વડોદરાના તરસાલીમાં પાલિકાની દબાણ હટાવો ઝુંબેશ વિવાદમાં: “પહેલા પ્લોટ આપો પછી બુલડોઝર ફેરવો”, જમીન માલિકના ગંભીર આક્ષેપો

વડોદરાના દક્ષિણ વિસ્તારમાં આવેલા તરસાલી ટીપી 43 પાસે આજે પાલિકાની દબાણ શાખાની કામગીરી દરમિયાન ભારે હોબાળો મચી ગયો હતો. હાઈવેને સમાંતર 12 મીટરના રોડ પર નડતરરૂપ પતરાના કાચા ગેરેજને તોડી પાડવાની કાર્યવાહી સામે જમીન માલિકે મોરચો માંડ્યો છે અને બિલ્ડરોના ઈશારે આ કામગીરી થતી હોવાના ગંભીર આક્ષેપો કર્યા છે.

📌જમીન માલિકનો વિરોધ અને આક્ષેપો:

દબાણ હટાવવાની કામગીરી દરમિયાન જમીન માલિકે તંત્ર સામે બાંયો ચઢાવતા આકરા સવાલો કર્યા હતા. જમીન માલિકનું કહેવું છે કે:

• “આ જમીન મારી માલિકીની છે, છતાં તંત્ર દ્વારા ગેરકાયદેસર રીતે બુલડોઝર ફેરવવામાં આવી રહ્યું છે.”
• “પાલિકાએ હજુ સુધી મને મારો ‘ફાઇનલ પ્લોટ’ ફાળવ્યો નથી. જ્યાં સુધી મને મારો પ્લોટ ન મળે ત્યાં સુધી મારી જમીન પર કોઈ કાર્યવાહી થઈ શકે નહીં.”
• જમીન માલિકે વધુમાં આક્ષેપ કર્યો હતો કે પાલિકાના અધિકારીઓ બિલ્ડરોના ઇશારે કામ કરી રહ્યા છે અને ચોક્કસ ફાયદો પહોંચાડવા માટે આ દબાણો દૂર કરવામાં આવી રહ્યા છે.

➡️ પાલિકાની કાર્યવાહી:

બીજી તરફ, પાલિકાની દબાણ શાખાના મતે, ટીપી 43 ને સમાંતર હાઈવે નજીકનો આ 12 મીટરનો રોડ રસ્તો જાહેર જનતા માટે છે. છેલ્લા કેટલાય સમયથી પતરાના શેડ બનાવીને ઉભા કરવામાં આવેલા આ ગેરેજને કારણે રસ્તો બ્લોક થતો હતો, જેને પગલે આજે ચારે બાજુના પતરા દૂર કરી રસ્તો ખુલ્લો કરવામાં આવ્યો છે.

🛑 એક તરફ પાલિકા રસ્તો ખુલ્લો હોવાનો દાવો કરી રહી છે, તો બીજી તરફ જમીન માલિકે પોતાની હક્ક-હિસ્સાની જમીન અને ફાઇનલ પ્લોટના મુદ્દે ન્યાયની માંગ કરી છે. બિલ્ડરો અને પાલિકાની મિલીભગતનો આક્ષેપ લાગતા હવે આ મામલો વધુ ગરમાય તેવી શક્યતા છે.