વડોદરા શહેર પોલીસ કમિશનર નરસિમ્હા કોમાર અને અધિક પોલીસ કમિશનર ડૉ. લીના પાટીલની સૂચના હેઠળ નાસતા-ફરતા આરોપીઓને પકડવા માટે શરૂ કરાયેલી ઝુંબેશમાં ક્રાઈમ બ્રાન્ચને મોટી સફળતા મળી છે. કેનેડાના વિઝા અને PR અપાવવાના બહાને 60 જેટલા લોકો સાથે રૂ. 7.48 કરોડની છેતરપિંડી આચરનાર આરોપી તલ્વીન્દર દારાસસિંગ સંધુને દુમાડ ચોકડી પાસેથી ઝડપી પાડવામાં આવ્યો છે.
🚨કેવી રીતે ઝડપાયો આરોપી?
ક્રાઈમ બ્રાન્ચના DCP હિમાંશુ કુમાર વર્મા અને ઇન્ચાર્જ ACP ડી. જે. ચાવડાના માર્ગદર્શન હેઠળ ટીમો તપાસમાં હતી. આ દરમિયાન PI આર. જી. જાડેજા, PI એન. જી. જાડેજા અને PSI આર. એન. બારૈયાની ટીમને મળેલી બાતમીના આધારે, નિઝામપુરા વિસ્તારમાં રહેતા તલ્વીન્દર સંધુને દુમાડ ચોકડી પાસેથી દબોચી લેવાયો હતો.
શું હતો સમગ્ર ગુનો?
પકડાયેલ આરોપી સામે સી.આઈ.ડી. ક્રાઈમ (ગાંધીનગર) ખાતે ઠગાઈ અને વિશ્વાસઘાતનો ગુનો નોંધાયેલો હતો. ગુનાની વિગતો મુજબ:
- કાવતરું: આરોપીઓએ ‘ઓવરસીઝ ગેટવે’ કંપનીની ફ્રેન્ચાઈઝી લઈ ગાંધીનગરમાં ઓફિસ ખોલી હતી.
- છેતરપિંડી: વર્ષ 2020 થી 2024 દરમિયાન કુલ 60 ક્લાયન્ટ્સ પાસેથી કેનેડાના વિઝા અપાવવાના બહાને એડવાન્સ પેટે રૂ. 7,48,24,000/- મેળવ્યા હતા.
- બનાવટી દસ્તાવેજો: આરોપીઓએ કેનેડાની નામી કંપનીઓ જેવી કે Dragon E Bike, McDonald’s અને Evergreen Canada ના નામે ખોટા LMIA (Labour Market Impact Assessment) લેટરો અને એન્ડોર્સમેન્ટ લેટરો બનાવ્યા હતા.
- ભવિષ્ય સાથે ચેડા: આ નકલી દસ્તાવેજોનો અસલ તરીકે ઉપયોગ કરી કેનેડા એમ્બેસીમાં ફાઈલો સબમિટ કરાવી ક્લાયન્ટ્સના ભવિષ્ય સાથે છેડા કર્યા હતા.
✍️આગળની કાર્યવાહી
આ ગુનાની તપાસ ગાંધીનગર CID ક્રાઈમ (EOW) દ્વારા કરવામાં આવી રહી હોવાથી, વડોદરા ક્રાઈમ બ્રાન્ચે આરોપીની અટકાયત કરી ગાંધીનગર પોલીસને સોંપવાની તજવીજ હાથ ધરી છે.
🧐આરોપીની વિગત:
- નામ: તલ્વીન્દર દારાસસિંગ સંધુ
- સરનામું: ગુરૂનાનકનગર, નતાશા પાર્ક પાસે, નિઝામપુરા, વડોદરા.
- કલમો: IPC 406, 409, 465, 467, 468, 471, 120(B).
