રેસકોર્સના આકાશગંગા એપાર્ટમેન્ટમાં ગેસ લીકેજને કારણે લાગી આગ.
- ચા બનાવતી વખતે અચાનક ભભૂકી આગ: ત્રીજા માળે ફસાયા હતા જીવ.
- હોસ્પિટલમાં નોકરી કરતી 15 યુવતીઓએ સમયસૂચકતા વાપરી જીવ બચાવ્યો.
- વાડી ફાયર બ્રિગેડની ટીમે ઘટનાસ્થળે પહોંચી સ્થિતિ પર કાબૂ મેળવ્યો.
વડોદરાના પોશ ગણાતા રેસકોર્સ વિસ્તારમાં આજે સવારે એક મોટી દુર્ઘટના ઘટતા રહી ગઈ છે. અહીં આવેલા એક એપાર્ટમેન્ટમાં ગેસ સિલિન્ડર લીકેજ થવાના કારણે આગ લાગી હતી. જોકે, રૂમમાં હાજર 15 યુવતીઓની હિંમત અને સમયસૂચકતાને કારણે કોઈ મોટી જાનહાનિ થઈ નથી.
વડોદરાના રેસકોર્સ વિસ્તારમાં વાણિજ્ય ભવન પાસે આવેલા **’આકાશ ગંગા એપાર્ટમેન્ટ‘**માં આજે સવારે અફરાતફરીનો માહોલ સર્જાયો હતો. એપાર્ટમેન્ટના ત્રીજા માળે આવેલા એક ફ્લેટમાં ખાનગી હોસ્પિટલમાં ફરજ બજાવતી 15 જેટલી યુવતીઓ સાથે રહે છે.
આજે સવારે જ્યારે યુવતીઓ ચા બનાવી રહી હતી, તે દરમિયાન અચાનક ગેસ સિલિન્ડરમાં લીકેજ થતાં આગ ભભૂકી ઉઠી હતી. જોતજોતામાં આગના ભડકા અને ધુમાડાથી આખો રૂમ ભરાઈ ગયો હતો. અચાનક લાગેલી આગને જોઈને યુવતીઓ ગભરાઈ ગઈ હતી અને બૂમાબૂમ કરી મૂકી હતી. પરંતુ ગભરાવાને બદલે યુવતીઓએ તાત્કાલિક રૂમની બહાર દોડી જઈ પોતાનો જીવ બચાવ્યો હતો.
ફાયર બ્રિગેડની કામગીરી:
ઘટનાની જાણ થતા જ વાડી ફાયર બ્રિગેડનો કાફલો ઘટનાસ્થળે પહોંચી ગયો હતો. ફાયર ફાઇટરો જ્યારે રૂમમાં પ્રવેશ્યા ત્યારે ગેસ લીકેજ હજુ ચાલુ હતો અને ધુમાડાના ગોટેગોટા હતા. ફાયરની ટીમે અત્યંત સાવચેતીપૂર્વક સળગતો ગેસ સિલિન્ડર (કાબુલી સિલિન્ડર) ટેરેસ પર ખસેડ્યો હતો અને આગ પર કાબૂ મેળવ્યો હતો.
સ્થાનિકોના જણાવ્યા અનુસાર, જો યુવતીઓએ સમયસર રૂમ ખાલી ન કર્યો હોત અને ફાયર બ્રિગેડને જાણ ન કરી હોત, તો મોટી દુર્ઘટના સર્જાઈ શકી હોત. હાલમાં પરિસ્થિતિ સંપૂર્ણપણે નિયંત્રણમાં છે અને તમામ 15 યુવતીઓ સુરક્ષિત છે.
🫵નોંધ: ઘર કે હોસ્ટેલમાં ગેસ સિલિન્ડર વાપરતી વખતે હંમેશા રેગ્યુલેટર અને પાઇપ ચેક કરતા રહેવું હિતાવહ છે.
