- એર વાલ્વ બદલવાની કામગીરી: પાણીની મુખ્ય લાઈનો પર જૂના અને બિનકાર્યરત એર વાલ્વ બદલવા માટે હોનેસ્ટ એન્જિનિયરિંગનું રૂ. 84.89 લાખનું ટેન્ડર મુકાયું.
- અંદાજ કરતાં વધુ ખર્ચ: એર વાલ્વ બદલવા પાછળ અંદાજિત કિંમત કરતાં રૂ. 10,26,227 વધુ ખર્ચ થશે, સાથે સલાહકારને ફી અપાશે.
- સનફાર્મા-ભાયલી બ્રિજ લાઈન શિફ્ટિંગ: નવા બ્રિજના પાયામાં નડતરરૂપ 700 અને 500 એમએમ વ્યાસની પાણીની લાઈનો ખસેડવામાં આવશે.
- વધારાના નાણાકીય ખર્ચને મંજૂરી: ભાવેશકુમાર પંડ્યાનું રૂ. 31.55 લાખનું ટેન્ડર (અંદાજ કરતાં 17% વધુ) એસઓઆર મુજબ વ્યાજબી ગણી સ્થાયી સમિતિમાં રજૂ કરાયું
વડોદરા મહાનગરપાલિકા દ્વારા શહેરમાં નાગરિકોને સુચારુ અને નિયમિત પાણી વિતરણ પૂરું પાડવા તેમજ માળખાકીય વિકાસના પ્રોજેક્ટ્સને વેગ આપવા માટે મહત્વના નિર્ણયો લેવામાં આવી રહ્યા છે. તાજેતરમાં પાલિકાના પાણી પુરવઠા વિભાગ અને બ્રિજ પ્રોજેક્ટ શાખા દ્વારા હાથ ધરવામાં આવેલી કામગીરીઓને લઈને સ્થાયી સમિતિ સમક્ષ બે મોટી દરખાસ્તો મંજૂરી માટે રજૂ કરવામાં આવી છે.
પ્રથમ પ્રોજેક્ટ અંતર્ગત, વડોદરા મનપાના પાણી પુરવઠા વિભાગ દ્વારા પાણીના મુખ્ય સ્ત્રોતોથી વિતરણ મથકો સુધી પાણી પહોંચાડતી મુખ્ય લાઈનો પર વર્ષો જૂના અને બિનકાર્યરત બનેલા એર વાલ્વ બદલવાની તેમજ નવી વ્યવસ્થા ઊભી કરવાની કામગીરી હાથ ધરવામાં આવનાર છે. આ માટે અગાઉ ટેન્ડર પ્રક્રિયા હાથ ધરવામાં આવ્યા બાદ બીજા પ્રયત્ને ચાર ઇજારદારોએ રસ દાખવ્યો હતો. જેમાં ‘હોનેસ્ટ એન્જિનિયર’ દ્વારા અંદાજિત રૂ. 74,63,472 ની સામે 13.75 ટકા વધુ એટલે કે રૂ. 84,89,699 નું ભાવપત્રક રજૂ કરવામાં આવ્યું છે. આમ, અંદાજ કરતાં આ કામ પાછળ રૂ. 10,26,227 વધુ ખર્ચ થશે. આ ઉપરાંત, આ કામગીરી માટે સલાહકાર તરીકે ‘રાય ઇન્દ્રા પ્રાઇવેટ લિમિટેડ’ ને રૂ. 85,801 ચૂકવવામાં આવશે.
બીજી તરફ, વડોદરા મ્યુનિસિપલ કોર્પોરેશનની બ્રિજ પ્રોજેક્ટ શાખા દ્વારા સનફાર્મા રોડથી ભાયલી તરફ નવો બ્રિજ બનાવવાની કામગીરી ચાલી રહી છે, જેના પાયાના ખોદકામમાં નડતરરૂપ બનતી 700 એમએમ અને 508 એમએમ વ્યાસની પાણીની મુખ્ય લાઈનો ખસેડવાની જરૂરિયાત ઊભી થઈ છે. આ કામ માટે રૂ. 26,97,392 ના અંદાજ સાથે ટેન્ડર મંગાવવામાં આવ્યા હતા. પ્રથમ બે પ્રયત્નોમાં સફળતા ન મળતા ત્રીજા પ્રયત્ને બે ઇજારદારોએ ભાગ લીધો હતો, જેમાં ‘ભાવેશકુમાર આર. પંડ્યા’ દ્વારા અંદાજ કરતાં 17 ટકા વધુ એટલે કે રૂ. 31,55,949 નું ટેન્ડર ભરવામાં આવ્યું હતું. આ કામ પાછળ અંદાજ કરતા રૂ. 4,58,557 વધુ ખર્ચ થશે, જોકે એસ.ઓ.આર. (SOR) અને બજારભાવની તુલનાએ આ ભાવ માત્ર 1.92 ટકા જ વધુ હોવાથી તેને વ્યાજબી ગણાવીને મંજૂરી માટે સ્થાયી સમિતિમાં રજૂ કરાઈ છે.
