વડોદરા ક્રાઇમ બ્રાન્ચનો સપાટો: વિદેશી સ્ટેરોઇડ્સ અને હોર્મોન ઇન્જેક્શનનો જથ્થો ઝડપાયો.

માંજલપુરમાં ‘મસલ ગેઈન’ના નામે સ્વાસ્થ્ય સાથે ખતરનાક ચેડાં, લાખોના પ્રતિબંધિત ઇન્જેક્શન ઝડપાયા

• માંજલપુરના ‘સિદ્ધિ ન્યુટ્રીશિયન’ સ્ટોર પર દરોડો, અમીષ કોરીની ધરપકડ.
• રશિયા અને ઓસ્ટ્રેલિયાથી મગાવાતી હતી પ્રતિબંધિત દવાઓ, કોઈ પણ બિલ વગર થતું હતું વેચાણ.
• મસલ ગેઇન કરવાની લાલચ આપી યુવાનોના સ્વાસ્થ્ય સાથે ચેડાં કરતું નેટવર્ક ઝડપાયું.
  

વડોદરામાં બોડી બિલ્ડિંગના શોખીન યુવાનો માટે લાલબત્તી સમાન કિસ્સો સામે આવ્યો છે. ટૂંકા સમયમાં કસરત વગર મસલ બનાવવાની ઘેલછા રાખતા યુવાનોને શારીરિક રીતે નુકસાન પહોંચાડતા કાળા કારોબારનો ક્રાઇમ બ્રાન્ચે પર્દાફાશ કર્યો છે. માંજલપુર વિસ્તારમાં ચાલતી એક ન્યુટ્રીશિયન શોપમાંથી લાખો રૂપિયાની પ્રતિબંધિત દવાઓ જપ્ત કરવામાં આવી છે.

👉કબજે કરવામાં આવેલ મુદ્દામાલ 👇

વડોદરા ક્રાઇમ બ્રાન્ચને બાતમી મળી હતી કે માંજલપુર તુલસીધામ ચાર રસ્તા પાસે આવેલા ‘દેવ પુષ્પ કોમ્પ્લેક્સ’ માં ‘સિદ્ધિ ન્યુટ્રીશિયન’ નામની દુકાનમાં ગેરકાયદે શક્તિવર્ધક દવાઓ વેચાઈ રહી છે. આ બાતમીના આધારે ટીમે દરોડો પાડતા દુકાન માલિક અમીષ અશોકકુમાર કોરી ની ધરપકડ કરવામાં આવી છે.

તપાસ દરમિયાન દુકાનમાંથી રશિયા અને ઓસ્ટ્રેલિયા જેવા દેશોમાંથી આયાત કરેલી સ્ટેરોઇડ ટેબ્લેટ્સ અને ટેસ્ટોસ્ટેરોન હાર્મોન ઇન્જેક્શનનો મોટો જથ્થો મળી આવ્યો છે. ક્રાઇમ બ્રાન્ચે જ્યારે આ દવાઓના બિલ કે તબીબી પ્રિસ્ક્રિપ્શન માંગ્યા, ત્યારે આરોપી પાસે કોઈ પણ આધારભૂત દસ્તાવેજ મળ્યા નહોતા. કુલ 2.83 લાખ રૂપિયાનો મુદ્દામાલ કબ્જે કરી આગળની કાર્યવાહી માટે આરોપીને માંજલપુર પોલીસ મથકે સોંપવામાં આવ્યો છે.

પોલીસના જણાવ્યા અનુસાર, આરોપી યુવાનોને ઓછા સમયમાં બોડી બનાવી આપવાની લાલચ આપી આ ખતરનાક દવાઓ પધરાવતો હતો, જે માનવ સ્વાસ્થ્ય માટે અત્યંત હાનિકારક છે. ક્રાઇમ બ્રાન્ચે યુવાનોને અપીલ કરી છે કે ડૉક્ટરની સલાહ વગર આવી કોઈ પણ દવાઓનું સેવન ન કરવું.