- વિરાસતનું સંકટ: ગાયકવાડી સમયના લહેરીપુરા દરવાજા સહિતની ઐતિહાસિક ઈમારતો દબાણ હેઠળ છે.
- દબાણનું દૂષણ: હંગામી ધોરણે ધંધો કરતા લોકોએ ઐતિહાસિક સ્મારકને જ પોતાના સામાનનું કેન્દ્ર બનાવી દીધું છે.
- તંત્રની ઉદાસીનતા: વારંવારની ફરિયાદો બાદ પણ પાલિકાના ઉચ્ચ અધિકારીઓ દ્વારા કોઈ કાયમી ઉકેલ લાવવામાં આવતો નથી.
- લોક માંગ: ઐતિહાસિક ધરોહરની જાળવણી માટે કડક અને કાયમી દબાણ હટાવ ઝુંબેશની તાતી જરૂરિયાત છે.
વડોદરા: સંસ્કારી નગરી વડોદરાના હૃદયસમાન ગણાતા ચાર દરવાજા વિસ્તારમાં ગાયકવાડી શાસનકાળની ઐતિહાસિક ઈમારતો આજે પોતાની અસ્તિત્વની લડાઈ લડી રહી છે. ખાસ કરીને ન્યાય મંદિર પાસે આવેલા ઐતિહાસિક ‘લહેરીપુરા દરવાજા’ની આસપાસ થયેલા હંગામી દબાણોએ શહેરની ધરોહરને કદરૂપી બનાવી દીધી છે.
☝️શું છે સ્થિતિ?
લહેરીપુરા દરવાજા જેવા સ્મારકો પર બારેમાસ દબાણકર્તાઓનો કબજો જોવા મળે છે. પોતાનો ધંધો કરવા માટે આ દબાણકર્તાઓ ઐતિહાસિક દીવાલોને જ પોતાની દુકાન બનાવી બેઠા છે, જેના કારણે પ્રવાસીઓ અને સ્થાનિકો માટે આ વારસાને નિહાળવો મુશ્કેલ બની ગયો છે. સ્મારકની આસપાસ ફેલાયેલી ગંદકી અને સામાનના કારણે ઐતિહાસિક ઈમારતની જાળવણી પર ગંભીર પ્રશ્નાર્થ ચિહ્નો ઊભા થયા છે.
🧐તંત્રની નિષ્ક્રિયતા પર સવાલ:
સ્થાનિક લોકો દ્વારા વારંવાર પાલિકાના ઉચ્ચ અધિકારીઓ સમક્ષ રજૂઆત કરવામાં આવી છે, તેમ છતાં દબાણકર્તાઓ સામે કોઈ કાયમી કાર્યવાહી કરવામાં આવતી નથી. તંત્રની આ ‘નપાણિયા’ વલણને કારણે દબાણકર્તાઓના મનોબળ સતત વધી રહ્યા છે. ઐતિહાસિક ઈમારતોની જાળવણી કરવામાં પાલિકા તંત્ર સંપૂર્ણપણે નિષ્ક્રિય પુરવાર થઈ રહ્યું છે.
વડોદરાના ભવ્ય ઈતિહાસની સાક્ષી પૂરતા આ સ્મારકો શહેરની ઓળખ છે. જો પાલિકા તંત્ર વહેલી તકે કાયમી નિવેડો નહીં લાવે, તો આવનારી પેઢી કદાચ આ ઐતિહાસિક ધરોહરને માત્ર ફોટામાં જ જોઈ શકશે. ત્યારે હવે પ્રશ્ન એ છે કે, શું તંત્ર આ દબાણો દૂર કરીને શહેરની શાન બચાવશે કે પછી આ જ રીતે વિરાસતને દબાણો નીચે દબાયેલી રહેવા દેશે?
