વડોદરામાં ટ્રાન્સપોર્ટની આડમાં દારૂની હેરાફેરીનો પર્દાફાશ! 3.74 લાખનો જથ્થો ઝડપાયો

🚨વડોદરા શહેરમાં દારૂની હેરાફેરી માટે હવે ટ્રાન્સપોર્ટના ધંધાનો પણ ઉપયોગ થતો હોવાનો વધુ એક કિસ્સો સામે આવ્યો છે. કારેલીબાગ વિસ્તારમાં આવેલી એક ટ્રાન્સપોર્ટ ઓફિસમાંથી પોલીસે રૂ. 3.74 લાખની કિંમતનો વિદેશી દારૂનો મોટો જથ્થો ઝડપી પાડ્યો છે અને ચાર આરોપીઓની અટકાયત કરી છે.

🏢 ટ્રાન્સપોર્ટ ઓફિસમાં દરોડો

✓ પોલીસને બાતમી મળી હતી કે, કારેલીબાગ બહુચરાજી રોડ પર, ખાસવાડી સ્મશાન ગૃહ પાસે આવેલી ગુજરાત ગુડ્સ સર્વિસ નામની ટ્રાન્સપોર્ટ ઓફિસમાં દારૂનો જથ્થો મોકલવામાં આવ્યો છે. આ વિગતોના આધારે પોલીસે તાત્કાલિક દરોડો પાડ્યો હતો.

✓ દરોડા દરમિયાન પોલીસે ટ્રાન્સપોર્ટ ઓફિસમાંથી વિદેશી દારૂની 1152 બોટલ જપ્ત કરી હતી, જેની કિંમત આશરે રૂ. 3,74,400 થાય છે.

👥 ચાર આરોપીઓની અટકાયત

પોલીસે ઘટનાસ્થળેથી દારૂના જથ્થાની હેરાફેરી અને વહીવટમાં સંડોવાયેલા ચાર આરોપીઓને રંગેહાથ ઝડપી પાડ્યા હતા:

• સંદીપ લાલજી પરમાર (રહે. વડુ ગામ, પાદરા): ટેમ્પો લઈ પાર્સલ લેવા આવેલો.
• અજહર ખાન પઠાણ (રહે. રસુલજીની ચાલ, નવા યાર્ડ): ટેમ્પોમાં દારૂનો જથ્થો લઈ જનાર.
• મોહમ્મદ કલામ પઠાણ (રહે. રસુલજીની ચાલ): ટેમ્પોમાં માલ ભરાવનાર.
• મોહમ્મદ હસન હકીમ અલી શેખ (રહે. રાજા મહોલ્લો, બોરસદ, આણંદ): ટ્રાન્સપોર્ટ ઓફિસનો મેનેજર.

🔍 મુદ્દામાલ અને વોન્ટેડ આરોપી

👉પોલીસે દારૂની બોટલો ઉપરાંત, ગુનામાં વપરાયેલા બે ટેમ્પા અને પાંચ મોબાઈલ ફોન સહિત કુલ પાંચ લાખ રૂપિયાથી વધુનો મુદ્દામાલ કબજે કર્યો છે.

👉આ ઉપરાંત, વડુના ટેમ્પો ડ્રાઇવરને દારૂનો માલ લેવા મોકલનાર મુખ્ય સૂત્રધાર પરેશ સોલંકી (ખોખરપુરા, પાદરા)ને પોલીસે વોન્ટેડ જાહેર કર્યો છે અને તેને ઝડપી પાડવા માટે વધુ તપાસ હાથ ધરી છે.