ઉતરાયણના સ્વાદ પર મોંઘવારીનો ‘પેચ’, વડોદરામાં ઊંધિયું-જલેબી 20% મોંઘા

મકરસંક્રાંતિ એટલે પતંગબાજી અને સાથે ચટાકેદાર ઊંધિયું-જલેબીની મિજબાની. પરંતુ આ વર્ષે પતંગ રસિયાઓ માટે ઊંધિયું-જલેબીનો સ્વાદ થોડો મોંઘો સાબિત થવાનો છે. કમોસમી વરસાદ અને કાચા માલના વધતા ભાવને કારણે આ વર્ષે સ્વાદના શોખીનોએ ગજવું વધુ હળવું કરવું પડશે.

🧐મોંઘવારીનો ડંખ

ઉત્તરાયણ પર્વને હવે ગણતરીના કલાકો બાકી છે ત્યારે વડોદરાના બજારોમાં ગરમાગરમ ઊંધિયું અને જલેબીની સુગંધ પ્રસરી રહી છે. જોકે, આ સુગંધ સાથે ભાવનો ‘તડકો’ પણ ગ્રાહકોને દઝાડી રહ્યો છે. ગત વર્ષની સરખામણીએ આ વર્ષે ઊંધિયું અને જલેબીના ભાવમાં 20 ટકાનો વધારો નોંધાયો છે. વડોદરામાં ઊંધિયાનો ભાવ પ્રતિ કિલો રૂ. 550 સુધી પહોંચી ગયો છે.

📍ભાવ વધારા પાછળના મુખ્ય કારણો:

• કમોસમી વરસાદ: ખેતીના પાકને થયેલા નુકસાનથી શાકભાજીની આવક ઘટી છે.
• કાચા માલની કિંમત: તેલ, બેસન, ખાંડ અને મસાલાના ભાવમાં મોટો ઉછાળો.
• મજૂરી ખર્ચ: કારીગરો અને મજૂરીના દરમાં થયેલો વધારો.

🫛શાકભાજીના ભાવ આસમાને:

ઊંધિયું બનાવવા માટે જરૂરી તમામ મુખ્ય શાકભાજીના ભાવમાં વધારો થયો છે. જેમાં ખાસ કરીને:

• સુરતી પાપડી, રતાળુ અને સુરણ.
• રવૈયા, બટાકા, શક્કરીયા અને લીલી તુવેર.
• મેથીની ભાજી અને અન્ય લીલા શાકભાજી.
  

“અત્યારે શાકભાજી અને તેલ-મસાલા એટલા મોંઘા થયા છે કે ઘરે ઊંધિયું બનાવવું પણ મોંઘું પડે છે. બજારમાં તો ભાવ 20 ટકા વધી ગયા છે, એટલે આ વખતે તહેવારનો આનંદ થોડો મોંઘો પડશે.”

🛒વેપારીઓની તૈયારીઓ:

મોંઘવારી હોવા છતાં, વડોદરાવાસીઓનો ઉત્સાહ ઓછો થયો નથી. શહેરના વિવિધ વિસ્તારોમાં મંડપો બાંધીને ઊંધિયું-જલેબીના સ્ટોલ તૈયાર કરી દેવામાં આવ્યા છે. લાખો કિલોની માંગને પહોંચી વળવા વેપારીઓએ બે દિવસ અગાઉથી જ તૈયારીઓ શરૂ કરી દીધી છે.

🫵ભલે ભાવ વધ્યા હોય, પણ વડોદરાના પતંગ રસિયાઓ માટે ઊંધિયું-જલેબી વગરની ઉતરાયણ અધૂરી છે. તો તમે પણ તૈયાર થઈ જાઓ આ મોંઘા પણ મસાલેદાર સ્વાદનો આનંદ માણવા માટે.