- વડોદરા ક્રાઈમ બ્રાન્ચનો સપાટો: ચોરીના એક્ટિવા સાથે પાદરાના ‘ઇબ્બુ’ ને દબોચ્યો.
- હોસ્પિટલમાં વાહન ન મળતા બીજી ચાવી લગાડી એક્ટિવાની ઉઠાંતરી કરી હતી.
- રાવપુરા પોલીસ મથકનો 4 વર્ષ જૂનો વણઉકેલાયો ગુનો ડિટેક્ટ.
વડોદરા શહેરમાં વાહન ચોરીના ગુનાઓ અટકાવવા અને વણઉકેલાયા ગુનાઓ શોધી કાઢવા માટે પોલીસ કમિશનરની સૂચના હેઠળ ક્રાઈમ બ્રાન્ચ સતત પેટ્રોલિંગ કરી રહી છે. આ દરમિયાન ક્રાઈમ બ્રાન્ચની ટીમે 4 વર્ષ પહેલાં એસ.એસ.જી. હોસ્પિટલમાંથી થયેલી એક્ટિવાની ચોરીનો ભેદ ઉકેલી એક રીઢા ગુનેગારને ઝડપી પાડ્યો છે.
📌ઘટનાની વિગત:
ક્રાઈમ બ્રાન્ચની ટીમ કારેલીબાગ પાણીની ટાંકીથી કાસમઆલા ચાર રસ્તા તરફ પેટ્રોલિંગમાં હતી. તે દરમિયાન તુલસીવાડી પાસે એક શંકાસ્પદ એક્ટિવા ચાલકને રોકી તેની પૂછપરછ કરવામાં આવી હતી. ચાલક પાસે વાહનના કોઈ કાગળ કે આધાર-પુરાવા ન હોવાથી અને સંતોષકારક જવાબ ન મળતા પોલીસે એક્ટિવા કબજે કરી ઊંડાણપૂર્વક તપાસ હાથ ધરી હતી.
🧐ચોરીની કબૂલાત:
પકડાયેલા શખ્સની પૂછપરછમાં ચોંકાવનારો ખુલાસો થયો હતો. આરોપીએ જણાવ્યું હતું કે, આશરે ચારેક વર્ષ પહેલાં તે વડોદરા એસ.એસ.જી. હોસ્પિટલ ખાતે આવ્યો હતો. પરત જવા માટે કોઈ વાહન ન હોવાથી તેણે પાર્કિંગમાં પડેલા એક એક્ટિવાને પોતાની પાસેની ચાવી લગાડી હતી. નસીબજોગે લોક ખુલી જતા તે એક્ટિવા ચોરીને ફરાર થઈ ગયો હતો અને ત્યારથી તે આ ચોરીનું એક્ટિવા ફેરવતો હતો.
🚨ઝડપાયેલ આરોપી:
- ઇબ્રાહીમભાઇ ઉર્ફે ઇબ્બુ બશીરભાઇ મલેક (ઉં.વ. 46)
- રહેઠાણ: હસનપાર્ક, જાસપુર રોડ, પાદરા, વડોદરા.
👉ગુનાહિત ઇતિહાસ:
આરોપી ઇબ્બુ મલેક અગાઉ પણ ગુનાહિત પ્રવૃત્તિઓમાં સંડોવાયેલો છે. તેની સામે પાદરા પોલીસ મથકમાં જુગારધારાના બે ગુના અને મારામારીનો એક ગુનો મળી કુલ 3 ગુનાઓ અગાઉ નોંધાઈ ચૂક્યા છે.
👮પોલીસ કાર્યવાહી:
આ એક્ટિવા ચોરી અંગે રાવપુરા પોલીસ સ્ટેશનમાં વર્ષ 2026માં ગુનો નોંધાયેલ હતો. ક્રાઈમ બ્રાન્ચે ₹20,000ની કિંમતનું એક્ટિવા કબજે કરી આરોપીને વધુ તપાસ માટે રાવપુરા પોલીસને સોંપવાની તજવીજ હાથ ધરી છે.
