વડોદરા: સમા વિસ્તારની કરોડોની ઘરફોડ ચોરીનો ભેદ ઉકેલાયો,74 લાખથી વધુનો મુદ્દામાલ જપ્ત.

વડોદરાના સમા વિસ્તારમાં થયેલી હાઈ-પ્રોફાઈલ ચોરીના કેસમાં ક્રાઈમ બ્રાન્ચને મોટી સફળતા હાથ લાગી છે. નંદનવન સોસાયટીમાં થયેલી 18 લાખની ચોરીનો ભેદ ઉકેલવા જતાં પોલીસે કરોડોનો મુદ્દામાલ રિકવર કર્યો છે અને બે રીઢા ગુનેગારોને દબોચી લીધા છે.

વડોદરા શહેરના સમા વિસ્તારની નંદનવન સોસાયટીમાં થોડા સમય પહેલા તસ્કરોએ ત્રાટકીને રૂ. 18 લાખની ચોરીને અંજામ આપ્યો હતો. આ કેસની ગંભીરતાને જોતા ક્રાઈમ બ્રાન્ચે CCTV ફૂટેજ, ટેકનિકલ સર્વેલન્સ અને હ્યુમન સોર્સની મદદથી તપાસનો ધમધમાટ શરૂ કર્યો હતો.

👇ક્રાઈમ બ્રાન્ચની કાર્યવાહીની વિગતો:

• ઝડપાયેલા આરોપી: તપાસના અંતે પોલીસે મુખ્ય આરોપી પ્રહલાદ ઉર્ફે પ્રદીપ ઉર્ફે નિખીલ કિશનલાલ દધીચ અને તેના સાગરીત સુરેશ ઉર્ફે રાજવીર દેવનારાયણ સેનને ઝડપી પાડ્યા છે.
• જંગી મુદ્દામાલ જપ્ત: આરોપીઓ પાસેથી સોના-ચાંદીના દાગીના, રોકડ રકમ અને મોબાઈલ ફોન મળીને કુલ રૂ. 74,30,644નો મુદ્દામાલ કબજે કરવામાં આવ્યો છે.
• એક સાથે 4 ભેદ ઉકેલાયા: આ બંને આરોપીઓની ધરપકડ બાદ શહેરમાં થયેલી અન્ય 3 ચોરીઓ સહિત કુલ 4 ઘરફોડ ચોરીના ગુનાઓ પરથી પડદો ઊંચકાયો છે.

🚨પોલીસના જણાવ્યા અનુસાર, આ બંને આરોપીઓ અત્યંત પ્રોફેશનલ રીતે ચોરીની ઘટનાને અંજામ આપતા હતા. બંધ મકાનોને નિશાન બનાવી ગણતરીની મિનિટોમાં હાથફેરો કરી લેવાની તેમની પદ્ધતિથી પોલીસ પણ ચોંકી ઉઠી છે

👮વડોદરા ક્રાઈમ બ્રાન્ચની આ કામગીરીથી રીઢા ગુનેગારોમાં ફફડાટ ફેલાઈ ગયો છે. લાખોની ચોરીના ભેદ ઉકેલાતા સમા વિસ્તારના રહીશોએ પણ હાશકારો અનુભવ્યો છે. હાલ પોલીસ આરોપીઓના રિમાન્ડ મેળવી તેમની પૂછપરછ કરી રહી છે કે જેમાં અન્ય મોટા ગુનાઓ ઉકેલાવાની પણ શક્યતા છે.