- વાયદા ખોટા સાબિત થયા: બુલેટ ટ્રેન પ્રોજેક્ટના નામે 2 મહિનામાં ખોલવાનો વાયદો કર્યો, પણ 3 મહિના વીત્યા છતાં અંડરપાસ બંધ!
- 10 હજાર લોકો પરેશાન: પ્રિય લક્ષ્મી મિલ, એમ.કે.નગર અને રેલ્વે કોલોની સહિતના વિસ્તારોના રહીશો અવરજવર માટે વલખાં મારી રહ્યા છે.
- ટ્રાફિકની સમસ્યા: પંડ્યા બ્રિજ પર ટ્રાફિક જામની ભીતિ; સમય અને ઇંધણનો બેફામ બગાડ થતા નાગરિકોમાં ભારે આક્રોશ.
- તંત્ર ગેરહાજર: રહીશો રજૂઆત કરવા NHSRCL ની ઓફિસે પહોંચ્યા, પણ અધિકારીઓ ન મળતા લોકોમાં રોષનો જ્વાળામુખી ફાટ્યો.
વડોદરા: વડોદરામાં બુલેટ ટ્રેન પ્રોજેક્ટનું કામ અત્યારે આસપાસના રહીશો માટે મુસીબતનું કારણ બની ગયું છે. ફેબ્રુઆરી મહિનામાં પ્રિય લક્ષ્મી મિલ અંડરપાસ કામગીરીના બહાને બંધ કરવામાં આવ્યો હતો, પરંતુ ત્રણ મહિના જેટલો સમય વીતી જવા છતાં આ અંડરપાસ આજદિન સુધી ખોલવામાં આવ્યો નથી.
🧐રહીશોની હાલત કફોડી:
આ અંડરપાસ બંધ હોવાથી પ્રિય લક્ષ્મી મિલની ચાલ, ડૉ. છગનલાલની ચાલ, એમ.કે. નગર અને ગાયકવાડી ચાલ સહિતના વિસ્તારોના અંદાજે 10 હજારથી વધુ લોકો પ્રભાવિત થયા છે. પોતાના રોજિંદા કામ-ધંધા અને જીવન જરૂરિયાતની ચીજવસ્તુઓ માટે આ વિસ્તારના લોકોને લાંબા ચક્કર કાપવા પડી રહ્યા છે. પંડ્યા બ્રિજ પર ટ્રાફિકનું ભારણ સતત રહેતું હોવાથી લોકોને કલાકો સુધી ટ્રાફિકમાં ફસાયેલા રહેવું પડે છે, જેનાથી નાગરિકોનો કિંમતી સમય અને પેટ્રોલ-ડીઝલનો વ્યય થઈ રહ્યો છે.
👷♂️અધિકારીઓની ઉદાસીનતા:
વહીવટી તંત્ર દ્વારા કામગીરી 2 મહિનામાં પૂર્ણ કરવાનો વાયદો કરવામાં આવ્યો હતો, જે અત્યારે પોકળ સાબિત થયો છે. આજે આ સમસ્યાથી કંટાળેલા સ્થાનિક રહીશોએ ભેગા થઈને નેશનલ હાઈ સ્પીડ રેલ કોર્પોરેશન લિમિટેડ (NHSRCL)ની ઓફિસનો ઘેરાવો કર્યો હતો. જોકે, ત્યાં પહોંચ્યા બાદ તેમને જાણવા મળ્યું કે સંબંધિત અધિકારીઓ ગેરહાજર છે. જવાબદાર અધિકારીઓની ગેરહાજરીએ રહીશોના રોષમાં વધારો કર્યો છે.
🫵વિકાસના કામો શહેરની પ્રગતિ માટે જરૂરી છે, પણ પ્રજાને મુસીબતમાં મૂકીને થતો વિકાસ પણ શું કામનો? સ્થાનિકોની આ વ્યાજબી માંગણી સામે તંત્ર ક્યારે જાગશે?
