- ખંડણીની નવી ફરિયાદ: કેફે સંચાલક પાસેથી ૨ લાખ રૂપિયાની માંગણી કરી બદનામ કરવાની ધમકી આપી.
- દંપતીના કરતૂત: ડ્રગ્સના ખોટા કેસમાં ફસાવી દેવાની બીક બતાવી લોકોને આર્થિક રીતે ટોર્ચર કરવાનો આરોપ.
- વ્યાજખોરી અને ખંડણી: અગાઉ 3 લાખના બદલામાં 12 લાખ પડાવ્યાનો કેસ પહેલાથી જ નોંધાયેલો છે.
- સઘન તપાસ: પોલીસ રિમાન્ડ દરમિયાન દંપતીની ગેરકાયદે સંપત્તિ અને અન્ય પીડિતો અંગે તપાસ કરવામાં આવી રહી છે
વડોદરા: વડોદરા શહેરમાં ડ્રગ્સના વેચાણ અંગે વીડિયો વાયરલ કરીને સમાજસેવક હોવાનો ડોળ કરનાર તમન્ના સૈયદ અને તેના પતિ સોહેલ સૈયદ પોતે જ ગુનાહિત જાળમાં ફસાઈ ગયા છે. પઠાણી વ્યાજખોરીના કેસમાં પહેલેથી જ પોલીસ રિમાન્ડ પર રહેલા આ દંપતી સામે હવે ફતેગંજ વિસ્તારના એક કેફે સંચાલકે ખંડણીની વધુ એક ગંભીર ફરિયાદ સયાજીગંજ પોલીસ મથકે નોંધાવી છે.
❓શું છે નવો મામલો?
ફરિયાદી કેફે સંચાલક શેખ મોહમ્મદ ઝેદ મોહમ્મદ અયાઝના જણાવ્યા મુજબ, આરોપી દંપતીએ તેમની પાસે 2 લાખ રૂપિયાની ખંડણીની માંગણી કરી હતી. જો રૂપિયા ન મળે તો સોશિયલ મીડિયા પર ખોટા વીડિયો વાયરલ કરીને કેફે સંચાલકને બદનામ કરવાની અને કેફે બંધ કરાવી દેવાની ધમકીઓ આપવામાં આવી હતી. આ દબાણથી કંટાળીને અંતે કેફે સંચાલકે પોલીસનો સંપર્ક કર્યો હતો.
🚨ભૂતકાળમાં પણ કરી હતી આવી જ હેરાનગતિ:
આ આરોપી દંપતી અગાઉ આરીફ નામના વ્યક્તિ પાસેથી 3 લાખના વ્યાજ સામે 12 લાખ રૂપિયા પડાવી લેવા અને તેને ડ્રગ્સના કેસમાં ફસાવી દેવાની ધમકી આપવા બદલ પોલીસના સકંજામાં છે. આ કેસમાં પોલીસ રિમાન્ડ દરમિયાન એવું પણ બહાર આવ્યું છે કે સોહેલ સૈયદનો ગુનાહિત ઇતિહાસ લાંબો છે, જેમાં ખૂનની કોશિશ અને ઠગાઈ સહિતના ૭ ગંભીર ગુનાઓનો સમાવેશ થાય છે.
👮પોલીસની કડક તપાસ:
ક્રાઈમ બ્રાન્ચ હાલ આ દંપતીના રિમાન્ડ મેળવી રહી છે. પોલીસ એવી આશંકા સેવી રહી છે કે, આ દંપતીએ આવા અનેક નિર્દોષ વેપારીઓને ડરાવી-ધમકાવીને મોટી રકમ પડાવી છે અને ગેરકાયદે સંપત્તિ ઊભી કરી છે. આ દંપતીના નેટવર્કમાં અન્ય કોઈની સંડોવણી છે કે કેમ, તે દિશામાં પણ તપાસ તેજ કરવામાં આવી છે. એક તરફ ડ્રગ્સ વિરોધી ઝુંબેશ ચલાવતા હોવાનો દાવો કરનાર દંપતી જ પોતે ગુનાખોરીના રવાડે ચડ્યું હોવાનું સામે આવતા વડોદરામાં ભારે આશ્ચર્ય અને રોષ જોવા મળી રહ્યો છે.
