ત્રિપુટીની ધરપકડ:પિતા, પુત્ર અને પુત્રીની એક ટોળકી 4.70 લાખના મુદ્દામાલ સાથે પાણીગેટ પોલીસના હાથે ઝડપાઈ ગઈ છે.
ઠગાઈ કરવાની રીત:આરોપીઓ ગ્રાહક બનીને દુકાનદારોને વાતોમાં ભોળવીને નજર ચૂકવીને ઇલેક્ટ્રોનિક્સ વસ્તુઓની ચોરી કરતા હતા.
સફળ રિકવરી:પોલીસે તપાસ દરમિયાન આરોપીઓના ઘરેથી ટીવી, પંખા, ઇસ્ત્રી અને અન્ય ઇલેક્ટ્રોનિક સામાન કબજે કર્યો છે.
જૂનો ગુનાહિત ઇતિહાસ:આરોપીઓ અગાઉ લક્ષ્મીપુરા અને માંજલપુર પોલીસ સ્ટેશનમાં છેતરપિંડીના ગુનામાં પોલીસ ચોપડે ચડી ચૂક્યા છે.
વડોદરા: વડોદરા શહેરમાં દુકાનદારોને પોતાની વાતોમાં ભોળવીને નજર ચૂકવીને ચોરી કરતી એક આખી ટોળકીને પાણીગેટ પોલીસે ઝડપી પાડી છે. પિતા, પુત્ર અને પુત્રીની આ ત્રિપુટી અત્યાર સુધીમાં અનેક શોરૂમોને નિશાન બનાવી ચૂકી હોવાનું સામે આવ્યું છે. પોલીસે આ આરોપીઓના ઘરેથી 4.70 લાખથી વધુનો મુદ્દામાલ કબજે કરી સમગ્ર પ્રકરણનો પર્દાફાશ કર્યો છે.
❓શું હતી મોડસ ઓપરેન્ડી?
આરોપીઓ મૂળ રાજકોટ ના હાલ વડોદરા રહે,પિયુષ ઝાલા, રાજુભાઈ ઝાલા અને મોનિકા ઝાલા ગ્રાહક બનીને ઇલેક્ટ્રોનિક્સ શોરૂમમાં પ્રવેશતા હતા. તેઓ દુકાનદારને પોતાની વાતોમાં એટલા મગ્ન કરી દેતા કે દુકાનદારનું ધ્યાન હટી જતું અને આ સમયનો લાભ લઈને તેઓ સામાનની ચોરી કરી લેતા હતા. ગત 30 મેના રોજ ગણેશનગર સ્થિત ‘એઆર ડિજિટલ ઇલેક્ટ્રોનિક્સ’ શોરૂમમાંથી બે ટીવીની ચોરી થયા બાદ દુકાનદારની ફરિયાદના આધારે પાણીગેટ પોલીસે તપાસ શરૂ કરી હતી.
👮પોલીસની ઝીણવટભરી તપાસ અને સફળતા
પોલીસ ઈન્સ્પેક્ટર એ.બી. પટેલની ટીમે આસપાસના સીસીટીવી કેમેરાની તપાસ કરતા આ ત્રિપુટી મોપેડ પર ટીવી લઈ જતી નજરે પડી હતી. ટેકનિકલ સર્વેલન્સ અને બાતમીના આધારે પોલીસે વાઘોડિયા રોડ સ્થિત ગોકુલેશ સિટીમાં દરોડો પાડ્યો હતો. જ્યાંથી ચોરી કરેલા 2 ટીવી, પંખા, ઇસ્ત્રી અને તેલના ડબ્બા, પાણીની મોટર જેવો લાખોનો માલ સામાન મળી આવ્યો હતો. પૂછપરછમાં આરોપીઓ સંતોષકારક જવાબ ન આપી શકતા તેમની ધરપકડ કરવામાં આવી હતી.
🚨ગુનાહિત ઇતિહાસ અને કાયદાકીય કાર્યવાહી
આરોપીઓ માત્ર આટલેથી જ અટક્યા નહોતા, તપાસમાં જાણવા મળ્યું કે આ ટોળકી અગાઉ લક્ષ્મીપુરા અને માંજલપુર પોલીસ સ્ટેશનમાં વિશ્વાસઘાત અને છેતરપિંડીના ગુનાઓમાં પણ પકડાઈ ચૂકી છે. હાલ પાણીગેટ અને મકરપુરા પોલીસ સ્ટેશનમાં નોંધાયેલા ગુનાઓમાં આ આરોપીઓની ધરપકડ કરવામાં આવી છે. આ ત્રિપુટીએ વડોદરાના અન્ય કયા વિસ્તારોમાં હાથ સાફ કર્યા છે, તે દિશામાં પોલીસે તપાસના ચક્રો ગતિમાન કર્યા છે.
