- સ્પર્ધાત્મક પરીક્ષાનો ખૌફ: સરકારી ભરતીમાં નિષ્ફળતાના ડરે 27 વર્ષીય સંદીપ પટેલે જિંદગી ટૂંકાવી.
- દવા પી ભાઈને કર્યો ફોન: “વાંચવામાં મન લાગતું નથી, હું સક્ષમ નથી” – અંતિમ ક્ષણોમાં ભાઈ પાસે ઠાલવી વ્યથા.
- મધ્યપ્રદેશથી વડોદરા આવ્યો હતો: એગ્રીકલ્ચર ગ્રેજ્યુએટ સંદીપ તૈયારી માટે ભાઈ પાસે રહેવા આવ્યો હતો.
- હોસ્પિટલમાં દમ તોડ્યો: ગોત્રી હોસ્પિટલમાં સારવાર દરમિયાન યુવાનનું નિધન; પરિવારમાં માતમ.
વડોદરા: આજના સમયમાં સરકારી નોકરી મેળવવાની ઘેલછા અને તેમાં નિષ્ફળ જવાનો ડર યુવાધનને કઈ હદે હતાશામાં ધકેલી રહ્યો છે, તેનો એક કરુણ કિસ્સો વડોદરાના ભાયલી વિસ્તારમાં પ્રકાશમાં આવ્યો છે. મધ્યપ્રદેશથી સરકારી પરીક્ષાની તૈયારી કરવા આવેલા 27 વર્ષીય યુવાને ઝેરી દવા પીને આપઘાત કરી લેતા અરેરાટી વ્યાપી ગઈ છે.
📌ઘટનાની વિગત:
મધ્યપ્રદેશના ખંડવા જિલ્લાના આરુદ ગામનો વતની સંદીપ પટેલ તેના ભાઈ રાજદીપ પાસે ભાયલીમાં રહેવા આવ્યો હતો. એગ્રીકલ્ચરમાં બી.એસ.સી. કરેલો સંદીપ અગાઉ એમ.પી.માં બેંકની પરીક્ષામાં નિષ્ફળ રહ્યો હતો. વધુ સારી તૈયારી માટે તેનો ભાઈ તેને વડોદરા લાવ્યો હતો, જ્યાં તે નિયમિતપણે ગોત્રીની લાઈબ્રેરીમાં વાંચવા જતો હતો.
🧐ભાઈને ફોન કરી કહી આ વાત:
ઘટનાની રાત્રે જ્યારે રાજદીપ વતનમાં હતો, ત્યારે સંદીપે તેને ફોન કરીને રડતા રડતા પોતાની મન:સ્થિતિ જણાવી હતી. સંદીપે કહ્યું હતું કે, “સરકારી પરીક્ષાની તૈયારી માટે વાંચવામાં મારું મન લાગતું નથી, મને લાગે છે કે હું કોઈ પરીક્ષા પાસ કરી શકીશ નહીં.” આટલું કહી તેણે ઝેરી દવા પી લીધી હોવાની અને પેટમાં દુખતું હોવાની વાત કરી હતી.
🚑સારવાર કારગત ન નીવડી:
રાજદીપે તાત્કાલિક વડોદરામાં રહેતા સંબંધીઓને જાણ કરી અને સંદીપને ગોત્રી સરકારી હોસ્પિટલ ખસેડવામાં આવ્યો હતો. જોકે, ટૂંકી સારવાર દરમિયાન જ આ આશાસ્પદ યુવાને જીવ ગુમાવ્યો હતો. પરિવાર જ્યારે વડોદરા પહોંચ્યો ત્યારે રસ્તામાં જ તેમને સંદીપના મોતના સમાચાર મળતા હૈયાફાટ રુદન કરી મૂક્યું હતું.
🫵સરકારી નોકરી જ જીવનનું અંતિમ લક્ષ્ય નથી, નિષ્ફળતાથી હારી જઈને લેવાયેલું આ પગલું એક આખા પરિવારને ક્યારેય ન ભરાય તેવું દુઃખ આપી જાય છે.
