વડોદરા-અંકલેશ્વર હાઈવે પર અકસ્માતોનું જોખમ વધ્યું: નિર્માણ કાર્યમાં સૂચના બોર્ડ, ડાયવર્ઝન અને વર્ક પ્રોગ્રેસ બોર્ડનો અભાવ

• સુરક્ષા બોર્ડનો અભાવ: વડોદરા-અંકલેશ્વર હાઈવે પર નિર્માણ કાર્ય દરમિયાન ડાયવર્ઝન અને સૂચના બોર્ડ ન હોવાથી અકસ્માતો વધ્યા.
• કેન્દ્રીય મંત્રીને રજૂઆત: વાહનચાલકોની સલામતી માટે કેન્દ્રીય પરિવહન મંત્રી નીતિન ગડકરી સમક્ષ તાત્કાલિક હસ્તક્ષેપની માંગ કરાઈ.
• રાત્રિના સમયે વધુ જોખમ: ભરૂચથી અંકલેશ્વર પંથકમાં માર્ગની સ્થિતિ અજાણ હોવાને કારણે રાત્રે અકસ્માતોની સંભાવના સૌથી વધુ.
• કદક વ્યવસ્થાની માગ: હાઈવે પર વર્ક પ્રોગ્રેસ અને ડાયવર્ઝન બોર્ડ યોગ્ય અંતરે લગાવીને રાત્રે દેખાય તેવી રિફ્લેક્ટર વ્યવસ્થા ગોઠવવા તાકીદ.

વડોદરાથી અંકલેશ્વર સુધીના દિલ્હી-મુંબઈ હાઈવે પર હાલ ચાલી રહેલી માર્ગ નિર્માણ અને સમારકામની કામગીરી દરમિયાન વહીવટી તંત્ર અને હાઈવે ઓથોરિટીની ગંભીર બેદરકારી સામે આવી છે. માર્ગ પર જરૂરી સુરક્ષા વ્યવસ્થાઓ, ચેતવણી બોર્ડ અને ડાયવર્ઝનની યોગ્ય માહિતીના અભાવે અકસ્માતોની ઘટનાઓમાં સતત વધારો થઈ રહ્યો છે. આ ગંભીર મુદ્દે વાહનચાલકોની સુરક્ષા સુનિશ્ચિત કરવા માટે કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી સમક્ષ લેખિત રજૂઆત કરવામાં આવી છે.

પ્રાપ્ત વિગતો અનુસાર, વડોદરાથી અંકલેશ્વર વચ્ચે ખાસ કરીને ભરૂચથી અંકલેશ્વર પંથકમાં હાઈવેનું કામ પૂરઝડપે ચાલી રહ્યું છે. પરંતુ આશ્ચર્યની વાત એ છે કે કામગીરી ચાલી રહી છે તે સ્થળો પર વાહનચાલકોને સાવચેત કરવા માટે પૂરતાં સૂચના બોર્ડ કે સાઈન બોર્ડ લગાવવામાં આવ્યાં નથી. હાઈવે પર સતત દોડતા ભારે વાહનો અને હાઈ-સ્પીડ કારોને કારણે ડાયવર્ઝન કે રસ્તાના ફેરફારો અચાનક નજરે પડતા ગંભીર અકસ્માતો સર્જાઈ રહ્યા છે. આગળ રસ્તો બંધ છે કે કેમ, વાહનની ગતિ મર્યાદા કેટલી રાખવી અને કઈ દિશામાં વળવાનું છે તે અંગે કોઈ જ સ્પષ્ટતા ન હોવાથી વાહનચાલકો ભારે મૂંઝવણમાં મુકાય છે. ખાસ કરીને રાત્રિના સમયે અને અસ્પષ્ટ વાતાવરણમાં આ ખામી જીવલેણ સાબિત થઈ રહી છે.

રજૂઆતમાં માંગ કરવામાં આવી છે કે હાઈવે ઓથોરિટી દ્વારા તાત્કાલિક ધોરણે નિર્માણ સ્થળો પર ‘વર્ક પ્રોગ્રેસ બોર્ડ’, યોગ્ય અંતરે ‘ડાયવર્ઝન બોર્ડ’ તેમજ રાત્રિના સમયે પણ દૂરથી સ્પષ્ટ દેખાય તેવી રિફ્લેક્ટર યુક્ત ચેતવણી વ્યવસ્થા ગોઠવવામાં આવે. નિર્દોષ નાગરિકો અને મુસાફરોના અમૂલ્ય જીવ બચાવવા માટે તંત્ર આ મામલે વહેલી તકે સઘન પગલાં ભરે તેવી પ્રબળ લોકમાંગ ઉઠી છે.