- સફળ વોચ: પલાસવાડા રેલવે ફાટક પાસે ડભોઇ પોલીસ દ્વારા બાતમીના આધારે ઓપરેશન.
- મુદ્દામાલ: 4.42 લાખનો વિદેશી દારૂનો જથ્થો જપ્ત, સાથે ઈકો અને મહિન્દ્રા ગાડી કબજે.
- બે પકડાયા, એક ફરાર: ભાવનગરના બે શખ્સોની ધરપકડ, મુખ્ય ચાલક યોગેશ જેઠવા ફરાર.
- પાયલોટિંગનો પર્દાફાશ: દારૂની ગાડીને સુરક્ષિત પસાર કરાવવા માટે ઈકો ગાડીમાં કરાતું હતું પાયલોટિંગ
ડભોઇ: ડભોઇ નજીક આવેલા પલાસવાડા રેલવે ફાટક પાસે પોલીસે બાતમીના આધારે ફિલ્મી ઢબે દરોડો પાડી લાખોના વિદેશી દારૂના જથ્થા સાથે બે શખ્સોને ઝડપી પાડ્યા છે. દારૂ ભરેલી ગાડીને સુરક્ષિત રીતે પસાર કરવા માટે પાયલોટિંગ કરી રહેલી ઈકો કારને પણ પોલીસે આબાદ રીતે ઝડપી લીધી છે.
❓શું હતી સમગ્ર ઘટના?
ડભોઇ પોલીસને ચોક્કસ બાતમી મળી હતી કે, છોટાઉદેપુર તરફથી એક સફેદ કલરની મહિન્દ્રા ગાડીમાં વિદેશી દારૂનો જથ્થો ભરીને નસવાડી-બુંજેઠા થઈ ડભોઇ-વડોદરા થઈને ભાવનગર તરફ જનાર છે, અને તેની આગળ એક ઈકો ગાડીમાં બે શખ્સો પાયલોટિંગ કરી રહ્યા છે. આ માહિતીને પગલે પોલીસની ટીમે પલાસવાડા રેલવે ફાટક પાસે વોચ ગોઠવી હતી.
પોલીસને જોઈને ઈકો કારમાં રહેલા બે શખ્સોને તો પોલીસે ઘેરીને પકડી પાડ્યા હતા, પરંતુ દારૂ ભરેલી ગાડીના ચાલકે દૂરથી જ પોલીસને જોઈ જતા રસ્તામાં જ ગાડી મૂકીને અંધારાનો લાભ લઈને ફરાર થઈ ગયો હતો.
🚨ઝડપાયેલો મુદ્દામાલ અને આરોપીઓ:
પોલીસે ગાડીની તલાશી લેતા તેમાંથી 4.42 લાખ રૂપિયાની કિંમતનો વિદેશી દારૂનો જથ્થો મળી આવ્યો હતો. પોલીસે ઘટનાસ્થળેથી સંતોષ પ્રવિણભાઈ જેઠવા અને સાગરભાઈ પ્રેમજીભાઈ બારૈયા (બંને રહે. હાથબ, ભાવનગર) ને ઝડપી પાડ્યા છે. જ્યારે દારૂ ભરેલી ગાડી મૂકીને ફરાર થઈ ગયેલા યોગેશ ઉર્ફે પથુ લાભુભાઈ જેઠવા (રહે. હાથબ, ભાવનગર) ને પકડવા માટે પોલીસે કવાયત હાથ ધરી છે.
ડભોઇ પોલીસે પ્રોહિબિશન એક્ટ હેઠળ ગુનો નોંધીને ફરાર આરોપીની શોધખોળ અને આ દારૂનો જથ્થો કોણે મંગાવ્યો હતો તે દિશામાં વધુ તપાસ હાથ ધરી છે.
