછ હાથ ધરવામાં આવી છે.

LCB હવે એ દિશામાં તપાસ કરી રહી છે કે અત્યાર સુધીમાં આ ટોળકીએ કેટલી નકલી નોટો બજારમાં વટાવી દીધી છે? શું આની પાછળ કોઈ મોટું આંતરરાજ્ય નેટવર્ક કામ કરી રહ્યું છે? પોલીસને શંકા છે કે આ કૌભાંડમાં હજુ પણ અન્ય કેટલાક શખ્સોની સંડોવણી હોઈ શકે છે, જેને લઈને આગામી દિવસોમાં વધુ ધરપકડ થવાની શક્યતા છે.

​નકલી નોટોનો આ કારોબાર દેશના અર્થતંત્ર માટે મોટું જોખમ છે, ત્યારે વડોદરા LCBની આ કામગીરી પ્રશંસનીય છે. જો તમારી આસપાસ પણ આવી કોઈ શંકાસ્પદ પ્રવૃત્તિ થતી હોય, તો તાત્કાલિક પોલીસને જાણ કરો.