- મોટી કાર્યવાહી: અમદાવાદની રામોલ પોલીસે વોર્ડ નંબર 15ના કોંગ્રેસના કોર્પોરેટર આશિષ જોશીની કરી ધરપકડ.
- જૂનો કેસ, નવી આફત: ચૂંટણી સમયના પ્રોહિબિશન (દારૂ) ના કેસમાં સંખેડા પોલીસ મથકે નોંધાયેલા ગુના સંદર્ભે એક્શન.
- વકીલનો ગંભીર આક્ષેપ: વડોદરા કોર્પોરેશનની પ્રથમ સામાન્ય સભામાં આશિષ જોશી ગેરહાજર રહે અને સભ્યપદ રદ થાય તેવું કાવતરું – હિતેશ ગુપ્તા.
- કોંગ્રેસનો હલ્લાબોલ: હરણીકાંડમાં ન્યાય માંગતા અને ભ્રષ્ટાચાર ખુલ્લો પાડતા કોર્પોરેટરને નિશાન બનાવાયા – હેમાંગ રાવલ.
વડોદરા/અમદાવાદ: વડોદરા મહાનગરપાલિકાના વોર્ડ નંબર 15માં ભાજપના ગઢમાં ભવ્ય જીત મેળવનાર કોંગ્રેસના કોર્પોરેટર આશિષ જોશીની અમદાવાદથી ધરપકડ કરવામાં આવતા રાજકીય ગરમાવો જોવા મળી રહ્યો છે. અમદાવાદની રામોલ પોલીસે લોકેશનના આધારે વોચ ગોઠવી આશિષ જોશીની અટકાયત કરી છે અને ત્યારબાદ તેમને સંખેડા પોલીસને સોંપવામાં આવ્યા છે.
❓શું છે સમગ્ર વિવાદ?
મળતી માહિતી મુજબ, સ્થાનિક સ્વરાજની ચૂંટણી દરમિયાન સંખેડા પોલીસ મથકે દારૂનો એક ગુનો નોંધાયો હતો. આ કેસની તપાસ દરમિયાન એક પકડાયેલા બુટલેગરે આશિષ જોશીનું નામ આપતા પોલીસ દ્વારા આ કાર્યવાહી કરવામાં આવી છે. આશિષ જોશી જ્યારે અમદાવાદમાં તેમના સંબંધીને ત્યાં જઈ રહ્યા હતા ત્યારે પોલીસે તેમને ઝડપી લીધા હતા.
🧐રાજકીય કાવતરાના આક્ષેપ:
આ ધરપકડ બાદ આશિષ જોશીના વકીલ હિતેશ ગુપ્તાએ સનસનીખેજ આક્ષેપ કર્યો છે. તેમણે જણાવ્યું કે, વડોદરા મહાનગર સેવાસદનની પ્રથમ સામાન્ય સભા ટૂંક સમયમાં મળનાર છે. જો આશિષ જોશી આ સભામાં ગેરહાજર રહે તો તેમનું સભ્યપદ રદ થઈ શકે છે. આ જ સંજોગો ઊભા કરવા માટે આ ધરપકડ એક પૂર્વઆયોજિત કાવતરું હોય તેમ લાગી રહ્યું છે.
🗣️[કોંગ્રેસના આકરા પ્રહારો]
ગુજરાત પ્રદેશ કોંગ્રેસના પ્રવક્તા હેમાંગ રાવલે ભાજપ સરકાર અને પોલીસ તંત્રને આડેહાથ લેતા જણાવ્યું કે, “આશિષ જોશીએ ભાજપના ધારાસભ્યના ગઢમાં જીત મેળવી છે અને તેઓ હરણીકાંડના પીડિતોને ન્યાય અપાવવા મક્કમ હતા, એટલે જ તેમને નિશાન બનાવાયા છે. જો બુટલેગર કોઈ ભાજપના મંત્રીનું નામ આપે તો શું પોલીસ આવી જ તત્પરતા બતાવશે?” કોંગ્રેસે આક્ષેપ કર્યો છે કે દારૂ ક્યાંથી આવ્યો તેની તપાસ કરવાને બદલે ભ્રષ્ટાચાર ખુલ્લો પાડનારા લોકપ્રતિનિધિને હેરાન કરવામાં આવી રહ્યા છે.
🫵આ ધરપકડને પગલે વડોદરા અને અમદાવાદના રાજકીય વર્તુળોમાં ભારે ચર્ચા જાગી છે. કોંગ્રેસે આગામી દિવસોમાં આ મામલે કાયદાકીય લડત આપવાની ચીમકી ઉચ્ચારી છે. હવે જોવાનું એ રહેશે કે આશિષ જોશી કોર્પોરેશનની પ્રથમ સભામાં હાજર રહી શકશે કે કેમ.
