VMC ચૂંટણી ટાણે કામની ઉતાવળમાં તંત્રની બેદરકારી! વડોદરામાં 14 પૈડાની ટ્રક જમીનમાં ગરકાવ

પાલિકાની ચૂંટણીના પડઘમ વાગી રહ્યા છે ત્યારે વડોદરા કોર્પોરેશન અધૂરા કામો પૂરા કરવા રઘવાયું બન્યું છે. પરંતુ આ ઉતાવળ હવે જનતા માટે મુસીબત બની રહી છે. રાજમહેલ રોડ પર ખોદાયેલા ખાડાનું યોગ્ય પુરાણ ન થતા 14 પૈડાની તોતિંગ ટ્રક જમીનમાં ફસાઈ ગઈ હતી, જેના કારણે આખા વિસ્તારમાં પાણી પુરવઠો ખોરવાયો છે અને લોકોમાં ભારે રોષ જોવા મળી રહ્યો છે.

📍ઘટનાની વિગતો:

અકોટા વિધાનસભા હેઠળના વોર્ડ નંબર 13માં આવતા રાજમહેલ રોડ, ખાડિયા પોળ-2 પાસે આ ઘટના બની છે. અહીં છેલ્લા કેટલાક સમયથી પાણીની પાઈપલાઈન નાખવાની કામગીરી ચાલી રહી છે. ચૂંટણી નજીક હોવાથી કામ ઝડપથી પતાવવાની લ્હાયમાં ખોદાયેલા ખાડાઓનું યોગ્ય પુરાણ કરવામાં આવ્યું નહોતું.

❓કેવી રીતે બની ઘટના?

આજે આ માર્ગ પરથી સિમેન્ટ ભરેલી 14 પૈડાની ભારેખમ ટ્રક પસાર થઈ રહી હતી. કાચા પુરાણવાળા રોડ પર ટ્રક આવતા જ જમીન બેસી ગઈ હતી અને ટ્રકનું પાછળનું ટાયર અંદર ગરકાવ થઈ ગયું હતું. આ અકસ્માતને કારણે નીચેથી પસાર થતી પાણીની નવી લાઈન તૂટી ગઈ હતી.

🚰વિસ્તારમાં જળ સંકટ:

લાઈન તૂટતા જ લાખો લિટર પાણીનો વેડફાટ થયો હતો અને સમગ્ર વિસ્તારમાં પાણી પુરવઠો ખોરવાઈ ગયો હતો. સ્થાનિક રહીશોને પીવાના પાણી માટે ભારે હાલાકીનો સામનો કરવો પડી રહ્યો છે. જોકે, કોન્ટ્રાક્ટરના માણસોનું કહેવું છે કે તેમણે ભારે વાહનોને પસાર ન થવા સૂચના આપી હતી, છતાં ટ્રક ત્યાંથી પસાર થઈ હતી.

👉નેતાની પ્રતિક્રિયા અને તંત્ર પર પ્રહાર

ઘટનાની જાણ થતા જ સ્થાનિક કાઉન્સિલર જાગૃતિબેન કાકા દોડી આવ્યા હતા. તેમણે જાહેરમાં તંત્રની પોલ ખોલતા જણાવ્યું હતું કે:

• ​આ ઘટના માટે સીધી રીતે એન્જિનિયરોની બેદરકારી જવાબદાર છે.
• ​કામગીરી દરમિયાન યોગ્ય સુપરવિઝન કરવામાં આવ્યું નથી.
• ​આ બાબતે મ્યુનિસિપલ કમિશનરને રજૂઆત કરી જવાબદાર અધિકારીઓ સામે કડક કાર્યવાહીની માંગ કરવામાં આવશે.

🫵ચુટણી પહેલા વાહવાહી લૂંટવા માટે ઉતાવળે કરવામાં આવતા કામો કેટલા જોખમી હોઈ શકે છે તેનું આ જીવંત ઉદાહરણ છે. હવે જોવાનું એ રહેશે કે તંત્ર આ લાઈન ક્યારે રિપેર કરે છે અને જવાબદારો સામે શું પગલાં લેવાય છે.