રૂ. 1,300 કરોડનો હાઈવે પાણીમાં: છોટાઉદેપુરમાં NH 56 ની નબળી કામગીરીની પ્રથમ વરસાદમાં જ પોલ ખુલી

• રૂ. 1,300 કરોડના કામની પોલ: NH 56 ના કામમાં પાણીના નિકાલની વ્યવસ્થા ન હોવાથી સર્જાઈ મુશ્કેલી.
• ગામ સંપર્કવિહોણું: લુણાદરા ગામનો મુખ્ય રસ્તો પાણીમાં ગરકાવ થતા 1200 લોકો મુશ્કેલીમાં.
• ખેડૂતોને મોટું નુકસાન: હાઈવેના પાણી ખેતરોમાં ઘૂસતા હજારો વીઘામાં વાવેલું બિયારણ ધોવાઈ ગયું.
• પ્રિ-મોન્સૂન કામગીરીના દાવાઓ ખોખલા: અધિકારીઓની ગેરહાજરી અને આયોજન વગરની કામગીરી સામે સ્થાનિકોમાં રોષ.

છોટાઉદેપુર: મેઘરાજાની ધમાકેદાર એન્ટ્રી સાથે જ છોટાઉદેપુર જિલ્લાના તંત્ર અને કોન્ટ્રાક્ટરોની પ્રી-મોન્સૂન કામગીરીના ધજાગરા ઉડી ગયા છે. નસવાડીથી બોડેલી વચ્ચે રૂ. 1,300 કરોડના અધધ ખર્ચે બની રહેલા નેશનલ હાઈવે ૫૬ (NH 56) ની નબળી કામગીરી પ્રથમ વરસાદમાં જ છતી થઈ ગઈ છે. હાઈવે બનાવવા માટે કરેલા માટી પુરાણ અને પાણીના નિકાલની યોગ્ય વ્યવસ્થાના અભાવે અનેક વિસ્તારોમાં પૂર જેવી સ્થિતિ સર્જાઈ છે.

⚠️લુણાદરા ગામ મુશ્કેલીમાં:

બોડેલી તાલુકાનું લુણાદરા ગામ હાલ સંપર્કવિહોણું બન્યું છે. ગામમાં જવા માટેનો એકમાત્ર મુખ્ય રસ્તો પાણીમાં ગરકાવ થઈ ગયો છે. 1200 ની વસ્તી ધરાવતા આ ગામમાં જો કોઈ મેડિકલ ઈમરજન્સી સર્જાય તો ગ્રામજનોની શું હાલત થશે, તે મોટો સવાલ છે. હાઈવેની કામગીરી દરમિયાન નિકાલની કોઈ વ્યવસ્થા ન કરાતા આ માર્ગ બંધ થઈ ગયો છે.

🌊ખેતરો બન્યા તળાવ:

નસવાડી અને કોસીંદ્રા વચ્ચે તો સ્થિતિ વધુ ગંભીર છે. હાઈવેની આજુબાજુ ગટર કે ગરનાળા ન હોવાને કારણે વરસાદી પાણી સીધા ખેડૂતોના ખેતરોમાં ઘૂસી ગયા છે. મોંઘા બિયારણ લાવીને કરેલી વાવણી પાણીમાં ધોવાઈ જતાં ખેડૂતોમાં ભારે આક્રોશ છે. ખેડૂતોનું કહેવું છે કે, તંત્રની આયોજન વગરની કામગીરીએ જગતના તાતને પડતા પર પાટું માર્યું છે.

🧐તંત્રની મૌન સેવી રહેલી ભૂમિકા:

પ્રથમ વરસાદમાં જ કવાંટના પાનવડ ગામમાં ડાયવર્ઝન ધોવાઈ જવું અને રસ્તા બંધ થઈ જવા એ તંત્રની પોલ ખોલે છે. સાતેય તાલુકાઓમાં વરસાદી માહોલ જામ્યો છે, પરંતુ હાઈવેના કોન્ટ્રાક્ટરો અને જવાબદાર એન્જિનિયરોએ સ્થળ તપાસ કરવાની પણ તસદી લીધી નથી. સ્થાનિકો હવે વહેલી તકે પાણીના નિકાલની વ્યવસ્થા અને જવાબદારો સામે કાર્યવાહીની ઉગ્ર માંગ કરી રહ્યા છે.