- જુગારધામ પર રેડ: કપુરાઈ પોલીસે બાતમીના આધારે વાઘોડિયા-ડભોઈ રોડ પર કાર્યવાહી કરી.
- 9 આરોપીઓની ધરપકડ: મકાન માલિક અશોક ગાંધી સહિત કુલ 9 શખ્સો રંગેહાથ ઝડપાયા.
- મુદ્દામાલ: રોકડ, મોબાઈલ, વાહન અને અન્ય સાધનો મળી રૂ. 2.52 લાખનો મુદ્દામાલ જપ્ત.
- સંદેશ: પ્રોહિબિશન અને જુગારની પ્રવૃત્તિઓ નાબૂદ કરવા વડોદરા પોલીસનું સઘન અભિયાન.
વડોદરા: વડોદરા શહેરના વાઘોડિયા-ડભોઈ રીંગ રોડ વિસ્તારમાં આવેલા એક મકાનમાં બહારથી માણસો બોલાવી જુગાર રમાડવામાં આવતો હોવાની બાતમી મળતા કપુરાઈ પોલીસે આ સ્થળે દરોડો પાડી જુગાર રમતા 9 ઇસમોને ઝડપી પાડ્યા છે. પોલીસે રોકડ રકમ, મોબાઈલ ફોન અને વાહનો મળી કુલ રૂ. 2,52,840/-નો મુદ્દામાલ જપ્ત કર્યો છે.
ઘટનાની વિગત:
પોલીસને બાતમી મળી હતી કે, યોગી રેસિડેન્સીમાં રહેતા અશોકભાઈ વ્રજલાલ ગાંધી પોતાના મકાનમાં બહારથી લોકોને બોલાવી પત્તા-પાના વડે હારજીતનો જુગાર રમાડી રહ્યા છે. આ માહિતીના આધારે કપુરાઈ પોલીસ સ્ટેશનની ટીમ દ્વારા અશોકભાઈ ગાંધીના ઘરે દરોડો પાડવામાં આવ્યો હતો. રેડ દરમિયાન મકાન માલિક સહિત કુલ 9 વ્યક્તિઓ જુગાર રમતા રંગેહાથ ઝડપાઈ ગયા હતા.
તંત્રની કાર્યવાહી:
પોલીસે સ્થળ પરથી રોકડ રૂ. 31,240/- , 8 મોબાઈલ ફોન (કિંમત રૂ. 1,20,000), 2 વાહનો (કિંમત રૂ. 1,00,000), 65 પ્લાસ્ટિકના કોઈન, પત્તાના બોક્સ અને ખુરશીઓ મળી કુલ રૂ. 2,52,840/- નો મુદ્દામાલ કબજે કર્યો છે. કપુરાઈ પોલીસ સ્ટેશનમાં તમામ આરોપીઓ વિરુદ્ધ જુગારધારાની કલમ 4 અને 5 હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
ઝડપાયેલા આરોપીઓ:
પકડાયેલા આરોપીઓમાં અશોકભાઈ વ્રજલાલ ગાંધી, ધવલકુમાર અશોકભાઈ શાહ, રમેશ કનૈયાલાલ પરીખ, પિનલકુમાર જયાંપતલાલ શાહ, પ્રિતેશકુમાર રજનીકાંત શાહ, દિપેશ વિજયકુમાર શાહ, જયસુખભાઈ છગનલાલ શાહ, નવનીત ગોવર્ધનદાસ શાહ અને રાજેન્દ્રકુમાર ચીમનલાલ શાહનો સમાવેશ થાય છે.
